من الآخر... سيراتو سيارة ممتازة أم سيارة سيئة؟؟؟؟؟؟
أنا وكتير زيي بنحاول ناخد قرار شراء سليم, وده هيكون إزاي من غير أخد راي أهل التجربة والخبرة. لكني والكل أكيد ملاحظ إن تضارب الراي واسع جدا على السيارة سيراتو. طبعا أتنا مش منتظر إن الكل يتفق أو يختلف عليها, لكن مش ممكن تكون سيارة بالإنتشار ده والنجاح ده فى مصر (الإنتشار دليل على النجاح, ولا إيه؟) وميكونش فى رأي غالب شوية حتى عن التاني.
قصاد كل واحد بيقول إن العربية ثباتها ممتاز, واحد تاني بيقول الثبات سيء جدا. وقصاد كل واحد بيقول سيارة آمنه فى السرعات العاليه, واحد تاني بيقول إنها سيارة الموت والحوادث.
من ملاحظتى إننا )المصريين) بقينا نسوق بسرعات عاليه جدا وغير آمنه, يعني لما الواحد يقولك (أنا مليش فى الجرى) يكون يقصد إن آخره ١٦٠ !!! ده غير الغرز والملفات اللى على السرعات دي,. فهل يبقى العيب فينا وفي سواقتنا ولا العيب فى العربيات؟
مهو أنا مش متصور إن شركة زي كيا (وسيبكو من عقدة الياباني بقى) هتنزل عربية فيها عيوب فنيه فى الثبات, بس همه مكانوش يعرفو إن فيه ناس ممكن تعمل غرز على ١٤٠. أساسا مظنش إنهم يعرفو حاجه إسمها غرز أصلا.
فياريت نسمع ردود موضوعية فى المسألة دي. أنا واحد اخري على طريق سفر ١٢٠ وبسوق بعقل جدا لأن معايا فى العربية أغلى ناس عندي ( مراتي وعيالى) فياريت نحط العاملين دول مقياس لردودنا على سؤالين محددين:
١- هل سيراتو سيارة مناسبة وصفقة جيدة لأسرة صغيرة وأسلوب قياده هادئ وسرعة قصوى ١٢٠-١٣٠ كم, ولا غرز ولا يحزنون؟
٢- موضوع نشوفية العفشة - هل هي فعلا ناشفة للحد ده (خصوصا ال SX عشان جنط ١٧)؟ ولا الناس تقصد ناشفة بالنسبة لعربيات تانيه. وعموما هل النشوفية دي مزعجة لدرجة إن الواحد يندم على شراء العربية دي؟ يعنى العربية بتكركب وتخبط فى المطبات كأنى راكب لادا يعنى؟
معلش طولت عليكو أوي, بس الحيرة فى الموضوع ده صعبة أوي, دي أول مره أركب زيرو ومش عايز أندم
|