[egypt_farmer]

الحلقه الاولى .. من حوالى اربع شهور شفت عربيه ماشيه تتمغطر فى الشارع وعليها علامه اسبرنزا وبصراحه شكلها عجبنى قوى
الحلقه الثانيه .. بما انى كنت بايع عربيتى ومحتاج اشترى عربيه حطيت فى دماغى التيجو كاحد الاختيارات اللى ممكن اجيبها
الحلقه التالته .. ولانى عضو فى اكتر من 10 منتديات للسيارات وبدون اى مجامله مصر موتورز افضلهم , بدات استفسر عن كل العربيات اللى استريحتلها سواء كانت زيرو او مستعمل واللى منهم التيجو
الحلقه الرابعه .. استقريت الاسبوع ده على التيجو ال1600 و قعدت ادور عليها استعمال على امل انى اجيبها كسر زيرو وتكون رخيصه 7 او 8 تلاف جنيه وما لقيتش بيتباع منها كسر الزيرو الا 2000 سى سى
الحلقه الخامسه .. امرى لله زيرو زيرو وخلاص " رحت اكتر من معرض ومنهم المصريه للسيارات لاقيت العربيه هناك ب 83000 جنيه علما بان سعرها 79900 جنيه ( ده عشان التسليم الفورى )
الحلقه السادسه .. التفاصيل فى المصريه كانت كالاتى : العربيه ب 83000 جنيه هدفع 50000 ويتبقى عليا 33000
بفايده 9.6 % اى 48 % فى الخمس سنين يعنى 814 جنيه قسط شهرى _ مصاريف اداريه 485 جنيه _ تامين شامل 2980 جنيه ( المصاريف الاداريه تدفع مره واحده , التامين الشامل يدفع كل سنه بس ينقص 15 % من قيمته ) _ المطلوب صوره البطاقه ووصل نور حديث يكون قيمته اكتر من 10 جنيه ( ده عشان المقدم اكتر من 50 % ) _ فيه هديه مع العربيه تلفزيون 14 بوصه وطقم دواسات
الحلقه السابعه .. كنت فى المصريه النهارده اديتهم صوره البطاقه ووصل النور ودفعت 500 جديه حجز والمفروض ان البنك هيبعتلى حد البيت يوم الحد وهيتصلو بيا يوم الاتنين
الحلقه التامنه .. استنوها يوم الحد ان شاء الله .. وبالمناسبه المسلسل له اكتر من جذء احنا بدئنا بالفكره والشرا وهنكمل مع بعض ان شاء الله فى العربيه نفسها مميزات وعيوب اول باول

من الالف الى الياء