[تامر ديزل]

فيه معلومتين عن المساعدين لازم تكون عارفهم
الاول شوف الصورة دي كده


المساعد ده عباره عن ايه ؟ ده اسطوانه جواها زيت من نوع معين وبستم ( اللي بيلمع ) .. البستم ده فيه فتحات تخلي الزيت يطلع لفوق في الاسطوانه لما البستم ينزل لتحت ... ماشي كده ؟ دلوقتي انت ماشي بالعربية وقابلت مطب . .. روحت مهدي وطلعت المطب .... ايه اللي بيحصل تحت في العربية ؟العجلتين اللي قدام هيترفعوا لفوق شويه هيضغطوا على المساعد .. يقوم البستم داخل جوا اسطوانته والزيت يطلع لفوق شويه بس برده جوا الاسطوانه مبيخرجش من اسطوانته ليه ؟ لان فيه حاجه اسمها اويل سيل عامله زي الغويشه كده بس كاوتش بتبقى متركبه في اخر الاسطوانه من فوق والبستم بيدخل الاسطوانة من خلالها ... الاويل سيل هوا اللي بيمنع الزيت من انه يخرج برا الاسطوانه .. تقوم لما تنزل من على المطب والطريق يبقى مستوى تاني تقوم السوسته اللي من بره المساعد تفتحه تاني وترجع البستم لوضعه الطبيعي والزيت ينزل تحت تاني ..
طيب لو انت اخدت المطب على سرعه ... المساعد هينضغط بعنف .. يقوم البستم ضاغط على الزيت اللي في الاسطوانه بعنف يقوم ضغطه يزيد ويحاول يخرج من الاسطوانه ...يقوم يخرج من اضعف مكان وهوا الاويل سيل اللي في قمة الاسطوانه يقوم المساعد يضرب زيت ...
الصورة دي هتوضح شوية الكلام ده


من اليمين عندك البستم ( اللي له ودن ) وبعد كده فيه غطاء وجواه الاويل سيل اللي بنتكلم عنه
المعلومه التانيه هيا ان المساعد ده مش بس على اد انه يمتص الصدمات ويدي الراكب شعور بالراحه ... لأ ليه كمان فايده مهمه جدا وهيا انه بيوزع الاحمال في الملفات خصوصا لما تكون بتاخد ملف بسرعه بيبقى جسم العربية عاوز يميل عكس الملف ...يقوم المساعد يقاوم الميل ده ويمنع ان العربية تنقلب .. بس طبعا بحدود سرعه معينه
وكمان لما تضرب فرامل جامده وزن العربية كله بيندفع لقدام يقوم المساعدين تقاوم الاندفاع ده لقدام والا ممكن برده العربية تنقلب ...
شوفت بقى المساعدين مهمه ازاي