اهلا مصطفى باشا .. معلش اعذرنى على التأخير فى الرد نظرا لظروف مرض والديا "الاثنين" ارجو الدعاء لهم بظهر الغيب....
بالنسبة لبيع عربيتى انا صرفت عليها حوالى 13 الف من ساعة ما جبتها وكل اللى اتصرف فى تجديدات شاملة على مدار سنة عشان اوصل بيها للهدف اللى حطيته فى دماغى وتبقى عربية نضيفة وركوبة مريحة وما استخسرتش فيها جنية والحمد لله كله كان فى محله وبيعت لظروف نقل السكن وماكنش معايا فلوس غير ثمن العربية ويمكن انا ذكرت ده فى اخر موضوع اليوميات "يعنى البيع لظروف قهرية مش استغناء عن عربيتى وطبعا خسرت كتير -قيمة معنوية-قبل القيمة المادية" وفى النهاية الحمد لله
وقررت اجدد واصرف بالشكل اللى شوفته ده لانى ماكنتش ناوى ابيع لانى عارف انى لو صرفت قد ثمنها 10مرات مش هاعوض اللى اتصرف ودى نقطة خليها فى بالك دايما مع اى عربية هاتشتريها ان شاء الله
اصرف زى مانت عايز لو مش ناوى تبع او تغير او تجدد لكن لو فكرت فى حاجه من الثلاثة دول يبقى ماتصرفش غير فى الاساسيات اللى تخليك تمشى بالعربية وبس عشان ماتخسرش
اما بقى لو حبيت اشترى تانى ومش معايا غير 20 الف يبقى قدامى خيارين " خيار اخضر وخيار وخلل هههههه"
الخيار الاول : لو مش ناوى ابيع خلال فترة قريبة يبقى مش هافكر غير فى ax ولو ميزانية اكتر الفين ولا ثلاثة يبقى ZX مافيش احسن من كمالياتهم الاساسية بالسعر ده 18:24 تقريبا
الخيار الثانى: اجيب حاجه ليها سوق زى الماروتى ممتازة جدا وشغالة فى السوق حلو ومناسبة جدا لجو المدينة الزحمة ---- او كيا برايد العصفورة ودى برضه حلوة "عامة انا بحب الهاتشباك قوى" وكل ده فى موديلات التسعينات ولو نزلت للتمانينات هتلاقى 127 و127توب و128 والفيات عامة لكن تنسى الكماليات ---لذلك لو عايز كماليات يبقى تفكر فى الفئات اللى قولتلك عليها على فكرة الماروتى بيركب لها تكييف برضه وكان فى عضو محترم عمل موضوع كامل عن تكييف الماروتى والانذار والسنتر والكماليات دى امرها سهل ومتوفرة
قصة المواتير دى بقى كبيرة شوية ومافيش عربية مايركبلهاش مواتير بشرط الموتور المناسب ولو مش بتاعها يبقى تركب موتور باقل التعديلات الممكنة عشان الاداء العام الصحيح ولو انى مش بفضل موضوع تعديل المواتير ده وافضل ان الموتور اللى يركب يكون مشابة للاصلى بنسبة 90% على الاقل عشان ماتلعبش فى الحوض
وعلى حد علمى "اعتقد"ان المازدا موديل تمانينات ولو فى مواتير مويل تسعينات يبقى حاجه متوافقة مع المازادا مش اكتر لكن مش زى ماحضرتك فاكر ان 323 موديل 84 مثلا ليها موتور زى اللى فيها بالظبط بس موديل 90 من باب اولى بقى انك تلاقى العربية نفسها مازدا 323 موديل 90 وده اللى ماعتقدهوش
عموما احنا مع بعض ولو جد قدامى معلومة جديدة هابقى على تواصل معاك
واعذرنى على التأخير فى الرد نظرا للظروف الحالية اللى انا فيها
دعواتك يا بطل
