رد: حكايتى مع السيارات-حكايه 10 سنوات
كانت كما توقعت سيارة قميئة وسيئة!!
الصدأ والبرومة سارحة فى كل مكان وفرشها الداخلى مهلهل وكاوتشها أملس لاحس كأنه من الزيرو لم يتم تغييره00 والسيارة مهلهلة وتكاد تتداعى كل قطعة فى ناحية00
وأصر صاحبها على تجربة قيادتها وأنا أتجنب هذه المغامرة بأية وسيلة !
ولكن فجأة وجدتنى خلف المقود مجبرا 00
ودارت الملعونة على الشعرة ومع بداية الدوسة على الدبرياج جالى شد عضلى لأن الدواسة مصممة لأبطال رفع الأثقال والعدو من أصحاب العضلات المنتفخة!
حركت ناقل الحركة وكاد ذراعى أن ينخلع من هذه العصا التى لا تستجيب إلا إذا ألقيت بثقلك عليها وقدمك متروسة فى الباب!
وأخيرا تحركت كقط عجوز ينتفض ويكح ويتحشرج وأنا أرتج بشدة ودهشة ومع زيادة السرعة قليلا أصبحت الرجرجة خبط ورزع فى السقف طبعا لرأسى وكأنها حمارة بليدة عرجاء!
رحمتك يارب!
ما صدقت نزلت منها وقلت للوالد العزيز :
- مفيش أحلى من كده
إركب وجرب بنفسك
وقادها الوالد لعدة أمتار ثم تركها ونزل مكفهر الوجه!
قلت لصاحبها:
-هو الدبرياج والفيتيس ده طبيعى
قال مبتسما:
-آه00السيات كله كده
قلت:
-آه00
يعنى ما بيتظبطش؟
صمت قليلا ثم قال:
-والله جربت ومفيش حل
-طب والعربية فيها مصاريف إيه بامانه؟
قال ببساطة:
-أربع فرد كاوتش
مارش
بطارية
جوز مساعدين
عمره للموتور
طقم تيل فرامل
مساحتين
فيتيس
شوية سمكرة على رشة نضيفة تبقى زيرو
قلت وأنا أموت كمدا:
- لا بسيطة كلها حاجات فى المعقول وتتلم
-طبعا حاجتها ببلاشومتتكلفش
-المطلوب كام؟
-عشان مجيتكم والواجب نهائى خمس تلاف جنيه
كدت ان أضحك ولكن تداركت وقلت:
-بكره نرد عليك
وكان أبى يجذبنى من يدى للنصرف قبل أن يطق من الغيظ
الحمد لله خلصنا منها 00
هكذا حدثت نفسى
ومن السيات إلى النكبة الكبرى وأسوأ 128 فى التاريخ وتستمر المأساة!!
تتبع
__________________
|