رد: حــــــادث بسيــــــــــط بالســـــــــــــــــاجــ ــــــــــــــــا لكن الايرباج فتحت ....ميزة أم عيب ؟!!
المشاركة الأصلية كتبت بواسطة memodina1
قدر الله وما شاء فعل والحمد لله على سلامتك
|
المشاركة الأصلية كتبت بواسطة memodina1
بص الحزام امرة سهل جدا جدا جدا واخرة معاك هتجيب واحد تانى وخلاص لكن مش هيحصل كدة لانة اى حد هيعرف يصلحة ولو انت فكيت الفبر وفكيتة هتعرف تصلحة وترجعة تانى
اما الاير باج بصراحة انا مش عايزك تصلحها حرام انها تدفع فيها الفلوس دى فيها دا انت تجيب حاجة تانى فى العربية افضل فسيبك من الايرباج خالص وشكل الدريكسيون ممكن التوكيل واكيد فية الموضوع دا يركبلك الحتة اللى اتكسرت عشان تطلع الايرباج من غير ما يصلح الايرباج خالص ونصيحة تانى شيل البلستر بسرعة لانة هيعلم فى العربية ومش هتعرف تطلعة بطلوع الروح
اما التوكيل فلازم تروح عشان تطمن على كل حتة فى العفشة وتحت الماتور واكيد الكرتيرة اتكسرت بتاعت الماتور اللى هى الحتة البلاستك اللى بتحمية من المية فحاول تركبها فى التوكيل وظبط صيانتك وتوكل على الله
بس امانة متسيبش الموضوع دا ياثر عليك فى النكد وفك كدة وريح دماغك اللى يجى فى الحاجات دى كلة يهون والله وافرح بعربيتك انت لسة تعتبر زيرو افرح وسيبك من النكد صلحا بس وبلاش اير باج واكشف عفشة كاملة وشوف الجنوط لو فيها لوحة ولا حاجة ورصص وزوايا وامشى كدة على 120 وشوف لو فية رجة فى الدريكسيون ولا حاجة مش مظبوطة لو كلة سليم بعد كدة يبقى الحمد لله عدت خير ولعلمك انا نفسى اجيب العربية دى واغير الفيرنا مش انى الفيرنا وحشة انما فعلا انا بحب شكل ومتانة الساجا وربنا يكفيك شر حاجة وحشة اخوك محمد لو فية اى حاجة عايز تسال عليها صوت ولا زنة ولا عوجة ولا اى حاجة اتصل بيا 0123907706 او على الايميل memodina1@yahoo.com
|
أخى الكريم محمد ....
والله العظيم كلامك هون عليا كتير جدا جدا وسهلى الامور...
بالنسبه للعفشه هى سليمه والحمد لله وكل اللى حصل ان القنطرة الاماميه اللى شايله العفشه قدام والرادياتير اتطبقت والحمد لله عملتها عند سمكرى على البارد ورجعت زى ماكانت بالظبط شكلا وأداءا
انا طلعت بالعربية بعدها فوق ال 120 كم/ س والحمد لله مفيش غير حدفه بسيطه يمين وإهتزاز فى المرايه اليمين بس دون اى اهتزاز فى الدريكسيون.... لكن الكارتيره والعفشة والجنوط وحتى الفيبر البلاستيك اللى تحت سليم يعنى مش هحتاج غير ظبط زوايا ومش مهم كمان لان الحدفه بسيطه جدا وعلى السرعه العالية بس
انا سالت فى التوكيل عن التكلفه لتغيير الايرباج وحزام الامان ... تخيل كام ؟؟؟!!!!
7000 جم ... ايوا سبعه الاف جنيها ....
انا لو معايا المبلغ ده اصلا مش هصلحهم ...
انا هشيل السلوتب وهروح لسروجى محترم أخليه يفصل زى دايره أو كيس جلد قطره 10 سم بس ويكون جلد محترم ورصاصى بلون الدريكسيون وتتلبس فوق مكان خروج الايرباج أو حتى الزق مكان خروج الايرباج بأمير .... مكان خروج الايرباج عبارة عن شرخ عريض مكان الكلاكس فى وسط الدريكسيون ... يعنى تتلم ...بملاليم....
حزام الامان لوحد ب 1300 جم ..... ليه يعنى ؟؟؟ والله لأشترى حزام أمان عادى وأركبه أنا ومش هيكلفنى 200 جم بالكتير اما يكون ماركة كمان ...
الحزام القديم ماينفعش يتصلح لان المكنه بتعته باظت ... انا بالفعل فكيت الفيبر اللى فوق الحزام ولاقيت المكنه قافشة على الحزام والاغرب انى لاقيت فيها دايرة كهربا بتاعة ايه مش عارف .... ممكن تكون تقفيل دايرة الكهربا بتاعة لمبه التابلوه بتاعة الحزام ....
اللى مزاولنى لمبه الايرباج فى التابلوه على طول منوره طبعا وحلتها والحمد لله ...شلت الفيوز بتاع الايرباج من علبه الفيوزات وانطفت اللمبه....
على رأيك ... انا لسه فى الزيرو وهنكد على نفسى ليه ... الحمد لله وقدر الله ومشاء فعل وكان ممكن يحصل بلاوى اكتر من كده...
تشرفت جدا جدا ردك وإهتمامك يا استاذ محمد ولا تنسانا بخالص الدعاء
__________________
مع خالص الدعاء من الفؤاد بدوام النعمه والفضل من الله تعالى. وأن يهديكم لما فيه خير لكم ولسيارتكم وأن يحفظكم ويحفظ ما وهبكم من كل شر وسوء ومن كل نفس أثمه ومن كل عين حاسدة. وأن يكتب لكم حسنه فى كل خطوة تخطوها بسيارتكم ويحط بها من ذنوبكم. وقدر الله لكم وكتب عليكم فعل الخير وراحة البال والغنى عن السؤال.
محمد عبد المجيد المشتريات الخارجية شركة الاسكندرية للإضافات البترولية ( اكبــــا)
0116007025
|