[مهند سالم]

المشاركة الأصلية كتبت بواسطة CARDIO زى ما اتفقنا ما حدش يفتى ..ماااااشى علشان انا متعقده من مدرسين السواقه.. و انا اول المبتدئين و ده اول سؤال 1لما اكون نازله من على كوبرى و انا اصلا كنت طالعاه على التانى امور و انزل و رجلى على الفرامل فقط للتحكم والا افضل على الغيار و رجلى دايسه دبرياج و فرامل ؟ والبقيه لاحقا و شكرا مقدما

لا ده ولا ده، الاثنين مجانبين للصواب.
أولا مش مهم حضرتك طلعت الكوبري على أنهي غيار.
ثانيا: في نزول الكباري يستحسن البقاء على الغيار (وطبعا يكون غيار مناسب لسرعة العربية)، يعني لو هأنزل على عشرين يبقى هأفضل معشق الثاني وهكذا، يعني لا أمور العربية ولا أدوس دبرياج، بل بأسيب العربية تنزل وهي واخدة الغيار المناسب لسرعتها، طيب ليه؟
لأن في حالة المور (أو الضغط على الدبرياج) بيتم فصل التروس، وبيبقى العجل حر تماما، وده بيدي دفعة للعربية وبيصعب التحكم فيها، وبيبطأ فاعلية الفرامل. أما في حالة التعشيق التروس مع الفرامل بتساعد في زيادة التحكم وتقليل مسافة الفرملة.
وده بينطبق على أي فرامل، يعني لما حضرتك تحب تفرمل العربية ما تجبش دبرياج الأول بالعكس حضرتك بتسيب العربية واخدة الغيار بتاعها عادي خالص وتشيل رجل من على البنزين وتدوس فرامل وقبل ما العربية تقف تبقى تدوس دبرياج، يعني الدبرياج ده آخر مرحلة عشان العربية ما تبطلش بس، وعشان بعد كدة تديها الغيار المناسب للسرعة الجديدة بعد الفرملة. أرجو أكون أوضحت الفكرة ، وشكرا