[amr_198]

بسم الله الرحمن الرحيم
سبحان من سخر لنا هذا و ما كنا له مقرنين وانا الي ربنا لمنقلبون الحمد لله والله أكبر ولا اله الا الله

بعد مشاورات و خناقات و شتيمة وقلة قيمة من الحاج والحاجة اخيرا اقتنعوا وجبت اللوجان الحمد لله ، الاسرة كانت معترضة اعتراض تام علي الوجان بحجة انها مش منتشرة وقطع غيارها غالية ( معلش مش بينزلوا الشارع كتير ) واقتناعهم بالانوس عشان هي تاكسي واي كفتجي ممكن يشتغل فيها وقطع غيارها رخيصة وكدة !! بس بفضل الله اللوجان اثبتت نفسها بجدارة ولا كأنها طيارة

اولا احب اوضح سبب اعتراضي علي اللانوس والفيرنا مع العلم اني ركبتهم حوالي 3 شهور

اولا اللانوس : جنط 13 يعني العربية لو راكب معاك واحد متختخ العربية هتبوس المطب ، درجة عزل الكابينة عن الموتور رديئة للغاية وده بيرجع لانها تقفيل مصري ، ومش محتاج اقولكو يعني ايه عامل مصري ، يعني الفهلوة والشغل اللي يخلص في 5 ساعات ينجزه في ساعة ، والمعلوة القادمة دي انا واخدها من واحد صاحبي مهندس ميكانيكا باور في المصنع ( ان مصنع منصور شيفروليه كان بيقفل 8 عربيات في الشهر ولما دخل مشروع التاكسي الابيض بقي بيقفل 14 عربية في نفس الشهر برضه !! ) هل ده يعقل ام درجة التقفيل والخامات المستخدمة تكون جيدة ؟؟؟ ومحدش يقولي اصل العمالة عمالة ماهرة !!


بالنسبة للفيرنا : انا عارف ان موتور الفيرنا اقوي من موتور اللانوس والوجان بس ده مش حاجة تميزها !!

ليه بقي لان العربية صاجها خفيف جدا جدا ، العربية فعلا بتطير يا جماعة هات بيها كدة 130 ولا 140 هاتحس انها بتعب في ايديك مافيهاش سبات خالص !! واحنا شباب وبنحب الفزلكة والسرعة بس السرعة مع عدم ثبات ده يجيب حاجات وحشة لاقدر الله !!


نيجي بقي للوجان ........

العربية عالية !! عالية عالية بكل ما في الكلمة من معني

الاوبشن اللي فيها زيادة عن اللي هاتحتاجه
المساعدين ورا وقدام حاجة رهيبة ( في معلومة مش اكيدة ان المساعدين هم نفس مساعدين الرينو سيمبول )

الصالون جوة مريح جدا جدا اذا كان في مقعد السائق ولا في الكنبة الخلفية .

العربية انا اخر سرعة جبتها بها كانت 140 وكنت سايب الدركسيون وكانت ماشية في خط مستقيم لمدة 10 ثواني لحد ما انا ضربت فرامل وهديت ، خدت غرزة علي 120 هعي الواسع وعلي الضيق والعربية ثابتة جدا

الشنطة بتاعتها بحر !! 510 لتر !! انا دخلت جوة ونمت فيها وخليت اخويا يسوق عشان اسمع لو في اس صوت في العفشة ولا اي حاجة !! مافيش الهوا !! هو صحيح غبي ولبسني كام مطب وضماغي طاخ في الشنطة بس مافيش اي صوت يدل علي سوء العفشة او سوء تربيطها .

مشيت بيها في اسوء شوارع القاهرة والجيزة ( الدقي القديم ، بولاق ، همفرس ، امبابة ، المنيب ) العربية ما بتنطقش وبتحب المطبات

يا جماعة بجد احسن عربية في فئتها السعرية ، العربية عاملة معايا 700 كيلو مرمطة ومافيش اي حاجة حصلت الحمدلله .


نصيحة لوجه الله ، اي حد مش عاوز يرمي فلوسه في الارض وعاوز يجيب عربية تعمر معاه وتستحمل غباوة الشارع المصري

اللوجان اللوجان اللوجان يا بشر .....

ولو في اي استفسار انا معاكو .

Renault Logan 2011 Full Options ( Betrolium Color )