سلام عليكم يا اعضاء المنتدى الكرام
بصو بقى اللي يعرف اي جملة مفيدة ف القصة دي ميبخلش بيها
اللي هي ايه القصة؟
باذن الله ناويين ف البيت نشتري عربية بعد نقاش سنين
واقترحت عليهم انه 20 الف او ازيد ينفع يجيبو حاجة كويسة مستعمل
لما وافقوني ابتديت ادور واقرا
المهم توصلت لانسب حاجة يا ماروتي
يا لادا
يا اما اللي دخلت دماغي اكتر دايو ماتيز
شكلها جديد ومريحة من جوة عن ال2 التانيين خصوصا انها نفس موتور الماروتي
واللي عرفته من فرق وياريت تصححولي ان ماروتي سهلة ف التصليح وقطع غيارها كتيرة ورخيصة وموفرة في البنزين
ولادا جامدة وتستحمل بدليل انها التاكسي هنا وموتورها محترم بس بيخليها تستهلك بنزين وقديمة ومش مريحة
الاسئلة بقى ونشد خط من هنا عشان لو حد اتخنق م القصة
(لو ممكن تاخدو مشاركتي اقتباس عشان هاسال على حاجات كتير)
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــ
م الاخر تفضل اي واحدة فيهم وليه؟
الدايو ماتيز ايه مميزاتها وايه عيوبها؟
هل ليها مشاكل على المدى البعيد؟ عشان مش ناويين على تغيير خالص
اخبار قطع غيارها توفرها واسعارها
وتصليحها فيه ناس بتفهم فيها عادي؟ للعلم انا من اسكندرية
الموتور الصغير عاجبني ف انه موفر ف البنزين بس اخبار اداؤه ايه؟ سمعت انه هيبقى رخم ف المطالع مثلا بس ماهياش كتير يعني بالمقارنة بالتوفير بس ايه كمان ممكن الموتور ميعملوش
اعرف لها موديلين منتشرين 1999 و 2000 رينج اسعارهم يكون ايه؟
وعامة في سوق المستعمل فيه وقت معين ف السنة يعني موسم السعر بيقل فيه؟
سؤال مهم ادور فييييييين؟على ماتيز بالذات
انا ماعرفش غير سايت كونتاكت كارز على كام سايت اعلانات بس فيه حتة او سوق ادور فيهم
السوق انا عرفت انه بيضحكو ع الناس وفيه سواء ف السعر او الحالة
سؤال مهم بقى اوي
اوقات لما بقرا عن اللي ينزل يلاقي عربيته اتكسرت ولا مش عارف ايه وقع ولازم يغيره
ولا اما باشوف بعيني منظر الطريق ف مصرنا المحروسة وكل واحد واخد الطريق بلطجة
باتعقد بصراحة
وبافكر اخليهم يصرفو نظر
بس ف نفس الوقت نفسي ارتاح من بهدلة المواصلات وكمان هش مش بتوصل لكل حتة
اعتبروني اختكم ورسوني على الحوار دة عشان تعبت واحترت
وتقريبا انا المسئولة عن القصة دي ف اي مشكلة هتحصل هتبقى ف وشي وانا زي ما قلتلكم لسة كنت ميح بيضا عن العربيات
كفاية كدة ابقى اعمل جزء تاني عن السواقة
