انا رأيي من رأي الباشمهندس سامح
و الخلاصه في الجمله دي:
الاجابه .... كله بتمنه .... او بالبلدي ... كل برغوت على اد دمه
المرسيدس ليها تمنها ... التويوتا ليها تمنها .. هيونداي ليها تمنها ... و الصيني له تمنه ...
|
انا حشتري عربيه صيني و فئه متوسطه و فول اوبشن بسعر اقل من عربيه ياباني صغيره و هاف اوبشن
استحاله مهما كان تكون جوده العربيات دي متساويه ابدا.
لو متساويه كان الصينين زودوا سعرها ماهو مفيش حد ملاك و مافيش حد مش عاوز يكسب اكتر.
انا عن نفسي بخاف اركب فلاشر اشارات صيني في عربيتي او كتاوت يبقي ازاي اشتري عربيه و اثق فيها
و خصوصا ان العربيه مالهاش اي خلفيه في السوق.
بالنسبه للخامات فيه فرق كبير جداااااااااااا
عربيه زي السويفت اللي معايا و اهي سوزوكي تعتبر زباله الياباني مش شركه كبيره
زي تويوتا و ميتسوبيشي مثلا ....التابلوه بتاعها من 93 لحد انهارده شكله جديد و مافيهوش خدوش
و مقبض الفتيس و فرش الابواب و دراع فرامل اليد لسه شكله محترم و مع غسله نضيفه تلاقي الصالون جديد.
تعالي لعربيه زي الاسبرانزا A516 كده و شوف عربيه بقالها سنتين و عامله 20 الف كيلو(تعتبر استعمال خفيف)
بص كده علي عصايه الفتيس و دراع فرامل اليد و الجرايد اللي بره العربيه حتلاقيها مقشره!!!!!
و نفس الحال مع البروتون اللي خامتها بتتبهدل بسرعه عن الاسبرانزا كمان .
هيونداي اول ما ابتدت كانت بتستمد تكنولوجيا بتاعها من شركات كبيره زي ميتسوبيشي
و الاكسيل عباره عن تصميم قديم للانسر(عيون صفيه) و هما طوروا فيه شويه
لذلك طلعت عربيه كويسه و حموله مع التحفظ علي بعض الخامات الداخليه زي التابلوه(ماشوفتش عربيه
اكسيل الا و التابلوه بتاعها مشقق من الشمس!!)
لكن شاسيه و موتور و عفشه تمام .
اللي عاوز اقوله ان الصيني يتقارن بالماليزي او اقارنه بنفسه
يعني شيري و BYD و .....الخ الخ
يعني الشركات الصيني اقارنها ببعضها
الكوري لحد وقت قريب كان كده قبل ما يتقارن بالياباني حاليا و ان كان الياباني
متفوق لكن بفرق بسيط حاليا عكس ما كان عليا في الماضي.
الاوربي دا موال تاني و برضه متفوق في حاجات كتير
يعني اعلي تكنولوجيا تنزل في الاوربي اولا لحد ما اليابانيين يقتبسوها
و بعدين يشوفوا عيوبها اللي بتظهر في الاوربي اولا بالطبع و تقلل من اعتماديتها
و بعدين يبدأو ينزلوها عربياتهم بعد التطوير.
يعني مثلا لحد 2003 كانت اللانسر بتنزل كاربيراتير في الوقت ان نفس الفئه في السيارات الاوربي
وليكن الريجاتا كانت بتنزل انجكشن من 84 !!!!!!
و الاير باج و الABS و ESP و EPD و ASC+T الخ الخ
كل دي حاجات اوربي و نزلت في عربيات اوربي قبل ما تاخد طريقها الي السيارات الاسيويه.
و قبلهم التكييف و الباور و السنتر و الزجاج الكهربائي و كل الكلام القديم اللي بيعتبر اساسيات مش كماليات حاليا.
فالمقارنه محسومه حاليا و حنفضل نتعامل مع الصيني زي ما كنا بنتعامل مع الياباني في اول السبعينات
و الكوري في اول التمانينات لحد ما يثبت وجوده .
لكن حياخد وقت علشان يثبت وجوده لان المنافسه بقت صعبه و صناعه السيارات نفسها بقت معقده
بعد دخول الكهربا فيها بشكل كبير اصبحت اكثر تعقيدا .
كان زمان يكفي انك تصمم شاسيه قوي و تحط موتور كويس و تظبط نسب ابعاد العربيه و شكل كويس
يطلع ليك عربيه كويسه من غير مشاكل .
لكن دلوقتي الموضوع اصعب لان ما عدش فيه سياره اسمها سياره قبيحه فبالتالي لازم تكون متميز في تصميمك
و لازم الموتور بتاعك يخرج اقل انبعاثات مضره للبيئه و محركات تعمل بنظام الرشاشات و كونترول يونت و تعقيد فظيع
دا غير عوامل السلامه و الامان الصارمه .فبالتالي الموضوع اصبح صعب جدا
و لسه حنشوف بكره حيحصل فيه ايه
اسف علي الاطاله و شكرا اولد مان علي الموضوع