المشاركة الأصلية كتبت بواسطة stonecoldmido5
مساء الخير علي كل الاعضاء ,
حضرتك بتقارن بين فئتين صعب ان حضرتك تقارن بينهم و بالتأكيد الداستر هتتظلم في المقارنة دي لسبب واحد الفرق الشاسع بين كماليات العربيتين لان الداستر كماليتها محدودة شوية بالنسبة للاسكودا او الاسبورتاج او حتي القاشقاي .
بس فهمت من كلام حضرتك انك بتفضل العفشة اللي تقدر تستحمل المطبات و النقر و طرق مصر الجميلة وعلشان كمان لو حضرتك بتسافر كتير فعلشان كدة اقدر ارشح لحضرتك الداستر بين كل الترشيحات التانية اللي اتفضل بيها الاعضاء .و ده علشان :
1- احسن عفشة عربية ركبتها في مصر .
2- ما شاء اللة اتزان ما بعده اتزان و ده علي سرعات عالية .
3- صالونها اوسع بكتير جدا جدا عن الفانتازيا (عن تجربة) لان الاسكودة نصها شنطة .
4- و اللة بعامل العربية دي اسوء معاملة باخد بيها نقرو مطبات , بركن علي ارصفة عالية , و بخش فيها ببرك مية ,بطلع بيها في الصحراء مع صحابي و اللة و لا اشتكيت , وع فكرة عفشة الفانتازيا ناشفة جدا.
5- اعلي بكتير من القاشقاي و خصوصا من الاكصدام الامامي , و اوفر في السعر من الاسبورتاج .
6- تجميعها احسن بكتير من الكارينز .
7- اقل نسبة عيوب وسوء تقفيل شفتها في عربية وده واضح من آراء الناس سواء في الوطن العربي او العالم .
و ع الرغم من كدة ممكن حضرتك تاخد في اعتبارك عند قرار الشراء الملاحظات دي :
- الاسكودا طبعا تجميعها احسن بكتير من الداستر .
- فرق كماليات رهيب بين العربيتين اوبين الداستر و جميع العربيات المطروحة وده مش في صالح الداستر .
- الاسكودا اتزانها اعلي بشوية من الداستر و ده بيبان خصوصا بعد 160 كيلو .
- الكارينز بصراحة اوسع من الداستر .
- صالون الداستر فيه حاجات مستفزة شوية زي الازاز الكهربا و مفيش مسند بين الكرسيين الاماميين .
- الاسبورتاج و القاشفاي اشيك و ارقي و افخم بكتير جدا من الداخل .
و بقي علي حضرتك انك تختار بين امكانياتك و متطلباتك و مواصفات العربية اللي حضرتك محتاجة و آسف جدا علي الإطالة .
|
ما شاء الله معلومات قيمة فعلا ربنا يبارك فيك أخي الغالي للمشاركة
هي المشكلة إني محتار فعلا زي ما حضرتك بتقول ما بين حاجتين مختلفتين خالص
عموما أنا محتار بين الداستر والأوكتافيا فقط
لكن القشقاي والكارينز وغيرها مش داخل دماغي خالص
هي فقط الداستر والأوكتافيا
هي الفكرة إن إحنا هنجيب حاجة زيرو وبصراحة أول مرة نشتري زيرو فمحتار بقى
بين الرفاهية في الأوكتافيا ولا الواقع اللي أنا عايش فيه مع الداستر