المشاركة الأصلية كتبت بواسطة sayed2077
اولا ربنا يخليك يا باشا على مجاملتك وان شاء الله هنبقى اصدقاء
ثانيا
مشكلتك اللى فاهمه ان العربيه بتتهز بعد سرعة 120
وبعد ما ظبط عفشه بقت بتحدف شمال مظبوط
فا احنا دلوقت اللى هنعمله اننا هنفحص اكثر من شىء ممكن يكون هو الى صادر منه العيب ده
1:ال128 عموما لو فيها مسمار مش مظبوط عمر ما هتبقى مظبوطه فى الجرى حتى لو ظبط وررصصت
2:لازم تروح لعفشجى الاول يكون معرفه او حد من معارفك يكون عارفه ومتعامل معاه يكشفلك على العفشه حته حته ومسمار مسمار ومتقلش ان كل العفشه عند سليمه اكيد فيه حاجه كده ولا كده عمرها الافتراضى انتهى وهتشوف لو لقيت عيب فعلا يبقى خلاص فورجت واطلع جرب العربيه طيب لو العيب متحلش اولو لقينا حاجه بايظة وبعد ما روحنا ظبطنا العيب اللى كان موجود وظبطنا زوايا برضوا العيب متحلش هنخش على الخطوة رقم 3 وكده يبقى احنا اتأكدنا من العفشه ان كله سليم
3:هتروح لسمكرى امين ويكون ذو خبرة ولازم تكون عارفه او حد من معارفك يدلك عليه هتروح للسمكرى ده يكشفلك على الحوض بتاع العربيه ويشوف الدنيا فيها ايه ممكن يلاقى شروخ او الشاسيه قافل حته صغيرة او فاتح حته صغيرة او فيه حاجه مش مظبوطه فلو فيه حاجه مش مظبوطه خليه يعملهالك ويرجعها لمقاستها المظبوطه تانى وتطلع تجرب العربيه لو العيب اتعمل يبقى خير وبركه متعملتش يبقى ندخل على الخطوة رقم 4 وطبعا كده يبقى عفشه وسمكرة تمام
4: هتروح لميكانيكى يكشفلك على الشدادات كلها و القواعد كلها والقناطير كلها القناطير مفردها قنطرة ويكشفلك بقى وديه مهمه جدا على عارف الحديده اللى ماسكه فى الكوبلن والفتيس اللى اسمها عمود الكردان العمود ده لو فيه نسبة انحناء ولو بسيطه اوووى ممكن تسبب الرعشه اللى انت بتقول عليها ديه وتخليه يكشفلك على بلى العجل وان كله تمام تمام وتشوف بقى لو كان فيه عيب واتعمل والمشكله اتحلت يبقى خير وبركه ولو ماكنش فيه عيب او حلينا المشكله اللى كانت موجوده وبرده العيب موجود يبقى ندخل على الخطوة رقم 5
5:لو احنا عملنا كل اللى فات ومفيش حاجه اتحلت يبقى فيه حاجه غلط اساسا وديه مش هنعرفها غير لما نرفع العربيه ونشوف هل العربيه مغيرة نص ولا ربع او ملحومه فى اى مكان لان فعلا مش هيبقى فاضل غير كده خلاص
ولو متطلعش فيه حاجه يبقى نخش على الخطوة رقم 6
6:حضرتك تتصل بيا وتقولى عملت ايه فى كل اللى فات ده خطوه خطوة واهم حاجه تروح لكل واحد يبقى متخصص فى شغله يعنى متروحش لميكانيكى وتقوله شفلنا فيه ايه فى العفشه فعلا مبيبقاش عندهم الاحساس بالمشكال زى بعض بمعنى عمرى ما الميكنيكى يفهم فى شغل العفشه او السمكرة حتى لو كان شغال فيهم والعكس صحيح
وياريت حضرتك تعمل كل خطوة وتتصل بيا تقولى عملت ايه ورقمى 01007490168
و حضرتك ممكن يكون فاضل اخر احتمال وهو ان كل حاجه سليمة 100% بس ان بعد سرعة 120 العربيه بتخف عن الارض جامد فبيبقى الثبات مش كويس وعموما نصيحتى لييك كفايه عليك لغاية سرعة 100 وكده حلو ااوى لان العربيه تحت سرعة ال 100 بتبقى تحت السيطرة غير كده بتبقى انت وظروفك وعلى فكرة بلاش تصرف جامد اووى فى العربيه ديه لانك لو لاقيت عيب وحليته مش هيفضل على طول محلول لا هيبوظ تانى وتصرف تانى فبلاش تصرف على العربيه ديه خصوصا لو فى حكاية ثبات وانا كل الى قولته ده اكثر الاشياء اللى اتوقعها والله اعلى واعلم |
حبيب قلبي أنا بشكرك جدا علي خبرتك الجامده ديه خصوصا في الفيات 128 وأن شاء الله أحنا أخوات وأصحاب لان معرفه الناس كنوز
بسم الله الرحمن الرحيم
" وَجَعَلْنَاكُمْ شُعُوبًا وَقَبَائِلَ لِتَعَارَفُوا "
صدق الله العظيم
أحب أبتدي كلامي بذكر الله وبعدين أوضح إلي أنا عملته !
أنا عملت كل إلي يخطر علي بالك من الخطوات إلي فاتت لدرجة أني بجيب المسمار أصلي من أنصاص عربيات سليمة و وكمان قطع الغيار الأكثر ألماني ويليها الإيطالي
طبعا يايات سبورت مع مساعدين منرو و طقم طنابير كامل إيطالي يعني عفشة 100% جرند نيو ومتقفله علي مزاج مزاجك . بالنسبه للمكنه أنا معايا مكنه 1300 مش هقول غير أني لما بشغلها الميه بتنزل منها زي المكن الحديث بالظبط . أما بالنسبه للشاسيه عربيه إستيراد زيرو من الداخل و أنا إلي راششها نظافه من الخارج ومش أي رش بمعني أني رشيت وبعدين سحقت وبعدين لمعت وبعدين سحقت تاني وبعدين رشيت تاني كمان وبعد كده سحقت وفي النهايه لمعت عشان البويا مش تطفي نهائيا من العربيه . طبعا أنا ساكن في منطقه تعتبر زي الحرفيين أسمها عزبه عبد اللطيف علي طريق الزرقيه في الزقازيق وده خلاني أكون معارف من الصنيعيه التوب في الزقازيق كلها وكمان شفها حوالي 7 صنيعيه متخصصين في السمكره والحمد لله كلو أعجب بيها لدرجه أني أتحطلي فيها 28 ألف وأنا لحد دلوقتي مش راضي . مجهودي فيها كبير قوي قوي ويمكن مش بشوف بيتي بسبب العربية ديه .
كمان بالنسبه للثبات ، أنا مركب طقم جنط 14 بكاوتش سرعات زيرو ومهبط العربية من قدام ومن وراء وكمان مركب صدادات مرسيدس أصلي لقدام ووراء عشان الصدادات ديه بتشتغل شغل المساعد التاني لان طبعا المرسيدس في السرعات بتنزل لمستوي أقل من إلي هيا عليه وهيا واقفة وبيكون المساعد تقريبا شبه مضغون فبالتالي بتحتاج حاجه تشتغل شغل المساعد في السرعات عشان مش تحس بالمطبات وطبعا عشان لو أي حد عايز يعرف سعر الصدادتين الأصلي هما 90 ج وفي منها 40ج النوع الضعيف منها وأنا بنصح إلي يجيب يجيب إلي سعرها 40ج لان طبعا 128 غير المرسيدس في التقل في السرعات .
تعني أنا الحمد لله مخلي العربية مجهزه للسفر لاي مكان . والحاجه التانية أنا مركب شدادين تحت العربية وشداد بين البطحتين عشان علب الشاسية مش تفتح في السرعات وبالتالي أحافظ علي العربية في السرعات وعشان كمان تقل الزبزبه إذا لاقدر الله وجد شروخ في الشاسيه .
وأخيرا أنا بعد مجهود عرفت أني الترصيص إلي أنا عملته كان ولا ليه ريحة اللازمه وده طبعا لاني رصرصت وبعدين غيرت الطنابير الأماميه وغيرت كبالن أماميه برده وده كله السبب في المشكله إلي كنت أنا فيها فكان المفروض الحل ليها أني أرصرص تاني وكمان أظبط زوايا والسبب >>>>>>>>>>> لان الطنابير القديمة كان فيها ريجه وريجه معناها وجود علو ووطي وأنعواج بسبب غسل الجنط وهو ساخن وده بيأدي إلي تلف الطنبوره وطبعا ممكن واحد يقولي مهو ممكن نخرطها أو نمسحها عند الخراط وأنا برد عليه وبقوله ده غلط 100% لأن الهزه عمرها مهتروح لأن الخراط نسبة نجاحه فيها لا تتعدي ال 70% يعني فعلا هوا بيمسحها ولاكن بيكون فيها 30% إهلاك والإهلاك ده بيكون بسبب وجود ملي أو 2 ملي ساعه المسح أو الخراطه وال 1مم ده في السرعات بيكون 10مم أهتزاز وده طبعا خطر جدا لانه بيهز العربيه كلها وبيأثر علي القواعد والكبالن والبطاحات والشاسيه وده أخطر حاجه لما يكون معاك عربيه جديده أو لسه خارجه من تجديد . فأنا بنصح أي صاحب عربية 128 أنو يهتم بيها بجد لان العربية ديه لما بتكون جديده فعلا بتكون أجمل من الحديث أكثر أمان . وده ممكن يكون لاني صاحب عربيه 128 وحاسس أنها أحسن عربيه في الدنيا ولكن بجد بيت المهمل يخرب قبل بيت الالم علي رأي المثل بمعني أن الأهمال بيسبب في خسارة المال والندم ولكن الأهتمام بالشيئ بيضمن سلامتك وسلامة إلي معاك ولكن بالمعقول .
وأنا بشكرك جدا جدا جدا يا سيد بجد علي أهتمامك ووأن شاء الله أنا هعرض كل حاجه أنا بعملها وهحاول أتابع عشان لو في حل أتعمل فعلي مني وأنفع بيه أي صديق من أصدقائنا إلي في المنتدي هنا والله الموفق ،،،