اشتريت كليو 2003 مستعملة عاملة 85 الف كيلو 1200 سي سي وكان عندي كذا استفسار لخبراء الكليو:
- سمعت عن موضوع تغيير الزيوت والفلاتر والسيور مع أي عربية مستعملة، ومعنديش فكرة عن أي حاجة من دي. عايز أعرف ايه المفروض يتغير، والقصة هتكلف كم، واغيرها فين. وهل لازم كل حاجة تتغير ولا ممكن اكشف على حاجة الاقيها كويسة مش محتاجة؟
- عايز أغسل العربية غسلة كويسة من برة وجوة وانضف الكراسي، محتاج أعرف ايه انواع الغسيل الممكنة، واغسلها فين؟
- الاكصدام اتحك في عربية تانية، واللون الأسود بتاعه عمل خطوط باينة في اللون الأبيض عندي. عايز انضف الكلام ده. يا ترى فيه حد بيعمل الكلام ده ولا ممكن عامل الغسيل بتاع البنزينة يعملهولي زي ما واحد صاحبي قاللي؟
- فكرت أكشف على العربية، اتصلت بالوكيل قلتلهم عايز اعمل شيك اب كامل على العربية بكل حاجتها، قالولي هيكلف 450 جنيه. طبعاً نفضت وفكرت أعمل الفحص ده برة. السؤال بقى، لو عايز افحص العربية فحص شامل، أروح لمين، وايه الحاجات اللي هيفحصها؟
- عايز اغير مساحات الإزاز عشان اللي عندي مقطوعين؟ ايه الأنواع الكويسة ويا ترى بتكلف كم؟
- عايز اخلي ازاز العربية كهربا واربطه بالسنتر لوك عشان يترفع اوتوماتيك ونا بقفلها، العملية دي بتتعمل فين وبتكلف كم؟
- دلوقتي محتاج أسافر بالعربية مشوار طويل شوية حوالي 250 كيلو ودي هتبقى أول سفرية ليا بالعربية، ايه الحاجات اللي المفروض اطمن عليها في العربية قبل ماسافر عشان أبقى خدت بالأسباب وماتعرضش لمشاكل في الطريق؟
- الاستهلاك الطبيعي للبنزين في العربية كم كيلو للتانك الكامل 40 لتر؟
واعذروني للأسئلة الكتيرة دي بس مفيش مكان أسأل فيه أحسن من عيلة الكليو في المنتدى