[Eng/salwa]

المشاركة الأصلية كتبت بواسطة ezzat2002mo كلام غير واضح يعنى هل تحملى حضرتك الانهيار السائد مثلا فى النظام الصحى للاخوان وللرئيس مرسى وده كلام غير منطقى لان حتى لو مين ورث البلاوى ديه مستحيل يقدر يصلح القديم وينظر فى الجديد وده فى غمضه عين ومع احترامى الشديد لشخص حضرتك دى نظرة قاصرة جدا لفئه قليلة جدا من الناس لان افراد كثيرون ومنهم ناس مستواهم بسيط جدا يرون ان المرحله دقيقه ومحتاجه صبر وتحمل ومش كفايو كده ده فيه ناس مش عاوزينه يشتغل وينجح وطبعا الكلام فى الموضوع ده محتاج بصراحه ساعات ربنا يقدم اللى فيه الخير والاخوان نحسبهم على خير واذا بينت الايام غير ذلك اذا فقد اخذنا درسا عنهم ولن يتم اختيارهم مرة اخرى ودى الديمقراطيه مش انتخب رئيس ويطلع شوية يقول انا مش معترف بيه هوة فيه رئيس بيوافق عليه 100 فى ال 100 الا مبارك ولو هنقول النسبه مش عارف 52 % اقول بصوا لانتخابات فرنسا الاخيرة بس اقول ايه حسبى الله ونعم الوكيل فى الاعلام

أعتقد يا فندم إن كلامى واضح جدا أنا لا أحمل الانهيار فى الصحة لمرسى ولا لمبارك ولا للاخوان علشان لا أوجع دماغى مع أحد فى جدال وسفسطة ودفاع وهجوم بيننا
وانا قلت دى مجرد فضفضة ولا كمان اتكتم واطق واموت
انا اساسا لا احب الجدال ولا اجيده واعتقد انى ناديت بعمل رابطة البعد عن الجدال والسفسطة قبل كده
وكل واحد منكم حر يقول رأيه بمزاجه يهاجم او يحب الاخوان وزمنهم هو حر طلما النقاش محترم وبدون تجاوز اهلا وسهلا
واظن ان أسلوبى يعلمه الجميع
حضرتك بتقول ان المرحلة دقيقة ومحتاجة صبر
حاضر المرة الجاية لو جت لى جلطة هبقى أقولها أصبرى شوية على البلد (الصبر جميل ) و (الصبر مفتاح الفرج)
ومش هقول للى بيلومونى وانى مش صبورة لما تمروا بظروف زى اللى بمر بيها الايام دى ( بعد الشر عليكم كلكم) مش هيكون ده الرد

المشاركة الأصلية كتبت بواسطة احمد سويلم أختى الفاضله يعلم الجميع او لايعلم أننى لست اخوانجيا ولكن الانصاف ياناس الرجل استلم الدوله من وراء حرامى ولم يتسلمها من وراء عمر بن عبد العزيز رضى الله عنه لاتعطنى احساس ان حضرتك دبلوم تجاره لانك تقولى اللى قالوا نعم ع الدستور ايه رأيهم دلوقتى فلنفرض ان نتيجه الاستفتاء ع الدستور خرجت ب لا كانت ستجرى انتخابات ع اعضاء اللجنه التاسيسيه وحينئذ سيكتسحها الاسلاميون من جديد ونلعب هذه اللعبه من جديد انا هنا لا ادافع عن مرسى او عن دستور رقيع لم يذكر فيه اسم الله عزوجل ولكن من أجل أن تسير الامور ف مصر المسكينه ويستطيع الرجل ف أن يقبض سيطرته ع البلد حتى يستطيع استعاده الاموال المنهوبه بأقصى سرعه ولذك خرج أناس يردحون ع الشاشات من أجل تعويق الدستور من أجل تعطيل المشروع الاسلامى لانه اذا سارت البلد ووقفت ع قدميها سيلقى مرسى بهم ف المزابل و السجون بالقانون

أنا مش هرد غير على جملتك دى بس لى
أنا يا فندم والله بكالوريوس هندسة
وعاملة دبلومات دراسات عليا من مصر وخارج مصر كتييييير
وأدرس فى كليه الهندسة وزوجى كمان أستاذ جامعة
ومش عارف يتعالج فى بلدنا
ربنا ما يوريك اللى احنا فيه ونمر به الآن
هل لو لا قدر الله جاء لك مرض هتقول أصبر يا مرض شوية
على أولى الأمر فى البلد
؟؟؟؟؟؟؟؟؟؟؟
؟؟؟؟؟؟؟؟؟؟



وطبعا اللفظ اللى حضرتك استخدمته هذا
على الشاشات لا يصح حتى لو فيه تجاوز من إعلاميين
وانا طبعا لا أقبل التجاوز من بعض البرامج

المشاركة الأصلية كتبت بواسطة magdy_c_c مافيييييييييييييييييييييي ش جديد كلهم زى بعض بصراحة حضرتك هتقلبى على المواجع اللى بيقول ان مرسى ورث نصيب كبير من الفساد أمال البلكيمى عمل العملية بتاعته على حساب مين ؟ و اللى أعرفه انه أساسا ً سواق تاكسى و كل الاخوة الجدد راكبين عربيات زيرو بعد ماكانوا مش لاقيين ياكلوا و الناس المحترمة أساتذة الجامعة مش عارفين يتعالجوا !!! لما القيم العلمية نسيبها تموت و نعمل عمليات تجميل لسواقين التاكسى لمجرد انهم من حزب الاخوان الشياطين ، يبقى دى بلد بتحترم نفسها و لا مواطنيها ؟ أنا أول ابن لى - رحمه الله - مات علشان كان وزير الصحة وقتها سارق فلوس التأمين الصحى للأطفال و مهربها لحسابه فى سويسرا !!! أقسم بالله فى التوقيت ده نفسه سمعنا أن احدى الراقصات كانت بتتعالج على نفقة الدولة فى ألمانيا باعتبار انها من القيم الفنية الفريدة !!! أنا مش هاوصف لكم شعورى ساعتها كان ايه ؟ كل واحد فيكم ممكن يتخيل براحته ( ده كان فى زمن المخلوع ) لسا الحكايات ما خلصتش لما ربنا رزقنى ببنت تانية باردوا فضلت شوية كده و ماتت الحمد لله و علشان ربنا يرزقنى بأولاد تانيين لازم المدام تسافر لندن و تقعد فى مستشفى خاص للولادة و يتم متابعتها على مدار الـ 24 ساعة طوال الـ 9 شهور بحد أدنى 120 ألف دولار ! و أنا لسا عندى أمل فى بكرة و فى النهاية أنا راضى و ساكت لكن لما بنتى الوحيدة تتعب و اوديها مستشفى للطوارئ الساعة 2 صباحا ً لأن مافيش غير المستشفى دى اللى قدامى و جميع طاقم الأطباء و التمريض يرفضوا حتى يبصوا عليها بحجة انهم عاملين اضراب تبقى دى مهزلة وقلة أدب و لما أسيب المستشفى العام دى و اجرى بها على الحميات و باردوا عاملين اضراب يبقى كل سنة و انتم طيبين فى البلد كلها أنا ضاع منى ولد و بنت قبل كده و لكن مش هافرط أبدا ً فى بنتى الوحيدة و الله ما احترموا نفسهم و خدوا البنت و عملوا لها كل اللازم غير لما خليت نائب الطوارئ طالع من السكن بتاعه فى المستشفى رايح الكانتين و ضربته باكصدام العربية و زنقته فى الجدار و قلت له من الآخر لو ما عملتوش اللازم للبنت حالا ً هاروح البيت و اجيب الطبنجة و أصفيكم واحد واحد يا اللى ما عندكوش ضمير يا اولاد الكلب ما عداش 5 دقايق و لقيت المدير الادارى جاى و معاه رئيسة التمريض و صحوا البيه بتاع الاطفال و تمت كل حاجة على خير اذا كان ده بيحصل مع الحالات البسيطة فى جميع الاقسام و الطوارئ يبقى هيعملوا ايه فى العمليات الكبيرة ؟؟؟ المهم عندهم بتوع التاكسى و التكاتك اللى بيدوهم صوتهم فى الانتخابات حتى لو كانت عملية تصغير أنف و لا تكبير ثدى و لا أى هجس و كله على حسابنا من أموال الشعب الغلبان - لمجرد انهم من الاخوان - حتى لو هتكلف ملايين الجنيهات مش باقول لك مافيش فرق النظام هو هو و الفساد هو هو البلد هى هى بس طلع لها دقن

عاوزة اصبرك بحاجة أخى الكريم ربنا يؤجرك على فقد طفليك ويجعله فى ميزان حسناتك أنا عندى إبتلاء لن تصدقه
لقد خطف منى إبنى الكبير منذ 1994 وكان عمره وقتها عامين فقط والله والله ليس إهمال وفضلت اتلقى اتصالات هاتفية ونصب على فى مبالغ لا تتخيل المعاناه والانهيار العصبى اللى تعرضنا له
ولم يعود الولد حتى الآن ولا انساه وتمنيت لو كان مات ودفنته
كانت نار قلبى بردت ( ولكن لو تفتح عمل الشيطان )
ومافيش حد يختار إبتلاؤه والحمد لله على ما أعطى و على ما أخذ إستودع أبناءك أخى الكريم عند خالقهم كما فعلت أنا وزوجى
وادعى لنا بالصبر فقد عانينا كثيرا وربنا يصبرك انت وزوجتك

انا لست حمل هجوم من أحد ولا يهمنى مبارك ولا مرسى و لا إخوان أنا بتكلم عن أوضاع قديمة لم تفرق كثيرا عن واقعنا بل إزداد الوضع سوءا وكل ما اتكلم يتهمونى بفوبيا الهجوم على الاخوان و يقولوا الصبر الصبر الصبر
الصبر له حدود والى متى سيعانى المواطن فى مصر
يارب كل واحد يلوم عليه لا يزوق ما زقته انا وزوجى
اللى عاوز يعيش محترم فى البلد ( يتعالج بكرامة - يعلم أولاده - يأكل - يلبس - يعمل - يسكن - المتطلبات الرئيسية للحياة )

مش عاوزين لا الجمبرى - المكسرات - النظارات الشمسية اللى عاوزين يزودوا جمركها علشان رفاهيات
عاوزين نعيش يا بلد حرام عليكم

ربنا يحفظكم جميعا واولادكم و أسركم
والسلام عليكم ورحمة الله وبركاته