[إسلام البنا]

أعتقد في شركات تقسيط كتيرة دلوقتي بنسمع عنها كل يوم زي كونتكت كارز و 4 Brothers و غيرها كتير بعضها بيشترط مفردات مرتب وبعضها بيكتفي بضمان محل إقامتك الموجود في البطاقة لأن طبعًا في ناس كتيرة مش شغالة في القطاع العام او الحكومة زي كتير من التجار الصغار والصنايعية وأصحاب الأعمال الحرة وغيرهم ومع ذلك كتير منهم راكبين عربيات قسط ، أنا عن نفسي مجربتش لكن سمعت في إعلانات بعض الشركات أنهم بيكتفوا بصورة البطاقة وضمان محل الإقامة بس طبعًا المقدم اللي أنتا عاوز تحطه ده ميركبكش غير لانوس أو فيرنا بالكتير مش أكتر من كدة
لكن عمومًا ما انصحكش بالقسط لأنه خراب بيوت وممكن تلاقي في الآخر ربع تمن العربية أو أكتر زايد على تمنها يعني مثلًا لو تمنها 80 ألف تلاقي نفسك دفعت بعد أربع خمس سنين 100 أو 105 ألف فحرام انت أولى بال25 ألف دول ، وحط في بالك أن العربية المستعملة مهما كانت فيها مشاكل مش هتدفعك في صيانتها 25 ألف جنيه
أنا كنت ناوي أجيب لوجان بالقسط ولكن زوج أختي له واحد صاحبه فاتحين معرض سيارات قال له إن الزيادة على تمن العربية خلال خمس سنين مش أقل من 25% فقالي ابعد أحسن
وفعلًا سمعت كلامه وكان معايا نفس المبلغ اللي مع حضرتك 15 ألف ، وكنت محتار بين لادا موديل تمنينات أو 128 أو ماروتي تسعينات
وفي الآخر الحمد لله ربنا وفقني وجبت ماروتي 96 ب15 ألف والحمد لله كويسة بقالها معايا 9 شهور مكلفتنيش فيهم غير حوالي 1000 جنيه في البداية عشان أضبط شوية حاجات في الماتور والكهربا وجبت كاسيت جديد وبطارية جديدة من شهر بس و 850 جنية تكلفة ترخيص 3 سنين لأن الرخصة كان فاضلها 4 شهور وتنتهي ، وطبعًا فلوس الترخيص ملهاش دعوة بالأعطال ، يمكن العربيات الجديدة بتاخد أضعاف المبلغ ده في الترخيص
والحمد لله طول ما انت مهتم بالعربية ومضبطتها و مبتجهدهاش فوق طاقتها واستعمالك حكيم هتكون أعطالها قليلة إن شاء الله
تقريبًا كانت 50% من مشاكل عربيتي بسبب البطارية ولما غيّرتها استريحت بفضل الله
عمومًا استخر ربنا واسْتَشِرْ أهل الخبرة وربنا يوفقك لفعل الخير