عن تجربة مرات عديدة اقول الحق ...الميزة الوحيدة اللي هناك الكمبيوتر بتاع الكشف بيجيب من الاخر ويقولك العطل ايه...وكمان قطع الغيار اصلية
بس العيوب انهم غاليين جدا
زمان لما كنت باروح كان مهندس الاستقبال اسمه رافت...الراجل دا محترم جدا جدا للاسف ساب التوكيل وراح فولكس يابختهم هناك بيه
الراجل دا لما حاجة تكون مستاهلة تتغير كان يقوللي لازم ماينفعشي امشي بيها كدا وفي حاجات مش مهمة اوي ممكن امشي بيها شوية لغاية لما اغيرها...لما كنت اسيبلة العربية عشان فيها شغل كان بيتابع الشغل ولا اكني قريبة ولما اتصل بيه يقوللي العربية كان فيها كدا كدا وعملنا كدا وتعالي خدها...الراجل دا كان بيجبلي خصم على المصنعية وقطع الغيار كويس ومن نفسة من غير ماطلب منه كدا
دلوقتي للاسف فية واحد اسمه عادل الراجل دا رخم اوي ويعاملك بتناكة بس لما عرفت هو كان فين قدرت ليه هو كدا سيادتة كان في غبور قبل ماييجي سيات..اطلبة عشان اقولة العربية حصل فيها ايه يقوللي مش فاكر استني اسالك...يعني مش عارف حاجة وميت مرة ابقى قايله يعملي حاجة يوللي اسف نسيت سيبلي العربية تاني وانا اعملهالك...وبعدين اطلب منه الخصم يحسسني انة بيبقشش عليا من جيبة...من الاخر انسان يخليك تكرة التوكيل
شوف الفرق واحد يخليك تحب التوكيل ورغم ارتفاع اسعارة بس انت مطمئن ان العربية حتبقى احسن وواحد تاني يقرفك ويخليك تكرة اليوم اللي جبت فيه العربية