حــــــادث بسيــــــــــط بالســـــــــــــــــاجــ ــــــــــــــــا لكن الايرباج فتحت ....ميزة أم عيب ؟!!
أحبائى الكرام ،،،،
سلام الله عليكم ورحمته وبركاته
للأسف تعرضت لحادث بسيط بالساجا وكان عبارة عن صعودى بالسيارة فوق الرصيف على سرعه ولكن ربنا ستر وسلم نظرا لان الرصيف ماكانش عالى أوى لكن للأسف الايرباج فتحت فى وشى وطلع منها دخان أبيض وبودرة بيضا جت على إيدى وتسببت فى حرق شديد فى ذراعى الايمن بالاضافة الى بعض الخدوش فى الذراعين بسبب البلاستيك المتناثر من الدريكسيون نتيجه فتح الايرباج.
المشكله دلوقتى فى حاجتين....
اولا طبعا الايرباج اللى فتح ده تصليحه مكلف جدا ومش عارف اعمل ايه ... سالت فى التوكيل بالتليفون قالولى الفين ونص .... لمبه الايرباج طبعا منوره على طول فى التابلوه وحزام الامان علق مش عارف ليه لا عاوز يلم ولا عاوز يطلع ومش عارف هل ليه علاقه بالايربج ولا لاء....
هل فتح الايرباج يطلع العربية من الضمان ؟ وهل ذهابى للتوكيل بالسيارة فى هذه الحالة سيتم تسجيل ماحدث على انه حادثه فى ملف العربية ؟ وهل فتح الايرباج يعنى تسجيل حدوث حادثه فى كمبيوتر العربية نفسها ؟؟؟؟
الحمد لله رغم طلوع العربية فوق الرصيف لكن العربية من تحت ماحصلهاش حاجة الا خبطه بسيطة جدا جدا وغير مؤثرة جت فى القنطره الاماميه ورحت لسمكرى يبص عليها مابقاش مصدق ان فى قنطره بالصلابه والسمك ده وقعد يشكر فى اللى شافه فى العربية من تحت جدا جدا وبالرغم من الحادثه والنكد اللى اتنكدته الا ان كلام السمكرى بسطنى وزاد فى ثقتى فى العربية...ولو إنه على حسابى كسر الزرجينه بسبب شد القنطره....
ثانيا ... موضوع حزام الامان .... هل هو مرتبط بالايرباج فعلا ؟ يعنى لو انا ماكنتش رابط حزام الامان ماكانتش الايرباج فتحت ؟ وهل لما الايرباج تفتح زى كده حزام الامان يعلق معاها ليه ؟
انا بفكر الغى حكايه الايرباج الجديد وامشى بالعربية كده وخلاص بس الدريكسيون شكله وحش كدا لانى لافف سلوتب شفاف على الدريكسيون وبالظبط فوق العلامه بتاعه بروتون اللى فى وسط الدريكسون وهو المكان اللى خرجت منه الايرباج... ولو سيبت الدريكسيون بالمنظر ده ....إيه الحل فى حزام الامان اللى مش عاوز يشتغل ده ؟؟؟؟!!!
ياريت أصحاب الخبرة يدلونى اعمل ايه ؟ خايف اروح بيها التوكيل كده يقولولى فتح ونصب وهلم جره والعربية خرجت معرفش من ايه ولازم ايه وتتسجل حادثه ..... مع العلم ان صيانه الخمس الاف بتاعتى المفروض كان معادها الاسبوع ده وخايف اروح بالعربية بالمنظر ده....
أرجع وأقول قدر الله وما شاء فعل والحمد لله انها جت على كده والحمد لله ان العربية بالصلابه دى والحمد لله انى طلعت فوق رصيف واطى والحمد لله ان العربية طلعت فوق الرصيف ومشيت لان الرصيف لو كان عالى عن كده مع السرعه بتاعتى والصدمه كانت العربية اتفرملت فى الرصيف والعفشة كانت هتتبهدل دا غير ان الاطارين الاماميين كانوا هينفجروا والجنوط هتتعوج ....
الحمد لله ثم الحمد لله ثم الحمد لله
فى إنتظار مقترحاتكم وافادتكم ومشورتكم .... أعمل ايه بالظبط فى الايرباج وحزام الامان والتوكيل ؟؟؟؟؟!!!!!
محمد عبد المجيد
الاسكندرية
ساجا - أبيض - أوتو - 5000 كم
__________________
مع خالص الدعاء من الفؤاد بدوام النعمه والفضل من الله تعالى. وأن يهديكم لما فيه خير لكم ولسيارتكم وأن يحفظكم ويحفظ ما وهبكم من كل شر وسوء ومن كل نفس أثمه ومن كل عين حاسدة. وأن يكتب لكم حسنه فى كل خطوة تخطوها بسيارتكم ويحط بها من ذنوبكم. وقدر الله لكم وكتب عليكم فعل الخير وراحة البال والغنى عن السؤال.
محمد عبد المجيد المشتريات الخارجية شركة الاسكندرية للإضافات البترولية ( اكبــــا)
0116007025
|