[ayman al-mufty]

تحية طيبة أنا إشتريت عربية من شخصية كبيرة في الدولة والسيارة موديلات الستينات تعتبر كلاسيك وخدتها قسط بس العربية في الثورة الأخيرة إتكسر الزجاج كلو وإتسرقت منها حاجات كتير المهم أنا إشتريتها على كده الراجل عملي توكيل إدارة فقط بكل سيارات مرسيدس هو يملكها وطبعا هو معندوش غيرها بس التوكيل
إتكتب كده عشان الرخصة ضايعة ومفيش شهادة بيانات العموم أنا إشتريت العربية وأنا مقلق بس عشان كانت المقدمة بسيطة رميت حمولي على الله وجازفت وخدتها وبعد متفقت مع الراجل إني مش حدفع أقساط شهرية وحدفعها كلها المبلغ المتبقي عند عمل توكيل بالشهر العقاري بالبيع نيجي بئه للمشكلة
رحت لمرور المعادي اللي العربية تابعة ليه وطلع موديه مكان جديد عشان أطمن من ورق العربية طبعا مرضيش حد يساعدني بالورق اللي معايه رحت بعد فترة جبت واسطة ورحت وطلبوا فلوس عشان يسمحولي بس أبص على ورق العربية بالكومبيوتر من غير ماخد نسخة رغم إن موقفي القانوني سليم وبيقولولي مفيش شهادة بيانات عشان إتحرقت ولو عايز شهادة بيانات لازم تجيب العربية تتفحص ولازم تدفع الضريبة المتأخرة من أول 2007 لغاية النهارده وبعد كده نديك شهادة بيانات طيب أنا دلوأتي محتار لأن بتاع الفحص المفتري اللي مكانو بإذن الله في النار محفوظ بيقلي لازم العربية تيجيني مفيهاش خدش عشان نعاينها قلتلو يا عم خد بصمة موتور وشاسيه عشان آخد شهادة بيانات لصاحبها عشان يعمللي توكيل بيع نهائي بيقللي لازم السيارة دايرة وماشية وأنا إحترت بعد 4 شهور لازم أودي ثمن العربية وآخد توكيل والمرور مش راضي يدي شهادة بيانات من غير مشد العربية وشد العربية لو عملتو حيكلفني كل فلوس الأقساط بتاعت الراجل فهل مفيش حلول يا أستاذنا لمشكلتي دول بتوع المرور فعلا لا أثرت فيهم ثورة ولا حاجة ورجعوا أتعس من الأول وخلاني دلوأتي الشيطان يراودني يا إما أشوف حد يعمللي شهادة بيانات بفلوس يا إما أعمل شهادة بيانات أي كلام لغاية مشد العربية وأنا راجل مليش في السكك دي فأرجو من حضرتك تلاقيلي حل لمشكلتي وهل في طريقة الراجل يعمللي توكيل بالبيع من غير وجود رخصة أو وجود شهادة بيانات هل ممكن أنقل لو الراجل كتبلي توكيل عام بممتلكاته مثلا .