السلام عليكم أعضاء المنتدى المحترمين،
نظرا لأن أنا تعبت عشان ألاقى تقرير كامل و محايد عن لانسر شارك قبل ما أشتريها،قررت أعمل الموضوع ده عشان أفيد أى حد بيفكر فيهاو هحاول بقدر الامكان أكون موضوعى فى حكمى عليها.
أنا استلمت العربيه فى 1/11 أول فئه خليجى (مش توكيل) و عامله دلوقتى 1500 كم فكلامى هيكون فى اطار الانطباع الأولى مش الحكم النهائى. قبل الشارك كان معايا لانسر عيون صفيه 92 أوتوماتيك خليجى و دى عربيه تحفه الحقيقه بس تعبتنى مصاريف و قطع غيارها الاستيراد غاليه و أحيان كتير مش موجوده.
نخش فى المهم بقى و هتكلم فى كام نقطه محددين عشان محدش يتوه منى:
أولا مواصفات العربيه:
بلد المنشأ: اليابان- صنعت بمواصفات السعوديه.
الموتور: 1600 CC موديل 4A92
114 hp عند 6000 دوره/الدقيقه.
154 نيوتن/متر 2 عند 4000 دوره/الدقيقه.
الفتيس: أوتوماتيك عادى 4 سرعات اماميه موديل Invecs 2
الكماليات: باور ستيرينج-زجاج كهرباء أمامى و خلفى-تكييف يدوى-كاسيت CD و AUX- ايرباج للسائق- كمبيوتر رحلات-مرايات جانبيه كهربيه-اسبويلر-اشارات فى المرايات الجانبيه
الجنوط عاديه-فتح الشنطه و التانك من الداخل.
ثانيا الشكل الخارجى:
العربيه يا جماعه "باخره" -من حيث الحجم يعنى-.شكلها من بره كده مش طبيعى.الفوانيس الأماميه تحفه و تحس العربيه كلها متناسقه مع بعضها مش زى عربيات تانيه تحس النصين بتوع العربيه ملزوقين العافيه. أقيمه 9.5/10
ثالثا: صالون العربيه
كعادة لانسر، عمليه مع افتقاد عنصر (الدلع) اللى تلاقيه فى العربيات الكورى مثلا. كل حاجه على الأد بالظبط بس التابلوه منظم جدا ، العدادات جميله جدا، شاشة المعلومات لذيذه فى التعامل معاها و مفيده مش مجرد منظر و خلاص. مفتاح الاشارات سلس جدا. الكراسى مريحه و الكنبه الخلفيه واسعه ما شاء الله و ارتفاع السقف مريح لكل الركاب مهما كان حجمهم.مممن تتحكم فى ارتفاع كرسى السائق و أحزمة الأمان و الدريكسيون.أماكن التخزين فى الأبواب و التابلوه و الكونسول أكتر من مجرد كافيه.
رابعا الشنطه:
للأسف دى واحده من العيوب -الحلو ما يكملش- مساحتها مش كبيره بس مش ضيقه للدرجه اللى الناس بتحكى عنها.تقسيم اماكن التخزين فيها حلو جدا و عملى.
أخيرا: أداء العربيه
فى البدايه طبعا مزودتش عن 2.5 RPM لحد التليين ما خلص (أول 1000 كم) بعد كده غيرت زيت موتور و فلتر-زيت Castrol Edge- و ربطت عفشه و بصيت على كل السوائل و انطلقت
و النتيجه كانت ان فيه تحت غطاء الموتور وحش متخفى فى شكل محرك اسمه MIVEC تسارع و صوت مش طبيعى بالذات عند 4RPM. استهلاك البنزين حسب طريقة السواقه طبعا.أحسن رقم وصلتله كان 14 كم/لتر على اسكندريه الزراعى لكن جوه القاهره و زحمتها الحلوه بيوصل 8 أحيانا 7!
.
الثبات طبعا و لا كلمه انا مزودتش عن 170 بس انطباعى ان العربيه ما شاء الله لو زودت مش هتقول لاء ولا هتعوم منى بس لسه الحكم النهائى لما أقفل العداد
فى العموم العربيه صفقه رابحه جدا و مش نادم عليها اطلاقا و لو رجع بيا الزمن هجيبها تانى برضه. طبعا فيه حاجات كتير لسه ما اتكلمتش عنها ان شاء الله أكمل الموضوع و لو عرفت ارفع صور هارفعها طبعا بس حبيت انقل لكم تجربتى سريعا كنوع من رد الجميل لمنتدانا المحترم.
السلام عليكم
