المشاركة الأصلية كتبت بواسطة m.elhasafy
 ... مبدئياً الساجا فيها دعامات صلب بالشنطة و الأبواب و التابلوه و بها إيمبولايزر فى نظام الإنذار مما لا يجعلها فريسة لكل من هب و دب و كان صبى كهربائى ثم إنحرف 
ثم مين قال إن الرينو لوجان قيمتها مش عالية؟!...العربية ممتازة وقيمتها عالية و لكن يعيبها عدم وجود النموذج الأوتوماتيك منها و حضرتك تعرف شوارعنا دلوقتى عاملة إزاى
العيب الحقيقى فى السوق هو سعر الفيرنا و اللانوس اللى ينرفز و شادد معاه السوق كله (بلغة رجال التسويق)
يعنى إيه عربيات بقالها أكتر من سبع سنوات مازادش فيها مسمار و سعرها بيزيد كأنها يتم تطويرها؟!...
يعنى إيه الفيرنا تتجمع فى مصر و تتباع بالسعر ده؟!... 
سيدى الفاضل الفيرنا عيبها مش عدم وجود وسائد هوائية فقط و لكن يعيبها إن موتورها قوى جداً و لا يتناسب مع هيكلها (بتبقى كفتة فى معظم الحوادث لا قدر الله) و طبعاً العفشة مش مصممة للسرعات دى و بالتالى ثباتها (مراجيح) و أخيراً فراملها بسكليتة (واحد صاحبى كان فاضل يطلع رجلة يفرمل بيها فى الأرض علشان يوقفها)
يعنى أدى حضرتك صباع ديناميت و أقولك ده أحسن من صواريخ رمضان
بالله عليك مش حاجه تغيظ 
و اللانوس موتور 8 صباب و أصلا متاخد من أوبل (مش فاكر أى موديل) أواخر التسعينيات
ما بتحسش إنك بتستغل لما تدفع فى عربية موتورها مصنع بتكنولوجيا أواخر التسعينيات 70 ألف جنيه؟
المشكلة إننا بنقلد بعض و ده اللى عمل سعر للعربيات دى و طبعاً رخص قطع غيارها و سهل صيانتها
و أخيراً الصينى زى الفل إلى أن يثبت العكس ... بس بصراحة لما شفت الكراش تست بتاع كام عربية صينى و إتمنعت من دخول الإتحاد حسيت إن المخاطرة غير محسوبة
يعنى الأيه بى إس وإيه بى دى و الإيرباج و حتى لو حطلك صعايدة فى العربية يحضنوا عليك ... ممكن كل الهيلمان ده يجيى وقت الجد و يطلع فشنك
يعنى الموبايلات الصينى اللى بيقولوا إنها حتى بتعمل نسكافيه ... ما تسمعش منها كلمتين 
سيدى الفاضل إرتفاع القيمة ليس قاصر على بروتون وحدها ... و لكن لازم أكتب بروتون لإن حضرتك فى منتدى بروتون
و أنا بروتوناوى أصيل 
شكراً  |
بصراحة الدنيا كلها نفسها العربيات سعرها يقل اللا هنا كله عايز العربيه سعرها يزيد! مش فاهم ايه مدى او الغرض من الفكر ده؟ جبت عربيه بسعر رخيص بس عايزها تغلى علشان الناس يقولوا راكب عربيه غالية؟ ايوة قيمتها فيها كلمه معقولة بس عربيه ب 60 الف تقول قيمتها تسوى 80 الف انا مش فاهمها! لما البي واي دي زادت من 64 الف الى 67 الف مالكيها اول ناس هاجموا الزياده دي لانهم فاهمين الدنيا صح و عارفين ان مهما عربيتهم حلوة و عملية و يتقال فيها شعر ملهاش حصه كبيرة في السوق ( و اسمها في مشروع احلال التاكسي ) لانهم عارفين ان زيادة سعر عربيتهم مش في مصلحتهم هما شخصيا, يعني مش حيقول انا راكب عربيه ب 70 الف و خلاص! الطلب على العربيه حيقل و المبيعاتها حتقل و ممكن تفشل تسويقيا (زي عربيات كتير ) و تبص تلاقي بعد 5 او 6 سنين الموديل ده او العربيه دي مفيش منها في مصر اللا بضع مئات من السيارات فبالتالي التجار مش حيوجعوا دماغهم يسافروا يجيبولها قطع غيار واللا يطلبوا من مصانع قطع الغيار يعملولهم تقليد ليها علشان الطلب! حتلاقي نفسك بتدوخ السبع دوخات على ما تلاقي قطعة غيار بسعر مبالغ فيه و متلاقيش اللا محلين او تلاته عندهم يودوك و يجيبوك زي ما هما عايزين
و ثم العربيه تمنها من بلدها بعد اضافة الجمرك و المكسب 61 الف ليه نتمنى انها تتباع ب 80 او 85 الف؟ بنحب التوكيل قوي كده انه يجني ملايين على حساب الناس الغلابة اللي نفسها تركب عربيه محترمة؟
عموما كلامنا كلنا ملوش لازمة لانها حقيقة ثابتة! انتشار ال 516 و اللوجان و الساجا نتيجة سعرهم المنافس فقط لا اكثر! لو كانت الساجا ب 85 الف كنت انت اول واحد مش حتفكر فيها حتى!
و لما كانت اللوجان ب 71 الف فضلت في معارض السيارات سنتين متبعش منها 3 عربيات على بعض
صح واللا ايه؟
تحياتي
للعلم احنا معانا لانسر الايموبيلايزر فعلا حلو بس لما العربيه بتتنظر انها تتسرق برضه بتتسرق و ياما هوندات و بي امات اتسرقت من تحت بيوت اصحابها في ثواني و فيها اللي فيها! ربنا يسترها بس كل الصيني نازل ايموبيلايزر ! ساعات بحس ان الغرض منه في مصر انه يعقدك! المفتاح يضيع يبقى لازم تغير الكمبيوتر او تعمل نسخة من الاستبن ب 300 جنيه!!!!