دايو ريسر 1994 ايه رايكم فيها يا اهل الخبره
دى اول مشاركه فى المنتدى اللى كنت متابعه لانى بحب العربيات
المهم انا اول مره اشترى عربيه وجبت عربيه دايو ريسر موديل 1994 اوتوماتك
صاحبها هيانها جدا وجبتها منه بسعر معقول على اساس ان فيها تظبيط
المهم انى عايز اظبطها واخليها عربيه وعايز مساعداتكو ضرورى جدا لان العربيه عاجبانى رغم انى حاسس انى داخل على موال
كل اللى كان فيها لما اخدتها ... انها عايزه تظبيط عفشه وشحن التكييف وشويه شغل كهرباء وفرش ودهان وفوانيس وكاوتش وجنوط وتبقى فله
اول المشاكل ان قطع غيارها مش موجوده مع انى كنت فاهم ان كل قطع غيارها زى الانوس بالظبط وفعلا كان الموتور زى اللانوس جدا وجيت عشان اظبط الفرامل احتجت طنبوره وتيل وماستر
لاقيت التيل والماستر موجودين وزى الفل فى شارع شبرا فى الخلفاوى لكن الطنابير ابدا انى الاقيها
ودخلت فى حته دلنى عليها ولاد الحلال اسمها عزبه شلبى وجبت الطنابير استيراد ووقفو عليا الاتنين الامامى ب 180ج وكانو مصديين وسنفرهم الميكانيكى وظبطهم وركبهم
المهم انى ضبط الفرامل ومن ساعتها وانا سامع صوت العجل بيصوصو طول مانا ماشي على حسب لفته وكلمت الميكانيكى قالى ده عادى لحد ماتطبع قلتله اوك ولو انى مش مقتنع لان الموضوع مستمر
والتيل عما 50ج والماستر لعجله واحده بس ورا ب 45ج
قالى الميكانيكى ان العربيه بتسخن ولازم يتعملها غسيل دوره الراديتير وعملتها فعلا وسالت الراجل على الامبير شغال ولا لا لانى حاسس ان العداد بايظ هو اصلا كل العدادات متنيله بنيله
المهم قالى لا شغال زى الفل و غيرتلها زيت الموتور ووديتها لبتاع الفتيسات يشوفها محتاجه ايه تانى قالى تعلالى كمان يومين وخلال اليومين دول حصل الكارثه اللى زى الفل
ان العربيه بطلت منى ومش عايزه تدور وانا طبعا ولا فاهم فى الميكانيكا خالص
جبت ميكانيكى يشوفها قالى ان العربيه سخنت وكمان الكاتينه ضايعه وجابت صبابات او وش سلندر
وحوارها قالى مبدأى حضرلى 600ج
الحقونى وقولولى اعمل ايه
وايه الخطوات الصح اللى لازم اعملها لتظبيط العربيه دى من غير ما اقع فى مشاكل جديده كفايه اللى فيها
اسالتى بقى
اولا هل فيه توكيل او صيانه ممكن اكشف عليها فيها واخليهم يشوفو محتاجه ايه يتظبط فيها ويكونو بيفهمو ومكانه فين دى
ثانيا الاقى فين قطع غيارها
ثالثا خطوات التظبيط ليها ايه من حالتها دى لحد ما أوصل لانها تبقى عربيه بجد
واللى عارف ميكانيكى كويس ومش غالى وبيفهم فيها ويكون امين ياريت يدلنى عليه
طولت عليكو معلش
مع الشكر لكل الناس اللى ترد عليها وتساعدنى لانى عامل زى الغرقان بجد
|