المشاركة الأصلية كتبت بواسطة سيف الدين ابراهيم
اولا السلام عليكم ورحمة الله وبركاته ثانيا تحية لكل اللي ف الموقع وثالثا حابب افند موضوع اللوجان ده بصورة علمية ومنطقية عشان افيد اخواني من اهل بلدي او اخواني المسلمين .......انا عندي لوجان 2010 هاف وانا اشترتها للاسباب الاتية -1- امتلك عربية اكسارا وهيا عربية ممتازة جدا وقوية لكن بتاعتي متبهدلة اوي فقررت اشتري زيرو عشان اريح دماغي. -2- عرفت من تجربة عربيات كتير ان العربيات الاوروبية تمتاز- وركزوا اوي معايا يااخوانا - بمعامل امان عالي وتصميم داخلي احسن من الياباني والكوري . والحقيقة ان في اكذوبة شائعة تروج لان العربيات الاوروبي قطع غيارها معمرة وعادية السعر ........ احب اقول .....يااخوانا العربيات الاوروبي باستثناء المرسيدس والفولكس فقط قطع غيارها عادية جدا وليست معمرة ولا حاجة بالعكس العربيات الياباني برقبتها والكوري تقريبا زيها ....ولكن احب انبه لرفاهية وامان ورحابة تصميم الاوروبي وهو دا سبب اني جبت اللوجان لقيتها واسعة وقلت اكيد امتن من الفيرنا والانوس وقطع غيارها اكيد حتبقي رخيصة لانها كتلة شرقية.....وكانت المفاجاة ..... من اول يوم جبت العربية لقيتها مليانة مشاكل وتابعوا معايا قصتي ........... بسرعة كدة عشان مااطولش علي الاخ القاريء الكريم -1- خلل في الفرامل -2- تكييف مش كويس -3- r.p.m بيلعب -4-صوت كركرة عجيبة من الموتور -5- فتيس بيعض -6-سير الدينامو حركته مش مرتاحة ...... ولاني افنيت معظم اوقات شبابي في تصليح العربيات حاولت اصلح الحاجات دي عن طريق الوكيل وفرحت اوي لما الناس شكروا ف الوكيل رحت هناك لاقيت معاملة مش كويسة رغم اني كبير سنا ومركزي الوظيفي نسبيا مرموق وتقريبا لسة كل الحاجات دي عندي علما باني رحت اكتر من ست مرات في ست اشهر لكنهم نصابين درجة اولي .....كمان عملت حادثة بسيطة كلفتني حوالي 8الاف جنيه عشان شوية كلام فاضي جدا ردياتير -سربتينة -ماسورة تكييف- شبكة امامية سفلية فقط ....والله يااخوانا كل مااروح اشوف ناس بتشتكي من حاجات عجيبة مثلا الناس كلها مجمعة علي ان العفشة حلوة وناعمة صح؟ انا لقيت واحد هناك بيحذرني بيقولي خلي بالك من العفشة بتبوظ بسرعة وهكذا حتي مهندس التوكيل كل مااكلمه يقولي دي لوجان مش رينو بجد يعني .... انا يااخواني بقول اللي حصل معايا الا قد بلغت اللهم فاشهد واللي عايز يسال علي حاجة انا تحت امره
|
اهلا بحضرتك ..
كلامك على عينى وراسى لكنى مختلف معاك تماما
عربيتى عدت الـ 42 الف ومريحانى بدون مشاكل
1- الفرامل معايا زى الفل وغيرت تيل خلفى على 23 الف و الامامى على 41 الف
2- التكييف مش حلو فعلا لكن الكلام ده وانت على الغيار الأول والتانى .. لما توصل لسرعة 60 التكييف بيكون زى الفل ومتحسش بيه يعنى طول ما انت فى طريق مفتوح مش هتحس بيه
3- العفشة بعد استخدام سنة و 3 شهور و 42 الف كيلو زى الفل ولم اشتكى منها وفى اخر صيانة كانت تمام ويا دوب بيتعملها تربيط فقط
4- الكركرة ديه معروفة فى كل العربيات قديم وجديد والسبب فيها طريقة الضغط على دواستى البنزين والدبرياج وطلو ما انت بتدوس كويس مش هتلاقى كركرة
5- قطع الغيار غالية فعلا .. بس موجودة بره التوكيل باسعار مناسبة .. مع العلم ان الاصلى فى التوكيل بيعمـر
6- الحوادث قضاء وقدر ومتنساش ان فيه تامين بنشيله الليلة ( يعنى الريداتير وماسورة التكييف وباقى القطع المفروض تشيلها للتأمين
7- الفتيش بيعض على الغيار الاولانى بس وده لان لازم تجيب الغيار وهى العربية ثابتة تماما
ولك خالص الشكر ..