[محمد حسن عبد الرحمن]

أحب أضيف لحضرتك كمان حاجة بخصوص سؤالك عن الشنطة ووسع الكنبة الخلفية الشنطة وسعة جدا جدا الكنبة الخلفية تعتبر معقولة ولو حضرتك قصير القامة وهتحتاج تتطلع الكرسى قدام هتبقى المساحة الخلفية ممتازة بس هى عامة كويسة ومريحة بالنسبة للتسارع والجرئ فوق الممتازة بس يشترط الحالة الممتازة والجيدة الصاج مش بالقوة بتاعت زمان بس بالنسبة للعربيات بتاعت اليومين دول يعتبر جيد جدا ويوجد بها أو حتى لو مش موجود تركبه وهو بار حديد يربط باطحتين المساعدين من فوق وكمان مصفحة من الألمنيوم بتاعت الفبريكة تركبه هى هتقل العربية معاك شويتين بس هتحميلك أسفل الموتور وهتمسك العربية من تحت علشان العجل ميفتحش لا على جو ولا برة وكمان خلى بالك فهى مشهورة زيها زى الـ 128 والريتمو بأنها بتفتح من عند العلب وتعمل شروخات بالحوض لذلك وجب تركيب البار بين الباطحتين بتوع المساعدين وكذلك المصفحة اللى بتركب من تحت بس برده هيحدث شروخات بس على المدى البعيد وحسب إستخدمك للسيارة وموفق بآذن الله فى سيارة ريجاتا تكون سليمة وربنا يارب يفرحك بيها ويديك خيرها ويبعد عنك شرها .

والسلام عليكم

أخوك محمد