صباح الورد
روق ياراجل وهون على نفسك, واضح إن فيه شوية حاجات حصلت معاك بس ممكن نقول عليها فردية ومش مشاكل عامة, أقصد الحاجات إللى إضطريت تغيرها فالتوكيل والعربية لسه زيرو وأنا معاك إن دي حاجة تدايق إلى أبعد حد بس العربية صنعها بشر ومفيش صناعة بشر كاملة, الكامل لله وحده, ونحمد ربنا إنها بتيجي فحاجات زي دراع إشارة وحجات من دي مش عيب فى نظام فرامل أو دواسة بنزين زي محصل فى الكورولا مثلا, تخيل إحساس صاحبها كان إيه, ده تلاقيه كان خايف يمشي بيها.
حاجة تانيه لاحظنها بعد مجبت العربية إن فيه بعض الملاحظات إللى الناس نتقولها على العربية بيكون سببها المقارنة, يعني إنك تقارن بإللى كنت راكبة قبل كده, طبعا مقارنت حضرتك في محلها لأنك كنت راكب المنوال قبل كده, بس أظن إن فيه فروق بين أي عربية منوال وأوتو حتى لو من نفس النوع والموديل, وأقصد بكلامي نقطة
السحب والتجميع:
هي فعلا العربية تحسسك إن سحبها ضعيف مع الدوسة العادية للدواسة فى الطلعة الأولى, لكن مع التجربة وقرايتي لتجارب بعض الأعضاء لقيت إن فيه نقطة فى دواسة البنزين عندها السحب وإستجابة الموتو بتفرق بشده وبتلاقى العربية قتحت معاك وجريت بسرعة ونقلت على الثاني والثالث فى وقت قصير, هي دوسة حلوه كده قرب ثلث الدواسة بس ده وإنت على الأول والثاني بس وبعد كده أقل دوسة بتديك سحب وسرعة ممتازة, طبعا حاجة زي دي إنت أكيد محستهاش فالمنوال لأن الموضوع بيكون مختلف إنت إللى بتتحكم بشكل كامل بالبنزين والدبرياج.
والله يجماعة حتت النتشه دي أنا ملاحظتهاش, مقصدش إنها مش موجوده بس أقصد محستش إنها مشكلة أو حاجة مش طبيعية أو إنها مباغ فيها بطريقة تحسسني إن العربية فيها مشكلة, بل بالعكس أنا كنت متوقعها من الأوتو, ودي برده إنت أكيد محستهاش لأنك إنت إللى بتنقل بنفسك مش بتكون دايس بنزين وخلاص والعربية هي إللى بتنقل زي الأوتو, الخلاصة هي لحظة هبوط الأر بي إم ساعت النقل وبس, معرفش هو ده إللى إنت تقصدة ولا حاجة ثانيه. برده ممكن تكون مقارنتك بينها وبين الإلانترا إللى كنت راكبها قبلها هي إللى حسستك بالفرق ده لو كنت ملاحظتش الموضوع ده في الإلانترا, بس مش شرط يكون ده عيب فالعربية.
صوت الموتور أنا ركزت معاه جدا من البداية من كتر ماقريت عن موضوع علو صوته ولأني ركبت موديل 2011 وحسيت بالموضوع ده شويه, بس أعتقد إن عزل الموتور فى الأوتو أحسن, بصراحة من وجهة نظري صوت الموتور مش هقول ملهوش صوت لكن فعلا على السلانسية ومن أول الثالث صوته يكا يكون مش مسموع, الطبيعي بتاع أي عربية, هو بس على الأول والثاني بيكون مسموع شوية لاكن بشكل طبيعي, يعني أعتقد ميفرقش كتير عن الفيرنا مثلا, وعموما بالنسبالى مفيهوش أي مشكلة.
باقى الحاجات من السخونية والتكييف لسه مقدرش أحكم عليها عشان مجربتهومش كفاية, فمش هفتي.
خلاصة الكلام, أنا بس حبيت أنقللك تجربتي مع العربية من وجهة نظري يمكن تهديك شويه وتخليك تبص للموضوع بشكل مختلف, إن مش بالضرورة أي شئ مختلف يكون عيب وممكن بس تكون مشكلة عدم تعود (أو تعود على شئ سابق مختلف) وكمان عشان تبقى فيه وجهة نظر أخرى (بإعتباري نقلت من حاجة أقل بكتير) عشان إللى بيفكر يشتري يعرف إن الموضوع ممكن يكون نسبي, وأعتقد إن بعد متنسى موضوع عيوب الصناعة إللى إتغيرت فالضمان ويعدي عليها شوية وقت, إحساسك هيتغير وهتستمتع بعربيتك. وخليك فاكر إنك مش هتاخد كل حاجة فى عربية واحده خصوصا إن للأسف فئه 70000 - 80000 فى مصر دي تعتبر بداية الركوب وللأسف مفيش إختيارات كتير أقل من كده.
روق ومتعقدش نفسك, كتالوج العربية بيقول متتوقعش الأداء الأمثل قبل 3000 كم ل 5000 كم, إديها فرصتها ومتتسرعش فالحكم عليها.
تقبل مروري ياباشا وارجو كلامي يكون ريحك شويه, متقفلش نفسك من عربيتك بنفسك, كفايه الناس إللى مجربتش أصلا وبتحاول تقفلك من العربية من غير مبررات, مش عارف بيحسسوني إنى إشتريت توكتوك!!!!
