شكرا لشريف باشا على التغطية الهايلة و الصور الرائعة و اللى دايما فيها مابيسبليش مجال كبير للكلام
و احب أشكر أيضا الاستاذ أيمن و الاستاذ احمد حبيب من توكيل مرسيدس الكويت على حفاوتهم و ذوقهم العالى و حسن استقابلهم و ضيافتهم
و نتوكل على الله و نبدأ الجولة
طبعا جولة امبارح كان ليها طابع خاص أولا لوجود اخى و صديقى العزيز شريف منسى معايا و ثانيا لأن الهدف الأساسى من الجولة دى هو محاولة الانقضاض على وحش المرسيدس الجديد SLS AMG و التى يعلم جميعكم قيمة هذه النجمة الثلاثية عندى و طبعا عند الكثير من حضراتكم و كانت اكتر حاجة خايف منها اننا مانلاقيش منها فى التوكيل .. تكون مثلا لسة الدفعة الجديدة ماوصلتش أو بتتجهز أو أى سبب من الاسباب ,, ما كنتش هاتحمل خبر زى ده بصراحة
المهم توكلنا على الله و ظبطنا مواعدينا انا و شريف باشا و عديت عليه و انطلقنا ,,, و طبعا كنت عاوز اروح مرسيدس الاول لمواجهة الشغف الأكبر و لكنه فكرنى ان كل مرة بنغلط الغلطة دى .. نروح الاول نتفرج على وحوش الالمانى و بعد كدة مفيش ولا عربية تعجبنا ....فالحمد لله تفادينا غلطة كل مرة و قررنا التوجه رأسا ألى توكيل كيا لمعاينة وحشها الجديد الكادينزا
وتعليقى على الكادينزا (برافو عليكو يا كيا موتورز) فعلا كيا عرفت تعمل عربية تلفت الانتباه بجد بدأاً من روعة التصميم و حداثته و جراته إلى جودة الخامات و كمية الكماليات الغير طبيعية و اللى ماكناش بنشوفها غير فى العربيات الفخمة و الرحابة الداخلية و الاحساس العام و قوة الموتور التى لا يستهان بها .......
يمكن الملاحظات الطفيفة اللى كانت عليها إنها دفع أمامى و هناك بعض التفاصيل الدقيقة التى لم يتم الاهتمام بها زى ما أشار شريف باشا .. المهم فعلا العربية لاقت استحسانا خصوصا بسعرها المنافس جدا فى فئتها و سعر الفل أوبشن هو 8750 دينار كويتى و هو ما يوازى 175 الف جنيه مصرى .. بس على ما تنزل مصر طبعا هتعدى جامد جدا... ربنا يرحمنا من الجمارك....
بعد الكادينزا بصينا بصة سريعة على السيراتو و السيراتو الكوبيه و انا بصراحة بحب جدا شكل السيراتو الكوبيه و خصوصا من ورا ... و هازود بس على كلام شريف باشا حاجة بسيطة .. ان فعلا الدفعات الجديدة اتحسنت كتير من ناحية جودة الخامات الداخلية .... و انا شخصيا عجبتى العربية جدا و بهرتنى المساحات الخلفية المتاحة و اللى تفرق معايا كتير جدا فى العربية و هى فى السيراتو بصراحة تتفوق على الكثير من السيارات فى نفس الفئة و خرجنا من كيا مبسوطين جدا لأول مرة من فترة طويلة ....
بس شريف بقى أصر يصر إلحاحا اننا نروح نشوف اللانسر علشان يقارن بينها و بين السيراتو .. و قلنا نتوكل على الله
و فى الطريق عدينا على توكيل بيجو و مازدا علشان نبص بصة فى السريع و إذا بنا نفاجأ بوجود 308CC ماسة التاج الفرنسية و بومبوناية بيجو اللذيذة جدا ...
عربية اقل ما يقال عنها إنها عروسة يوم فرحها ...لابسة سواريه.. و مرصعة بتصاميم غاية فى الرقة و الشياكة و الجمال .. بجد تخطف قلبك اول ما تشوفها و طبعا قعدنا جواها و تفحصناها و تمحصناها و طبعا اتأكد رأينا و رأى العالم كله إن الفرنساوين ملوك الموضة لما يعملو عربية لازم تكون آخر موضة ...
و اتفرجنا على 308 العادية و مفيش كلام زيادة على كلام شريف باشا الا ان بصراحة العربية كانت أقل من توقعاتى.... و 3008 الجديدة اللى ماقدش احكم عليها الا ما يعرضوها رسميا بس هى فعلا المميز فيها انها 1600 سى سى مع تيربو .. و كروس اوفر .. يعنى فى مصر لو سعرها معقول هتبقى ممتازة جدا جدا
و بالنسبة للمازدا 3 الجديدة برده مفيش كلام زيادة عن كلام شريف باشا .. لألنى بصراحة مش مهتم قوى بمازدا و خصوصا بعد إعلان كولجيت اللى عاملينه فى شبكة العربية ....فعلا .. ابتسامة بلهاء
ثم توجهنا الى توكيل ميتسوبيشى لمقارنة اللانسر بالسيراتو .. و بصراحة لو انا بختار بين الاتنين .... هختار السيراتو من حيث الشكل و الاوبشنز و الرحابة ... أما الاعتمادية فلن تتأكد الا بعد كام سنة كام قال شريف باشا
ثم انطلقنا الى توكيل هيونداى لمقارنة وحشهم الجينسس بوحش كيا الجديد و شريف باشا برده جاب المفيد كله ....
و اخيرا توجهنا إلى وجهتنا الحقيقة .. حلم الأحلام ووهم الأوهام (مرسيدس ) النجمة الثلاثية المتربعة بجدارة على عرش السيارات الفخمة و كنا على موعد لمقابلة أحد تحفها الفنية و الهندسية العائدة إلى الحياة و هو الوحش المجنح بأجنحة النورس الذى كان فى سبات عميق لمدة عقود طويلة ... ها هو قد استفاق ثانية و تحرك من مرقده الذى كان طويلا و لكنه لم يكن نهائيا و لبس ثوبه الجديد ووضع فى أحشائه أكسير القوة المتمثل فى أحد أقوى المحركات الرياضية الألمانية من AMG و الذى يجعله بضغطة زر يزأر كملك الغابة و يوقظ أحصنته ال 570 مستعدا للإنطلاق باقصى قوة و التفوق على كبار و عظماء صناعة السيارات على كوكب الأرض ,,,
إنها مرسيدس SLS AMG
عندما تقع عليها عينك للمرة الأولى لا تستطيع تحريك رأسك إلى وجهة أخرى و ينتابك شعور .. لا لا ليس شعورا واحدا إنها كمية من المشاعر الفياضة فتشعر كأنك تريد الضحك و البكاء فى نفس الوقت وتتمنى لو أتيحت لك الفرصة و احتواك الوحش المروض داخله و سمح لك بفك جماحه و الانطلاق كتنين مجنح مختفيا عن جميع الأنظار ... و تشعر ايضا بأنك فى قمة السعادة كطفل صغير يتلقى هداياه فى عيد مولده ... لا يمكنك سوى اللف حول انحاء السيارة لرؤيتها من جميع الزوايا و الجهات و امتاع و إثراء حاسة النظر التى من الله بها عليك بواحدة من أجمل ما خلق من آلات السرعة
إنها مرسيدس SLS AMG
و بعد مرور الدقائق الأولى و بعد أن تستفيق من لحظات اللقاء و تتأكد انك لست تحلم و تبدأ أن ترى بعض التفاصيل التى لم تكن واضحة من كثرة الانبهار بالجمال الكلى و تتعرف على التقنيات الهندسية المتمثله فى كل جزء من السيارة من أصغر مسمار بها حتى التصميم ككل .. تتمنى من كل قلبك أن تمتلكها و تعاملها كما تستحق .. كتحفة فنية هندسية رائعة
و لكن ما باليد حيلة و يكفى الاستمتاع بزياراتها المتعددة و وصف شعورك لأخوتك و أصدقاءك فى منتداك المفضل
و عسى ان ياتى اليوم و تقدر على امتلاكها و التمتع بكل ما فيها من رصانة و قوة و توحش فى نفس الوقت
و إلى اللقاء فى جولات أخرى إن شاء الله