عرض مشاركة واحدة
  #1  
قديم 20-04-2014, 03:24 AM
الصورة الرمزية sayed2077
sayed2077 sayed2077 غير متواجد حالياً

من انا؟: انا مش فارس ولا فتى احلام انا زحمة وربكه وشغل جنان
التخصص العملى: طالب هندسة قسم اتصالات
هواياتي: الكمبيوتر و السيارات
 
تاريخ التسجيل: Jul 2011
الموقع: القاهرة
المشاركات: 1,405
sayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond repute
مميز تجربتى الجديده فى تحويل الاكسيل الى فول اوبشن مفيده (كيف تحول الهيونداى اكسيل الى فول اوبشن )حصريا على مصر موتورز


السلام عليكم ورحمة الله وبركاته

اولا :اعتذر عن الغياب الطويل بسبب ظروف الدراسه

ثانيا نخش فى الموضوع :D )

بعد امتلاكى للاكسيل على مدى حوالى عامين بصراحه زاد حبى ليها جداااا وكانها بقت صديقتى او بمعنى اخر (الجو بتاعى )
وبعد تعب ومعاناه فى محاوله اصلاح ما افسده الملاك السابقون بعد تعمير ماتور وتغير عفشه بالكامل و تغير التكيف وتحويله الى تكيف يبانى جديد بالكامل
وتظبيط كل اساسيات السيارة حان الوقت للاهتمام بالرفاهيات الموجوده فى السيارة

وتحويلها من اكسيل بلا اى اوبشن الى اكسيل فول اوبشن

طيب طبعا عارفين ان الاكسيل بتنقسم الى نوعين

نوع بدون اى اوبشن نهائى وديه بتاخد فئه كبيره من الاكسيل كل الاكسيل الهاتش باك زى حالاتى وكل الاكسيل السيدان ال 1300 سى سى

و

نوع فول اوبشن وده الموجود فى اغلب الاكسيل السيدان ال 1500 سى سى وده اللى عاوزين نحول عربياتنا ليه علشان ننعم بقدر الرفاهيه الموجوده فى الفول اوبشن

طيب ما هى امكانيات الفول اوبشن فى الاكسيل بالظبط

1:تكيف
2:اربعه زجاج كهربا
3:الكنصوله الكامله الموجود فيها زراير التحكم فى الزجاج الكهربى الخلفى والامامى
4:فتح الشنطه بالكهربا بزرار فى التابلوه
5:باور
6:فتح تانك البنزين من جنب السواق
7:عدادات الطابلوه موجود بها عداد قياس لفات الموتور

واعتقد ده اغلب مواصفات اللى بتنزل فى الفول اوبشن فى الاكسيل

طيب يا عم سيد احنا عرفنا المواصفات او احنا كدا كدا عرفنها بس منعرفش ازاى نحول عربياتنا الى فول اوبشن اقولكم

احنا هنمشيها واحده واحده

تنبيه هام : التعديلات بتاعت الرفاهيه بتبقى مكلفه جدااا خصوصا انك بتعملها لراحتك انت وتكون مظبط حياتك ومش لازم تعمل كله مره واحده اعملها حاجه حاجه كل شويه اعمل حاجه

اولا : التكيف
بالنسبه للتكيف فاغلب الاكسيل بينزل معاها تكيف ولكن تصميم الدائرة بتاعته تصميم عتيق ليس له فائده فى هذه الايام خصوصا مع تصميمات دورات التكيف التى تعمل بفريون 134 الصديق للبيئه وليس بفريون 12 المضر جداااا لطبقة الاوزون وبعيدا عن حماية البيئه فتكيف الاكسيل اللى بينزل معاها كان كل فلتر الفريون اللى فيها عباره عن صباع من البلاستيك والقماش ليس له فائده وكل شويه يتسد ويبوظلك الكباس طيب على ايه كل ده

افضل حل فى التكيف هو التغير بتكيف جديد يبانى بنفس تصميم دوائر التكيف الموجوده فى الفيرنا واللانوس وكل السيارات الحديثه
وطبعا انا اللى حولى التكيف بتاعى كان الاسطى
احمد حنفى محفوظ بالمعادى طبعا غنى عن التعريف ويكفى تشوف مواضيعه اللى فى منتدى التكيف
وطبعا التكلفه لو هتركب جديد نوفى كل حاجه هيكلفك 3500 جنيه

اما لو هتعمل تعديلات على التلاجه لو حالتها كويسه وتجيب كباس اكسنت استيراد وتغير السربانتينه وفلتر الفريون هتجيبهم جداد هيكلفك بتركيب بتعديل بكل حاجه حوالى 2000-2200

ثانيا: الزجاج الكهربائى للاربع ابواب

نصيحتى فى تحويل الزجاج الكهربائى تروح لبتاع ابواب نضيف يحولك الاربع ابواب لكهربا على طول كل اللى هيعمله هيشيل الدراع اليدوى ويحط بدلا منه ماتور فقط لا غير بس الدراعات المتحركه وكل الكلام ده سيبه بتاع العربيه الاصلى واوعى تجيب مكن زجاج يبانى يتجيب بتاعها يبلاش تحول العربيه اصلا هيقرفك عن تجربه خصوصا يمكن المكن بتاع الزجاج بتاعها ارخص وافضل من المكن اليبانى وتعديل ووجع دماغ

والموضوع هيتكلف حوالى 600-800 جنيه

ثالثا : الكنصوله الكامله بتاعت الفول اوبشن وزراير التحكم بالزجاج الكهربائى

طبعا لما تركب مكن الزجاج للاربع ابواب هتلاقى عندك مشكله وهى انك مش عارف ترفع او تنزل الزجاج ازاى لو فكرت تعدل فى الكنصوله بتاعت الاكسيل الفاضيه اللى من وجهة نظرى ليس لها اى قيمه او لازمه (ملهاش عازه اصلا :D )
هتلاقى المنظر بقى مشوه اكتر ما هو مشوه اصلا
طيب نعمل ايه ؟؟؟؟؟ حلك الوحيد تشترى الكنصوله بتاعت الاكسيل الفول اوبشن بالزراير بتاعتها وتخلى الكهربائى بتاعك يوصلك المكن الكهربا عليها وكدا هتلاقى عربيتك اتغيرت تغير جذرى وبقت بنت ناس بعيدا عن الكنصوله القديمه سيئة الشكل وعديمة الفائده

طبعا قدامك حل من اتنين
الاول
تلاقى الكنصوله كامله استيراد بالزراير بتاعتها وده حاليا صعب جدااااا
ولو لقيتها هتلاقى سعرها فى حدود 300 جنيه

او

هتلاقى الكنصوله كامله بس بدون زراير الزجاج وديه نسبه انك تلاقيها اعلى وهتلاقى سعرها فى حدود 150 جنيه

وطبعا ساعتها هتروح تجيب الزراير جديده من التوفيقيه
هتلاقى الكانصوله بتشيل مجموعتين زراير
الاول اسمه مجموعه رباعى بتبقى جنب السواق وبيتحكم منها فى الاربع ابواب
وده ثمنه جديد اصلى 200 جنيه و ملقيتش منه صينى او اى منشا اخرى غير الاصلى

والثانى اللى بيكون فى اخر الكنصوله وبيكون زرار ثنائى
وبيكون للناس اللى قاعده ورا يتحكموا فى الزجاج بتاعهم الخلفى وده برضوا هتلاقيه فى التوفيقيه جديد اصلى بحوالى 100 جنيه

رابعا : فتح الشنطه كهربا

طبعا اغلب ملاك الاكسيل غير الكامله بيعانوا انهم علشان يفتحوا شنطة العربيه لازم يبطل الماتور وينزل يفتح الشنطه وبعدين يرجع يدور الماتور تانى (طبعا ده كدا كسل الكسل بس الكسل مفيد للصحه برضوا هههههههههههه )
طبعا علشان تعمل الكلام ده
هتحتاج الاتى
1:زرار فتح الشنطه وده هتجيبه استيراد فى حدود 40 جنيه
2:هتروح لبتاع ابواب محترم هيجبلك ماكينة فتح الشنطه وهعملك كل حاجه والشغل كله بالمصنعيه بكل حاجه هيكلفك 80 جنيه

يعنى علشان تحول الشنطه تفتح كهربا هيكلفك كله على بعضه حوالى 120 جنيه

خامسا : تحويل الدركسيون الى باور

طبعا مين فينا متعبش من لف دركسيون الاكسيل العاده وبيحلم كل يوم انه الدركسيون بتاعه يلفه بصباع ايده الصغير وينسى ايام التعب والاحتياج الى حد جانبك يساعدك تجيب الدركسيون يمين وشمال ويشد معاك
متقلقش كل ده ينفع بدون مشاكل
بس هتحتاج الاتى
1:طرمبة باور هتجيبها استيراد سعرها 250-300
2:خزان زيت الباور استيراد سعره حوالى 80-100
3:علبة الدركسيون الباور استيراد سعرها حوالى 300-350
5:قاعده طرمبة الباوراستيراد بتركب على الماتور بحوالى 100
6:طمبورة سير الباور استيراد بتركب على طرمبة المياه سعرها حوالى 40
7:خرطوم الضغط وده تجيبه استيراد او جديد وسعره استيراد حوالى 100
8:باقى خرطيم الباور بس بتبقى عاديه مش ضغط وممكن الخرطومين يكلفوك 50-100
9:وطبعا زيت باور لازم تجيب زيت باور موبيل ب 60 جنيه اللتر واوعى تجيب الزيت ابو 10 و 20 و 30 جنيه والكلام الفاضى ده لانك بتدمر طرمبة الباور بتاعتك

وعيش يا معلم مع الباور وانسى التقل اللى كان الدركسيون بتاعك كان فيه

سادسا :فتح باب البنزين من جنب كرسى السواق

طبعا ديه بالنسبه ليا انا عملالى مشكله لانى لازم كل مره افول انزل افتح انا باب البنزين بنفسى لانه ليه طريقة فتح وغلق خاصه بيه وشويه ويضيع المقتاح وشوية والكالون يتكسر طيب تعمل ايه

حلك فى الموضوع ده تنزل تجيب باب و طقم الفتح بالسلك بتاعه كله جديد بالتوفيقيه ومش هيكلفك كله على بعضه 100 جيه وتروح لبتاع ابواب محترم برضوا هههههههههههههه يركبهم ليك ويعمل اى تعديلات لازمه

سابعا : العدادات اللى فيها عداد قياس عدد لفات الماتور

طبعا بالنسبه ليا انا فالعداد اللى فيه قياس سرعه لفات الماتور مهم جدااا لانك من خلاله هتقدر تظبط سلانسيه عربيتك بسهوله تعرف انت سايق على سرعه ماتور كام وامتر تنقل الغيارات صح بدون ما تحرق على الماتور والكلام ده كله

طبعا العداد ده هتجيبه استيراد بحوالى 200-250 جنيه
ةتخلى كهربائى محترم برضوا يركبهولك ولازم كهربائى محترف لانه بيحتاج تقسيم مش تركيب وخلاص ومتنساش تجيبه بالفيش بتاعته علشان متغلبش معاه

ونصيحه علشان تعدل فاعرف انك هتصرف فلوس جامده وعلشان هتصرف فلوس جامده فلازم يأما تروح لصنايعى محترم يعملك شغلك صح علشان لو روحت لواحد اى كلام ممكن يبزظلك حاجتك اللى مكلفاك انت اولى بيها من واحد تانى مبيفهمش فى شغله حاجه وبوظهالك

ومره اخرى نظرا لان كثير من الساده الاعضاء بيسئلونى مين افضل ناس نتعامل معاهم فى عربياتنا ان شاء الله القايمه كالاتى

كهربا وتكيف
طبعا الغنى عن التعريف
الاسطى : احمد حنفى محفوظ
تليفون:01065020100
العنوان : شارع التعاون بجوار مكتب صحة المعادى قريبا من ميدان سوارس وشارع 77 ونادى المعادى وقريبا من مترو المعادى

ميكانيكا
الاسطى :محمود حامد
تليفون: 01096700145
العنوان نفس عنوان الاسطى احمد حنفى بس الشارع اللى وراه على طول وممكن الاسطى احمد خنفى يوصفهولك او اتصل برقمه يوصفلك الطريق اكثر

عفشه
طبعا فى العفشه فلا منافس مع الاسطورة بمعنى الكلمه
الاسطى :محدحت الباشا
تليفون : 01001514998
العنوان منيل شيحه على الطريق الرئيسى اسئل اى ميكانيكى على الطريق فين مركز مدحت الباشا للعفشه و الف مين هيدلك عليه بس اهم حاجه تروح بدرى من الساعه 9 الصبح علشان تلحق مكان علشان متستناش كتير لانه المركز بيشيل حوالى 20 سياره فقط لا غير وهتروح تلاقى طابور اطول من طابور البنزين وناس هتلاقيها واقفه من الفجر اقف فى الطابور ده

ابواب و كالون وتعديل كل ما يوجد به باب فى السيارة

الرجل الاكثر من رائع وادعوا له بالشفاء
الاسطى :محمد كالون
العنوان :حدائق المعادى شارع حسنين دوسقى امام سايبر ماتريكس (ممكن لو روحت عند الاسطى احمد حنفى هو هيوصفلك طريقه لانه وراه بشارعين بالظبط )


وارجوا منكم الدعاء الى الله عز وجل لى بان يبارك لى ويرزقنى رزقا حلال وان يرزقنى الزوجه الصالحه والذريه الصالحه

والدعاء: بالمغفره لاموات واحياء المسلمين والمؤمنين

اللهم اغفر للمسلمين والمسلمات والمؤمنين والمؤمنات الاحياء منهم والاموات اللهم امين

و

السلام عليكم ورحمة الله وبركاته

__________________

جروب رابطه هيونداى اكسيل على
Facebook
اضغط هنا
-------------------------
للبيع قطع غيار السيارة هيونداى اكسيل
وكل السيارات الكورى
اضغط هنا
--------------------------
سبحان الله وبحمده سبحان الله العظيم
اللهم اغفر للمؤمنين والمؤمنات والمسلمين والمسلمات الاحياء منهم والاموات

سيد عصام
رد مع اقتباس