المشاركة الأصلية كتبت بواسطة Aymansabry
السلام عليكم يا جماعه
انا الحقيقه اشتريت سوبر تشارجر كهربائى من امريكا وهو عبارة عن مروحه قويه معدن بتركب فى فلتر رياضى و بتتوصل مكان فلتر الهواء بتاع العربيه .... فكرته انه بيشتغل على البطاريه لما تدوس على المفتاح بتاعه.... و يكبس كميه هواء للمحرك قيسزيد نسبه احترلق الوقود داخل السلندر مما يزيد من قوة الموتور.
طبعا دى النظريه المكتوبه على العلبه... يعنى اللى بتسوقها الشركات ليه واللى بتقول برضه انه ممكن يزود القدرة الحصانيه ل ثلاتين حصان.
طيب انا قراءت الاتى لانى عملت بحث عليه على النت:
1 - فيه اراء بتقول ان قوه الهواء الداخل الى الموتور و المسحوب نتيجه الاحتراق بيكون اقوى من المروحه فبالتالى ملهاش اى لازمه ... و الراى دا من منتديات مواتير فى امريكا.... و هما بيهاجموا الشركات اللى بتنتجه و بتقول عليه انهم نصابين.
2. طب قراءت راى اخر بيقول انه حيكون فعال على السرعات البطيئه ..اما لما تكون العربيه ماشيه على 150 كم مثلا فكمية سحب الهواء من الموتور حيكون اكبر بكتير و بالتالى هو ممكن اصلا يكون عائق... ولو انى معتقدش لانه متوصل بفلتر رياضى زى ما قلت و المروحه كده كده بتلف.
3. فيه راى كمان بيقولك ان مصدر الكهرباء من بطاريه العربيه الى بتشغيل المروحه مش حتكون كفايه و بالتالى قالو لازم يتعمل بطاريه تانيه قويه و تكون مصدر للطاقه ليه!!!
عموما كلها نظريات ... واسأل مجرب ولا تسأل طبيب.... وانا شخصيا بفكر اركبه على الكروز الاتوماتيك عندى بس خايف من كذا حاجه و عايز استشيركو هنا فيها الاخوة الافاضل:
اولا: هل تركيبه سيرفع استهلاك البنزين؟
ثانيا: هل سيكون له صوت عالى ولا حيكون زى الفلتر السبور ؟ ( انا مش عايز دوشه من الموتور على فكرة... احب ازود السحب و على قدر الامكان اكتم الصوت)
ثالثا هل ممكن يبوظ الضفيرة و كهربه العربيه؟ علما بانه سيتم التوصيل مباشرة للبطاريه.
رابعا: تفتكروا ممكن يزود قدرة اد ايه فى القدرة الحصانيه؟ انا يكفينى ازود بس فى الكام نقله الاولانيين ..لان الكروز ما شاء الله بتوصل لل 200 عادى.... لكن طلعتها الاولانيه هىاللى ممكن تكون بطيئه نوعا.
خامسا: اذا كان حد ركبه و شاف فعلا انه عامل فرق فى السحب ياريت يقولنا عن المكان اللى ركبه فيه او اى حد تانى ممكن بيكون بيفهم كويس فى الحاجات دى.... واسف للاطاله و اتمنى اكون برضه اضفت شويه معلومات عنه مما قرءت على النت.
|
ادخل اقراء موضوعى عن التربو شارجر الكهربى و تجربة تصنيعه و تركيبه
1- بخصوص المنتج الامريكى لا انصحك به لأن مروحته ثقيلة جدا على الموتور و ده بيضعف ادائه اساسا
2-فى حاجه اسمها معدل تدفق الهواء دلوقت عربيتك ليها معدل تدفق هواء قياسى بتتعامل بيه
عشان تفهم العربية ان فيه معدل اعلى متدفق عليها و تخرج بنزين و شرارة مناسبة للمعدل ده لازم كمبيوتر العربية يفهم ده و عشان يفهم ده لازم يكون فى حاجه اسمها ماس فلو سينسور عشان يقراء معدل تدفق الهواء و يفهم الموتور
3- التربو نفسه بيخرج هواء بكميات معينة فى تربو بيخرج 1.5 متر مكعب للثانية و فى تربو بيخرج 2 متر و فى تربو بيخرج 6 متر و فى تربو بيخرج 8 متر مكعب للثانية
و طبعا اختيارك للتربو يعتمد على نوع الموتور و كمية الهواء اللى هتناسبه
4- تركيب التربو بدون العمة يعتبر عملية انتحارية على المدى البعيد الصح بقى انك تجيب العمة و تعالج الجوان بتاعها و تسد الفتحة الثانوية و تخلى العمة بروح واحده تربط عليها خرطوم مريح للتربو و تربط بينهم السينسور اللى قولتلك عليه و بعدين العمة بقى هى اللى تغذى الموتور
5-الصوت اللى عالى ده حسب نوع الموتور بتاعه و حسب فلتر الهواء
6- المفروض فى كل الاحوال التربو ميخقنش الموتور ابدا
7- مينفعش تشغل التربو الكهربة عمال على بطال التربو الكهربة بيشتغل عند الضرورة و الا هياكل البطارية و يهلك الموتور بادرى
8- كفائة النظام من فشلة تعتمد على قدرته فى انتاج الهواء و توظيف القدرة دية صح
اتمنى اكون فدت فى شئ