[سيف الدين سعيد]

يا جماعه من فضلكم ماتفهموناش غلط . احنا هنا كلنا موضوعيين وقلوبنا بيضاء واللى بيدخل عندنا وبيبدى رأيه ايا كان فاحنا كلنا بنرحب بيه وبنتناقش معاه . واللى بيحب يسأل او يستفسر عن اى حاجه سواء عيب او ميزه بنتناقش معاه وبنسمع منه .
يا أستاذ حازم :
اولا مرحب بيك وزيارتك عندنا تسعدنا وتشرف قسمنا .
وثانيا من فضلك ماتاخدش كلامنا بصيغة التعميم . بالعكس جدا جدا احنا ناس بنحب كل اعضاء المنتدى من كل الأقسام . وبنعتبرهم كلهم أخواننا وحبايبنا ولو حضرتك تتعب نفسك شويه ادخل على كل واحد فينا وشوف مشاركاته وردوده على كل الناس وحاتلاقى ان كلامنا مع الناس كلها باسلوب محترم وودود . ودا طبعنا كلنا بلا استثناء . انما احنا مابنحبش اللى يعيب فى سيارتنا باسلوب مهين وغير للائق . ومش عشان واحد استفزنا أكثر من مره وكل مره لما حد يرد عليه يطلع يجرى يعيط للإداره ويشتكى اننا بنرد على اسلوبه المستخف بينا وبعقلياتنا وبكلامنا . مش معنا كده اننا ناس قافلين على نفسنا ومتكتلين ومعاديين للناس الحلوه اللى فى المنتدى . وأكيد كل ادارة المنتدى عنهم سجل كامل لمناقشات الأعضاء هنا وممكن تكشف على اسلوبنا فى الحوار سواء مع بعضنا او مع اى عضو آخر من أعضاء منتدانا الجميل .
كمان فى نقطه صغيره أحب انى اوضحها لحضرتك بصفه خاصه ولكل أحبابنا بصفه عامه . ان انا عن نفسى لما دخلت المنتدى هنا كنت داخل لمجرد الحصول على معلومات فقط والخروج منه . زى اى منتدى تانى باعمل فيه عضويه . وشكرا ...
انما لما لقيت اعضاء القسم دا ناس ودوده ومحترمه دا اللى خلانى أدمن الموقع وأكون من أعضاؤه المتيمين بيه . انما عن نفسى لو وجودى فى المنتدى حايسبب لكم اى مضايقه فأنا حايسعدنى انى انسحب فورا حلا لهذه المضايقه . وبهدوء تام .
ودا مع كل حبى واحترامى لكل عضو فى منتدانا الجميل وعلى رأسهم ادارته ..
بس على فكره هو كده قدر انه يوصل للى هو عايزه وهو انه يسوء صورة العربيه وصورتنا عندكم . وتحياتى للجميع .