عايز تظبط ال 128 ببلاش؟ تعالي اقولك ازاي ب 500 جنيه مش هتعرف عربيتك
انا حاليا بستعمل عربيه امي و هي 128 لحد ما الاقي 128 ليا ( الي يعرف واحده حنينه يقولي) عموما العربيه شكلها لما خدتها منها ضحك عليا الناس بس انا الحمد لله حاليا وصلت لمنظر شيك وسط العربيات
تعالو بقو اقولكم ازاي
1 شيل الاكصدامات خالص لان شكلهم عار(محدش بقي يقولي ازاي و مش ازاي و يحسسني اننا كلنا حول و ماشيين نخبط في الحيطان و العربيات الي حوالينا) و الي متمسك باكصدامه ممكن نقص الاكصام من اليمين و الشمال من بعد الاماكن الي بيتربط منها في الشاسيه و نقص بوز الضوافر الي بيبقي علي جناب العربيه و نركبهم تاني هيبقي صغيرين من تحت الفانوس لتحت الفانوس التاني
2 النمره الي قدام و الي ورا انا حطيتهم علي صدر العربيه من ناحيه اليمين و جبت لمبه نيكل بتاعه فيات 1100 استعمال شكلها كلاسيك و ب 30 بس
3 تهبيط العربيه ( محدش يقولي المطبات بقي و بتاع التهبيط هيديك سبات في الجري و الملفات علي السرعه العاليه ) اظن ده يستاهل تضحي برفاهيه انك تمارس رياضه الجري في المطبات الرياضه الرسميه للعواجيز المصريين ) وكمان شكل العربيه و هي ماشيه هيبقي حلو و هي بتطلع المطبات براحه و هي متهبطه
نيجي بقي للكاش الي هنصرفه
60 جنيه تهبيط بالصدادات كمان بتاعه التهبيط
خليها في بالكو و هنجمع مع بعض
4 شيل بقي الفانوس اليمين الوسخ ده و هات فلتر هوا رياضي بوصلاته (انا اخدته من واحد صاحبي كان معاه 127 و ربنا كرمه و جاب لانسر فداهوني ببلاش) بس سعره في حدود
100
5 حط بقي الفلتر مكان الفانوس و يبقي وش الفلتر بره العربيه ( نص الفلتر كده مثلا)
يبقي كده صرفنا 160 ركزو في الكاش الميزانيه محدوده
6 هاتلي طقم رنجات من بتوع الجنط ب 80 جنيه
ممكن تقفشهم من اي بتاع كاوتش يكون ركب جنوط لحد و اشتراهم منه و رش بقي الجنوط اسووووود و ركبهم
تبقي مصلحه برضه
7 فك بقي الفيبر الي علي جناب العربيه ان كان عتب ولا فيبر ابواب ولا داير رفارف( بس اوعي تكون مش راشش تحتهم و يطلعو باللون القديم ولا بدرجه تانيه )
8 هاتلي بقي مرايتين شاهين بطيخه تمنهم 70
يبقي كده صرفنا 310
ركبهم مكان مرايات الباب لو الازاز بتاعك حته واحده هيركبر بسهوله لو مس حته واحده خلي السمكري يساعدك مع انها مش محتاجه بس لو معرفتش يعني
9 هاتلي بقي ديل شكمان محــــــــــترم و حط تحت محترم دي 50 خط عشان متبزظش الطبخه علي بشلن ملح (انا اخدت ديفل من نفس صاحب ال 127 الي قلت عليه فوق ب 100 الندل خد مني فلوس هههههه)
المهم الديل في حدود 60 جنيه
كده صرفنا 370
10شيل بقي مساحه و خلي مساحه واحده و اشتري ريشه حته واحده ب 20 و ركبها مكانها
كده صرفنا 390
11 شيل بقي اي حاجه علي التابلوه و امسحه مسحه نضيفه بملمع تابلوهات لو ممكن اشحته طبعا ههههههه كل العربيات الي بتحترم نفسها فيها منه طبعا مش ال 128
12رول فاميه بلاك ب 15
كده صرفنا 405
محدش في مصر كلها النهارده مالوش صاحب لو اتنين منيعرفوش يفيمو فيمها كلها و اعملها شماسه فوق و تحت علي البربريز
13طبعا مش محتاج اقول ان الي عنده شبكه فوق السقف يحرقها بجاز وسخ و يرميها في الزباله و 14 الي عنده اريال معفن برضه يرميه و يجيب واحد كهربا ب 30 جنيه
كده صرفنا 435
15 هاتلي بقي عليه اسبراي احمر و تلات علب اسود ب 30 جنيه كلهم
كده صرفنا 465
16 من عند الناس بقي بتوع الورد البلاستيك المعفن ده روح اشتريلنا متر شبك بلاستيك بقلاوه
عرييييييض ب5جنيه
هات بقي المتر قصه نصين و ركبه علي شبكه العربيه بالفانوس و خلي فتحه مدوره لفلتر الهوا و رش الشبكه اسود منغير ما تبهدل الفلتر ولا الفانوس
(ممكن ترشها فبل ماتركبها ركبها بمسامير سن صاج و خلي بالك لاتكسر الشبكه الاصليه)
كده صرفنا 470 بس
17طبعا الي عنده البتاعه المعفنه البلاستيك الي علي الشنطه الي فيها نور دي يشيلها الي بيركب فيها النمر( احنا اصلا نقلنا النمر تحت)
فاضل معاك 30 جنيه فايضين من ال 500 اقضي بيهم و اسطبح و ادعيلي بقي
طبعا عشان نعمل كل ده مطلوب قدر لا باس به من المهاره اليدويه الي عند اي راجل مصري
و انا عن نفسي الوقت كان مسلي بالنسبالي مع اصحابي بس امي هتخرب بيتي عشان وطيت العربيه و شيلت الاكصدامات و فاميه و كده بس ولا اي حاجه الحاجه ام الاختراع
ارجو اكون افدت الموضوه شبابي اوي ممنوع للعواجيز ههههههه شكرا للقراءه و يارب اكون افدت مره تانيه
|