بسم الله الرحمن الرحيم
ماستر الفرامل بتاع عربيتى باظ من فترة وروحت لمتخصص فرامل وقولتله نغيره قالى لا ده سليم و 100 100 المهم ركبنا طقم اصلاح واتظبطت يومين وبعدين خربت تانى روحتله تانى قالى التيل مبلط وغيرناه وروحتله بعد اسبوعين عشان يكون التيل طبع وللاسف الفرامل مش موجودة وقالى ده كوتش فى العجل اللى ورا ( بصراحة مش عارف اسمه ايه ) ولكن غيرناه وحطينا زيت باكم جديد وبجرب لقيتها ايه 100 100 بس لمدة نص ساعة وبعد كدة رجعت ريمة لعادتها القديمة زهقت طبعا المهم فى يوم ركنت العربية خالص طول اليوم ولما طلعت فى اليوم التانى وانا طالع من الجراج والحمد لله كنت لسه هطلع وبدوس فرامل ملقيتش فرامل خالص وكانى دايس دبرياج لحقت نفسى بالهاند وبعدين بجرب ادوس لقيتها داست كويس قولت الحمد لله وبعدين بدوس تانى لقيتها مفيش خالص المهم فضلت كدة مرة تصيب ومرة تخيب قمت واخد بعضى وطالع على بتاع الفرامل وقالى كده يبقى الماستر اخييييييييييييرا اعترف انه الماستر
واللى عاوز اقوله هنا انى لما سالت على الماستر لقيته فى حدود 400 جنيه طبعا الاصلى وده كان فى التوفيقية( البنا ) وفى انواع تانى ارخص بكتير لكن الفرامل مش محتاجة الرخيص خالص المهم روحت عند ابو الحسن اللى فى بين السرايات ( طبعا معروف جدا ) وقولت اجربه وكنت سمعت انه محترم جدا واسعاره 100 100 المهم لما وصلتله وبعد عناء لانى كنت ماشى بالعربية بالهاند بس وسالته على الماستر قالى رقم غريب جدا قالى ب 540 جنيه طبعا انا ذهلت
واكدت عليه تانى انت متاكد قالى طبعا وقولتله ده سعره 400 جنيه فى التوفيقية قالى هنا حاجة وهناك حاجة تانى خالص قولتله بس هو الاصلى اصلى والمضروب مضروب قالى هو ده سعرنا قولتله طيب عاوز اشوفه جاب لى العلبة بتاعته وقريت اللى مكتوب عليها وشوفت الماستر وعرفت اللى مكتوب عليه وبعدين قولتله شكرا ( طبعا ماشتريتهوش )
واخدت بعضى ومشيت ولقيت فى نفس الشارع اللى هو فيه واحد تانى بتاع قطع غيارتانى قولت اسال ومش هخسر حاجة وفعلا سالت ولقيته بيقولى الاصلى ب 390 جنيه قولت اشوفه ولما شوفته قريت اللى على العلبة هو هو نفس الكلام والماستر كمان هو هو كانها مراية المهم اشنريته طبعا.
فهل فعلا ممكن يكون كل الفرق ده مابين تاجر والتانى ولا ايه مع ان ابو الحسن ده مشهور جدا لكن الشهرة مش هتكلف كل ده علشان كدة كل واحد بيشترى حاجة يتاكد انها الاصلية ويسال عند كذا واحد من الموثوق فيهم والله المستعان
