رد: الحقووووونى
يا جماعه هيا أشترت العربية خلاص, مفيش مجال لكلمة (ياريت كان الأفضل)
الـ 128 و اللادا و الشاهين و ...العربيات القديمة , بتحطك دايماً فى تحدى
و اللى بيتعلم عليها بيتعب شوية فى الأول بس لما بيتعلم بيتعلم سواقه صح الصح, ممكن يسوق ميكروباص بعد كده عادى, و أى عربية تانية هيسوقها و هو مغمض عينية و سايب ايدية و رافع رجلية كمان !!!
معلش ممكن فترة التعليم تطول شوية بس هتديكى ثقه زياده و زى مقولتلك قبل كده هتبقى شوماخر بإذن الله, بس اصبرى شوية و إتأكدى إن ياما ستات ساقت الـ 128 و اللادا و بإختراف عالى جداً, الموضوع أكيد كان صعب عليهم فى الأول, و انتى مش أقل منهم فى حاجه.
دلوقتى أهم حاجتين:
1- ميكانيكى بيفهم يضبط العربية (كهربا و كربراتير و رجلاش بدال الدبرياج و الفرامل و الأكسراتير) <<< الحاجات دى مهمة جداً و هتساعدك فى ضبط حساسية البدالات دى مع دوسة رجلك
2- اللى يقعد يعلمك تتفقى معاه من الأول, ميزعقش لأن الموضوع مش ناقص توتر, و كده بيزود التوتر مش بيدى ثقة
و زى مقال الإخوه هنا ترتبى خطوات السواقه
====================
1- أتأكد ان الفتيس عالمور (مش واخد غيار)
2- بسم الله , و أدور
3- أنزل الهاند (فرامل اليد)
4- أدوس دبرياج للآخر (القدم اليسرى)
5- و أنا دايس دبرياج , آخد الغيار الأول (شمال فوق)
6- أسند القدم اليمنى عالبنزين سنه و أرفع رجلى من عالدبرياج بهدوء (مش فجأه)
7- مع أى تغير فى الوضع لازم أدوس دبرياج
يعنى أنا ماشى عالأول, عاوز أنقل عالثانى, يبقى دبرياج + الغيار الثانى
عاوز أفرمل, يبقى دبرياج + فرامل
عاوز أوقف العربية عالسلانسية (دايرة بس مش بتتحرك) يبقى دبرياج + مور (العصاية فى النص و سايبة مش على أى غيار)
المهم دلوقتى زى مقولنا: العربية تتضبط + التعليم بدون صوت عالى و توتر مفيش حد بيتولد سواق
أعانك الله
__________________
|