استفسار عن فيات اونو او اى عريبة تستحمل
السلام عليكم ورحمة الله وبركاته
لست من اهل الخبرة فى السيارات فقد تعلمت مؤخرا وعملت رخصة قيادة . وعلاقتى بالعربيات زى علاقة اى واحد مصرى بالتزحلق على الجليد
علشان ما اطولش عليكم انا بدات مؤخرا افكر انى اشترى عربية وبدات جولاتى على النت ولقيت ان المنتدى هنا الناس بجد خدومة وبتساعد بعضها حبا فى الله . كنت بافكر اجيب عربية بالتقسيط ولكن نصحونى اجيب فى الاول مستعمل لحد ما اتمكن وبعد كده ابقى ابيع واجيب جديد قسط .
انا حاطط ميزانية فى حدود 27 الف او اقل .
المهم بعد لف على النت لقيت ان اغلب الكلام بينحصر فى الاونو والبرايد العصفورة والفليشيا
انا عارف ان انا هنا فى منتدى الاونو بس انا عاوز نصيحة بما يرضى الله . انا هاسوق العربية دى كل يوم 80 كيلو وكمان كل شهرين هانزل من اسكندرية للغردقة والعكس يعنى حوالى 700 كيلو فايه رايكم الاونو تستحمل الكلام ده ولا اجيب بونتو ولا فليشا ولا ايه . ولكم جزيل الشكر
|