لعنه الله علي الجمعيه وكريدي اجريكول
السلام عليكم ورحمه الله وبركاته
اسف علي العنوان الغير مهذب لكنه من غلبي والله..واسمحوا لي احكيلكم باختصار
اشتريت عربيه gen2 ..دفعت 20 الف واخذت قرض ب 70 الف من كريدي اجريكول..والمعرض امن لي عند الجمعيه المصريه للتامين التعاوني
العربيه عملت حادثه واتكهنت وبعد اخد ورد وسفر رايح جي من الغردقه للقاهره حوالي 10 مشاوير علي مدار عام كامل اخذت قيمه التعويض المقدر ب 76 الف علي شيكين..الاول ب 50 الف وده الحمد لله اتصرف والثاني 26 الف ..وقبل ميعاد صرفه حصل اللي اكيد حضراتكم كلكم سمعتوا عنه من انهيار الجمعيه وارتداد شيكاتها لعدم وجود رصيد ..رحت الجمعيه اخدوا الشيك المرتد واعطوني شيك جديد بتاريخ جديد علي بنك جديد ..الشيك ده ايضا ارتد لعدم وجود رصيد ..وبقاله سنه مع بنك كريدي اجريكول ..لا البنك عرف يصرفه ولا راضي يديهولي احاول اصرفه بطريقتي او ارفع بيه قضيه اضمن بيها حقي علي الاقل..
البنك اخد مني اقساط سنه كامله كل قسط 1780 جنيه واخد 50 الف جنيه الشيك الاول اللي ربنا سهل واتصرف وكان لي حساب جاري بدفع بيه شيكات خاصه بشغلي الحساب اتوقف واللي فيه اتاخد لحساب القرض
وكان لي حساب ادخار فيه 10 الاف جنيه منعوني اسحبهم ودخلوا في حساب القرض ايضا..ومن ساعتها وانا قررت ابطل احط فلوس في البنك الزباله ده ...الي ان يحلها ربنا من عنده ..ويحصلوا الشيك اللي قيمته 26 الف
الان وبعد شفط كل مليم لي عندهم ..بمعدل كل يومين يتصلوا بي ويهددوني اما الدفع او اتخاذ الاجراءات القانونيه ضدي ..وانا ردي في كل مره اللي عايزين تعملوه اعملوه
قولو لي اتصرف ازاي
|