تجربتى مع الشورت بلوك كنت حابب انقلها ليكو
السلام عليكم
انا هعرض لكم تجربتى مع تغيير نص ماتور اللانوس اللى تقريبا اسمها شورت بلوك
اولا انا مكنتش هغير ولا حاجه انا كنت عرضت مشكلتى هنا قبل كده لان كتير من الميكانيكيه نصحونى ان التكتكه اللى فى الماتور دى من البلوف ولما غيرتها مرتين وكل طقم اجيبه يفضل نفس الصوت مستمر قالولى غير وش سلندر.
هى المشكله عندى ان الماتور كنت بسمع فيه تكتكه فى كل احواله السلاسنيه او الجرى وصوتة بيعلى شويه مع الجرى ودة اللى خلاهم يقولو وش سلندر وبلوف وكده دا غير ان العربيه مش حلوة فى السحب على الطريق المستوى فما بالكو فى المطالع وبعد ال 120 بتعلى ببطىء اوى اوى لحد ما توصل ل 160 وتحلف ميت يامين وماهى مزوة عن كده.
المهم بالصدفه انا كاعربيه لانوس 2000 اكيد الزمن جار عليها من على الصاج وكده فكنت برش العربيه البويه الالمانى دى ماعدا السقف لان ناس كتير نصحتينى اخلى السقف الفابريكه بتاعتها حتى لو فيها تأريح شويه قولت مش مشكله ابقى احط عليه استيكر والكلام دة وكنت غيرت وش التابلوة اللى فيه الهوايات بواحد تانى جديد فيه ساعه وزرار حراره قولت اعمله للفوجات قولت بقى اشوف الماتور بالمره عند صنايعى كويس واعتقد الناس كلها هنا عرفاه بدون ذكر اسامى
المهم دا كان الميكانيكى الوحيد اللى كان بيقولى يا بيه دة عمود الكرنك اللى فى النص اللى تحت فيه حاجه هى اللى عامله الصوت دة ومسمعه فوق وبصراحه الراجل دة رائع وانا برتاحله جدا لانه بيعامل ربنا.
كان الكلام فى البدايه على اننا هنجيب نص ماتور وناخد اللى فيه ونركبه فى الماتور بتاعى اللى فى العربيه وبكده نكون ظبطنا الاداء وهربت من حته ماتور ورقم ومرور والقصه الفاشله دى
بصراحه انا لما جبت نص الماتور كان حاجه كده اكنها مركبتش فى عربيه قبل كده او كان راكب ولسه مش اتلين بسم الله ما شاء الله جبته من واحد فى العشرين ربنا يباركله واخته منه بعد غلو الاسعار دى من غير فتيس ولا اى حاجه ب1100.
المهم سمينا الساعه 9 الصبح وفتحنا الماتور ونزلنا الفتيس والماتور وجبنا الزيوت وطقم الشنبر والجلب حاجات كده فى حسبه 500 جنيه انا مكنتش فارقه معايا على قد ما فارق معايا الصوت دة يروح
فكينا وجبنا نركب العمود الجديد بكراسيه فى القديم ونجرب بادينا مش بيلف .....طب العمود القديم وكراسيه نجربه فى الماتور الجديد مش بيلف بردة ....طب العمود الجديد والكراسى القديمه مش بيلف برده.....طب العمود القديم والكراسى الجديده مش بيلف برده ....وكانت حاله غريبه جدا لحد دلوقتى انا مش فاهمها
انا من الاول عينى كانت طالعه على نص الماتور الجديد المهم قولتله ركبه مش مشكله المرور ونبقى نجيبه ورقه وارخص تانى المهم حاجه نضيفه تبقى راكبه
الحمد لله ركبنا وحطيت زيت تقيل شويه 3000 علشان ينضف الماتوروقولت همشى عليه 1000 كيلو وبعدها اغير البوجيهات والسلوك بتاعتها وابقى اغير الزيت على 2000وظبتنا الدنيا وسبتها يوم تليت وهى واقفه
وعملت بيها لحد دلوقتى 900 كيلو كبيرى فى السرعه 70 كيلو
الحمد لله الصوت راح خالص وصوت العربيه بقى ناعم جدا مبقتش عارف هى العربيه دايره ولا لا لو انا واقف جنبها شويه كده
السؤال هنا بقى انا حاسس ان فيه زى ترتيله فى العربيه خفيفه كده متحسش بيها غير عند الشكمان دة يبقى بوجيهات عايزة تتغير؟
وسؤال كمان انا تقريبا الوقت كله الشكمان بيجيب نقط رزاز خيف كده بيبان لو العربيه واقفه ميه على ما اعتقد هل دة صح؟
|