بسم الله الرحمن الرحيم
احب اشكر القائمين على المنتدى اولا للمجهود والعمل اللي بيقوموا بيه في نفع المجتمع احب اشكر كل الاعضاء اللي بيدورا على الحلال وبيتحرو الحلال في حياتهم ومنها انهم يشتروا سيارات بالتقسيط.
انا عاوز اقول مقدمة سريعة عن المعاملات الاسلامية وبعدين انقل لكم تجربتي مع شراء السيارات.
البيع بالاجل او التقسيط هو احد انواع البيوع الحلال في الاسلام. بس لازم شروط عشان تكون المعاملة (الصفقة) حلال انا هاذكر منهم الحاجات الاساسية:1 -ان تكون السلعة المباعة ملكًا للبائع، وألا تكون قد هلكت قبل التسلم.
2 - أن يحدد ثمنه قبل بيعه، فلا يبيع الرجل لرجل شيئًا دون أن يتفقا علي سعره، وأن يحدد كذلك وقت سداد الثمن علي حسب اتفاق يتم بينهما؛ كأن يتفقا علي أن يدفع المشتري ثمن السلعة في الحال، أو أن يتفق المشتري مع البائع علي السداد في وقت مؤجل.
3- أن تكون السلعة معلومة للمشتري علمًا تامَّا سواء أكان ذلك بمشاهدة المشتري السلعة أم بوصفها له وصفًا دقيقًا إن كانت السلعة غائبة عن مجلس البيع.فإن كانت السلعة غائبة عن مجلس البيع ووصفها البائع للمشتري، وكانت موافقة للوصف أخذها المشتري، أما إذا خالفت الوصف جاز للمشتري أن يرجع في الشراء.
4- لا يحق للبائع في بيع الأجل المطالبة بالسداد قبل التاريخ المحدد له في العقد.
5- اشتراط تسليم السلعة المباعة في بيع الأجل فوراً وحال التعاقد, لأن الثمن هو المؤجل في البيع هذا.
6- لا يجوز للبائع أن يشتري ما باعه بأجل, بثمن نقدي أقل, لأن هذا الفرق بين ثمن بيع السلعة للمشتري, وثمن شرائها منه والذي هو أقل, يعتبر ربا محرم شرعاً, ويصبح الهدف من البيع والشراء هو الوصول إلى إقراض وإقتراض ربوي, وليس البيع والشراء حقيقة.
7- لا يجوز للمشتري أن يشتري السلعة بثمن مؤجل, ثم يبيعها بثمن معجّل أقل, للحصول على النقود, لأن هذا لا يمثـّل بيع وشراء حقيقي, وإنما الحصول على نقد مقابل الفرق بين ثمن الشراء وثمن البيع, والذي يُعتبر ربا محرم شرعاً.
انا عملت بحث مفصل (ارجو من الله اني اكون مصيب فيه) عشان اشتري عربيتي بالتقسيط والحمد لله اشتريت فعلا ووصلت للاتي:
في مصر: في كذا معرض سيارات بيبيع عربيات بالتقسيط المباشر بمعنى انه يكون مالك للسيارة وبيبيعها مباشرة للمشتري اللي هوة حضرتك بدون وسيط ولكن بيضيف هامش ربح عالي يصل احيانا الى 13% في السنة من الثمن المتبقى ومقدم كبير نسبيا ميقلش عن 25% من قيمة السيارة وده مفيهوش اي مشكلة ولكن فيه شبهة ان احيانا العقد بيكون غير شرعي بمعنى انه بيفرض شروط غير جائزة مثل انه بيفرض غرامة عند التاخر في السداد او انه يفرض تامين اجباري من مكان معين .
نيجي بقة لافضل ناس في التعامل في المعارض من حيث التقسيط المباشر
انا رحت للشركة العالمية المتحدة للتجارة عبد اللطيف جميل ودول معروفين جدا ووكيل دايهتسو في مصر وعرفت النظام معاهم ايه- بصراحة الناس كويسين ومحترمين ومريحين جدا وعندهم عربيات كتيير بس بقة شروطهم اكتر واجراءاتهم اكتر بس من اقل المعارض في نسبة الربح وتمن العربية
خد عندك يا سيدي:
هيحتاجو جواب شئون العاملين باثبات الدخل ووصل نور (اثبات سكن) وبطاقة (اثبات شخصية) وهيحتاجو ضامن ومنه نفس الاوراق ولو في صلة قرابة محتاجين اثبات (يعني لو ام وابن يبقى شهادة ميلاد وهكذا)
نسبة الربح 9.5% ايا كان موقفك ايه ودي نسبة معقولة جدا دلوقتي وكانت اقل قبل كدة بس ظروف البلد هية المشكلة
الفكرة بقة ان الضامن والمشتري هيكتبو شيكات بمبلغ العربية بتاريخ استحقاق وقيمة معينة (المشتري شيكات شهرية والضامن سنوية او نصف سنوية حسب مدة القسط) والشيكات دي ما اسمهاش شيكات ضمان لان مفيش اي ورق بتمضي عليه بيقول كدة ومش موجودة في العقد يعني لو هتلعب بيدلك او هما مش شركة محترمة يبقي باي باي وهاجيبلك عيش وحلاوة على طول
طيب انت مش عندك شيكات يبقى هيدوك جواب لبنك كريدي اجريكول تفتح بيه حساب انت والضامن بمبلغ المقدم اللي بالمناسبة مش هيقل عن 25% من تمن العربية وتحط جزء في حسابك و جزء في حساب الضامن وتاخد دفتر شيكاتك بعد 3 ايام عمل
وبعدين وانت بتستلم السيكات تحول ميلغ المقدم لحسابه في البك وتاخد ايصال التحويل وتروح للمعرض تمضي العقد وتخلص الاجراءات اللي فاضية وتستلم بالكتير بعد يوم (لغاية ما يتاكدوا من تحويل الفلوس)
الحاجة الكويسة ان سمعتهم كويسة خالص وان مبيخدوش غرامة تاخير على السداد وده شرعى تماما بس هيطالبوك انت والضامن بالفلوس عن طرقي قضية في محكمة وحوارات بقة.
انا بقة مستريحتش لكذا حاجة ولكن لسة بفكر انا ومراتي هنشتري منهم ولا هنعمل ايه.
1- الشيكات اللي هيكتبها الضامن (بالاخص) بدون اي اثبات انها عشان العربية او انها شيكات ضمان
2- انهم مصرين انك تحول المقدم في حسابهم الاول وبعدين تكتب العقود بدوم اي اثبات ان الفلوس اللي انت حولتها بتاعت ايه بالظبط ومش عاوزين لا يستلموا الفلوس نقدي ولا حتى تكتب بيها شيك مستحق الدفع من حسابك لحسابهم.
3-العقد مش متراجع من الناحية الشرعية بنسبة 100% بس مفيهوش حاجة تقلق اوي واقرب ما يكون للشرعي.
الجزء الثاني هوة انك تتعامل مع بنك وانا عملت بحث عن البنوك اللي بتتحرى المعاملات الاسلامية الصحيحة ولقيت ان مفيش حد بيعمل كدة غير بنك فيصل وده انا سمعت ان التعامل معاه معقد - وفيه بنك البركة وده انا مسمعتش حد اتعامل معاه اصلا وفيه البنك الوطني للتنمية وده اللي ربنا وفقني واتعاملت معاه الحمد لله
ايه قصتهم بقة؟
اولا البنك معندوش البضاعة(العربية) زي كل البنوك لكن البنك بيعمل حاجة مختلفة عن كل البنوك التانية ومش بيدفع الفلوس للمعرض اللي انت هتشتري منه وخلاص- لو انت هتشتري عربية ب 100 الف جنيه و هتدفع مثلا 50 الف جنيه مقدم البنك بيقولك انه عنده معارض معتمده عنده بصفتها مخازن للبنك فتقوم انت تشتري من المعرض نص العربية 50 الف والبنك يروح يعمل عقد مع المعرض انه يشتري نص العربية ب 50 الف ويعمل معاك عقد بيع لنص العربية ب50 الف بالاضافة لربح البنك في عدد سنين القسط يعني لو نسبة الربح 10% في عدد سنين القسط 3 سنين يبقى البنك ياخد منك زيادة على 50 الف في 3 سنين 3*0.10*50=15 الف جنيه يبقى انت مطلوب منك تسدد 65 الف(50+15) على 3 سنين واحسبها بقى انت
ايه الضمانات والشروط (ما هو اكيد مش اي حد ولامؤاخذة هيعمل كدة ويتساوى الناس كلهم)
البنك حاطط مجموعة شروط عشان يضمن بيها حقه زي اي حد تاني فمثلا:
لو انت عندك وديعة في البنك ليها اجراءات معينة(هتفرق في الورق المطلوب منك ونسبة الربح في كل سنة)
و لو انت تعرف حد عنده وديعة هيبقى كانك عندك وديعة بالظبط
ولو مرتبك بيتحول على البنك لازم يكون نسبة القسط متتعداش 30% من المرتب ويطلبوا منك اثبات دخل ووصل نور و شوية ورق تاني وساعتها نسبة الربح هتزيد شوية كمان
ولو بتشتغل في شركة كبيرة ومرتبك مش بيحول ليها شروط تانية ولو شركة صغيرة شروط تالتة ولو مش بتشتغل شروط رابعة- الفكرة ان كل ما ضمانات البنك بتقل انك تسدد شروطهم واجراءاتهم تزيد ونسبة الربح تعلى بس انا سالت على كل حاجة ولقيتها افضل شروط واجراءات موجودة في مصر
والفكرة ان العقد تم دراسته من هيئة فتوى شرعية تابعة لمصرف ابو ظبي الاسلامي وهو عقد شرعي 100% ان شاء الله. و البنك ناس محترمي ومريح نفسيا.(بس كل ما الضمانات هتزيد هتلاقي تعامل مختلف شوية
)
من الاخر ممكن تتصل بيهم وهما هيوضحولك الحاجات الاساسية في التليفون بس لو ناوي بجد روح الفرع القريب ليك وقابل حد هناك (فرع مدينة نصر كويس وهناك الاستاذ شريف متعاون وفرع شبين الكوم المنوفية ممكن تقابل فيه الاستاذ احمد ياسين مدير الفرع وتقوله انك من طرفي وهيخدمك ان شاء الله)
انا كده خلصت واسيبلكم الحكم ولو حد عنده اي استفسار يكلمني وان شاء الله ارد عليه.
جزاكم الله خيرا وبارك اللهم لي ولكم واسالكم الدعاء لاخيكم بظهر الغيب
والسلام عليكم ورحمة الله و بركاته.