فى مرتين كنت فى موقف موت فيهم مع الهوندا سيفيك واحده 2005 و التانيه 2006 و السيفيك تسلم بنت اللعيبه طلعتنى من الموقفين
بخصوص سيفيك 2005 كان فى واحد ماشى على شمالى سرعته 120 ثابت عليها و انا ماشى على يمينه تصاعدى لحد ما وصلت 160 و بوز عربيتى عند باب عربيته الخلفى و جه واحد طاير من وراه عمال يرعشله طبعا انا مش مخون لان مفيش عاقل هيعمل اى شىء الا لما انا اعديه و بعدين ياخد هو يمين يعدى الراجل اللى جاى من وراه و اذ بى افوجأ بالبيه بيرمى عليا عشان يوسع سكه نهااااااار اسود انت يابا انت يا عم كلاكسات بقى و ترعيش نور حتى الصباح الباكر ولا الهوا و هو مكمل عليا المشكله ان كان فى واحد على يمينى كمان خلاص انا لابس فيه لابس فيه و بالظبط قبل ما الافندى باب عربيته القدمانى يلبس فى بوز عربيتى بخمسه سنتى بدون ادنى مبالغه رحت خارم الارضيه بدواسة الفرامل (اوتو) و اتفرج بقى على مراجيح مولد النبى العربيه فضلت ترقص يمين و شمال بسرعه كبيره بس تسلم السيفيك مطلعتش حتى من حيز الخط اللى هيا ماشيه فيه طبعا سبت الفرامل عشان تبطل رقص بس مسكتها تانى عشان ملبسش فى الافندى البارد و رقصت تانى بس على اخف سنه سبت الفرامل المره دى بس كانت المسافه بقت معقوله بينى و بينى و ثبتت العربيه فاخدت شمال و عديته و الصراحه محاولتش اعاتبه اساسا لان اللى يعمل كده ميحوقش فيه عتاب
السيفيك عربيه تدى اللى سايقها احساس بالامان و الطمئنينه و تعمل معاه اللى هو عاوزه
انا كنت بفكر اجيب حاجه فى حدود الاربعينات لكن انا هستنى كام شهر يمكن يجيلى مبلغ كده فلو جه هرشق اكيد فى السفيك فخر الصناعه اليابانيه للصالون العادى
