رد: حلقات (جريمة كل يوم) ألغاز بوليسيه مسلسلة
خـــــــــــــاص بـمـنـتـــــدى مـــصـــــــر مـــوتـــــــــــــــورز و غير مسموح بالنقل او الأقتباس الا عن طريق استئذان كاتب الموضوع ..... و كاتب هذا الموضوع له حق امام الله لو تم نقل او اقتباس الموضوع بدون معرفته ..... و لكم جزيل الشكر ,,,,
الحلقه الثانيه
---------------
حقيبة الذهب
---------------
حسن أساور تاجر ذهب معروف بالمنطقه يقطن بالطابق الخامس فى أحد البنايات بمنطقه هادئه وله محل مجوهرات شهير بأحد المناطق التجاريه وقد اعتاد على حمل حقيبه بها مجوهرات ثمينه لا تقل عن مليون جنيه يحملها من البيت الى المحل والعكس وفى تمام الساعه العاشرة صباحا ينزل بالحقيبه ويضعها فى السياره وينطلق الى محله00
وكان اليوم نزل كعادته فى نشاطه المعتاد 00
وضع الحقيبه فى السيارة وتذكر أنه نسى هاتفه المحمول فصعد على الفور لاحضارة ونسى أغلاق السيارة وعندما نزل مرة اخرى اكتشف فقدان الحقيبة!
اختفت الحقيبه تماما وبعد سؤاله للجميع انكروا رؤيتها!
ابلغ حسن الشرطه وعلى الفور حضر العقيد دهب ومساعده المقدم فضه
ضحك العقيد وهو يقول لمساعده:
-انا اتسرقت ولازم ترجعنى
-سعادتك الحمد لله ان انا فضه مش دهب زى سعادتك
داعبه:
-عشان تعرف ان الناس معادن
وبعد سؤال جميع الموجدين حول السيارة فى هذا الوقت00وقد كانوا00
شمندى حارس البناية
باتعه بائعه الخضار
بندارى البقال صاحب السوبر ماركت امام بوابه البنايه
ربيع بائع الفول وكان ينادى بعربته
قالت باتعه :
-انا غفلت يا بيه بعد ما غلبنى النوم00 من صباحيه ربنا ما بعتش فجلة 00ساعه محدش عدى فى الشارع00تشترى كرنبة ظازة يابيه ونستفتح؟
وقال بندارى البقال:
-انا سعادتك كان عندى زباين كتير وانشغلت معاهم بعد مابعت الواد ابنى يودى طلبات لزبون ومشفتش حاجه
وقال ربيع بائع الفول:
-انا كنت ماشى بنادى على الفول والشارع كان منفض سعادتك ومحدش نفعنى بحاجه ولا قلى هات لوز يا ابو ربيع00ولا شفت عربيه ولا شنطه سعادتك
وقال شمندى الحارس:
-انا كنت قاعد سعادتك قدام البوابه والدنيا بتلف بيا وراسى مصدعه شفت الاستاذ حسن نزل وبعدين طلع تانى ودخلت على طول جوة اعمل كوبايه شاى تعدل دماغى
نظر العقيد لمساعده فقال فضه:
-انا عرفت مين اللى خد الشنطه
-الموضوع باين زى الشمس
فين الدهب يا فضه؟
الحل الحلقه القادمه
خـــــــــــــاص بـمـنـتـــــدى مـــصـــــــر مـــوتـــــــــــــــورز و غير مسموح بالنقل او الأقتباس الا عن طريق استئذان كاتب الموضوع ..... و كاتب هذا الموضوع له حق امام الله لو تم نقل او اقتباس الموضوع بدون معرفته ..... و لكم جزيل الشكر ,,,,
__________________
التعديل الأخير تم بواسطة sh_masry ; 09-05-2009 الساعة 12:06 PM
|