[AbOnOrA]

رأى حضرتك يا باشمهندس يحترم جداً طبعاً وانا معاك فى ان الحفاظ على النفس البشرية مقدم على اى شىء اخر بس الكلام ده كله لو بنتكلم عن حرامى غسيل مثلاً لكن الحرامى الهجام زى ما بيقولو عليه ده اخطر انواع الحرامية على الاطلاق لانه مش داخل يرتكب واقعة سرقة بس لكن ده وارد يعمل
سرقة بالاكراه وتهديد بالسلاح وقتل وهتك عرض وحتى لو ملقاش حد فى وشة وحتى لو ملقاش حاجة يسرقها وخرج هيسيب برضو اهل البيت فى حالة نفسيه طويلة المدى من الرعب والترصد ميحسش بيها الا اللى جربها

انا عن نفسى تعرضت لسرقة بيتى من كام سنة والحمد لله مكانش حد فى البيت
الحرامى اللى جالى غالباً مكانش فى وعية لانه قلب الشقة بشكل هستيرى مش طبيعى لدرجة حيرت ظباط المباحث نفسهم وبشهادتهم مشافوش حرامى بالهمجية ديه قبل كدة
والحمد لله انه من كتر الفوضى والكركبة اللى عملها معرفش يلاقى حاجة ياخدها فدخل المطبخ وفتح التلاتجة وطلع اكل واخدة قعد على السفرة اكل ومشى !!

مش محتاج اقولك تتخيل لو كانت زوجتى واولادى رجعو لقوه موجود كان عمل فيهم ايه
بس تخيل هما قعدو كام سنة بعدها ويمكن لحد دلوقتى يخافو يدخلو الشقة ليكون فيه حرامى جوة !
زوجتى قعدت بعدها فترة تفتح باب الشقة وتسيب العيال بره وتخش تبص تتاكد ان مفيش حرامى !
ده غير المصاريف اللى راحت على التأمين والحماية لمنع تكرار ده لكن بتفضل فيه مرارة واحساس بالألم النفسى من مجرد محاولة فاشلة فمبالك بظروف اسواء من كدة

والشاهد ان درء المفاسد اولى من جلب المنافع وبالتالى منع حرامى من انتهاك حرمة البيت ابتداء باى شكل وبكل قوة اولى من من الحفاظ على حياتة لان قتله فى حد ذاته حفاظ على حياة أهل البيت وسلامتهم

وكل ده واحنا بنتكلم فى بيت واسرة امال لو بنتكلم فى مخزن فيه بضاعة مثلاً يعنى حسبة فلوس مش ارواح بس ! نفس الكلام طبعاً من حقك تحط غفير مثلاً ومعاه سلاح قاتل يتعامل بيه مع اى حد يقتحم المكان

الخلاصة .
بالمنطق الحفاظ على الحياة مقدم على اى شىء ديه حقيقة والحفاظ على حياة اهل البيت وامنهم اولى من حياة المقتحم

وبالشرع درء المفاسد اولى
وفى القضاء الشرعى السعودى كمثال فيه احكام اعدام وتطبيق حد الحرابة بتصدر فى حق مقتحمى المنازل او حتى المصالح العامة ولو كانت اجنبية

وبالقانون طالما التعامل مع المقتحم تم فى محيط منزلك او حيازتك فده دفاع عن النفس المهم متستخدمش سلاح غير مرخص ولو استخدمت تثبت انه كان فى حيازة المقتحم