الحمد لله إشتريت شارك إمبارح
الحمد لله إشتريت شارك |إمبارح مع إني كنت بدور على عربية مانيوال لإني مش متعود على الأوتوماتيك
بس الحمد لله
وقبل ما أستلم العربية كنت هتصل بالمعرض وأقوله إلغي حجز العربية لإني قريت عن صيانة دياموند إنها زبالة وآخر قلة أدب وكلام من ده وتجارب سيئة من الناس معاها
لكن قولت ما كل التوكيلات كده ده أحنا في مصر إنت نسيت ولا إيه
المهم ما أطولش عليكم
و هقولكم عملت إيه ولو في حاجة تنصحوني بيها ياريت تعرفوني؟
أول حاجة أنا إشتريت العربية من معرض أبو حتة مدينة نصر الفئة التانية بسعر 145 ألف
كنت عاوز السيلفر بس قالي السلفر هيتأخر شوية وممكن تحجزه وينزل أغلى وكلام البياعين اللي إنتم عارفينه
المهم قالي لو إسود أو أحمر هتستلم دلوقتي حالا لإنهم موجودين وب 145 بدل 146 (كلام بياعين)
المهم حجزت بألف وتاني يوم روحت إستلمت العربية لون أحمر وإداني هدايا طقم دواسات شكله وحش أوي وشماسة هو ده اللي طلع من زمتهم
المهم شيكت على العربية وتأكدت إن كله تمام بشكل مبدئي جربت المرايا والدركسيون والمساحة والبخاخات والكاسيت ولفيت حوالين العربية الحمد لله تمام وكانت عاملة 7 كيلو
المهم إداني ورقة فيها رقم شاسية العربية وختمها وقالي دي تمشي بيها لغاية ما أجيبلك شهادة البيانات بعد 3 أيام وتروح ترخص بيها
سميت الله وطبعا حاسس إني أول مرة أسوق أساسا وخايف من الزحمة وخاصة الأوتوماتيك مفيش بيني وبينه حب زي معظم الناس
وطلعت على بنزينة عباس العقاد مليت التانك ب 150 جنيه إديت بتاع البنزينة 205 على أساس ياخد ال5 تيبس لقيته رجعلي ال 5 وقالي خلاص كده ال50 الباقية حلاوة العربية الجديدة ده أحنا 8 طبعا دي قلة ذوق وقلة أدب كمان وأنا لو كنت بعربيتي القديمة وخد جنيه زيادة كنت سمعته ألفاظ ما عرفهاش قبل كده بس المهم طلعت 20 جنيه قالي لا كفاية الخمسين قولتله هات الخمسين وخد ال 20 دي فخدها وهو متكدر
ده خلاني ما أروحش لبتاع كاوتش يظبطلي الهوا مع إني عارف إن الهواء لازم ينزل لإنه متعلي أوي وقولت لما أروح عندي منفاخ بمقاس أبقى أعملها بإيديا العربية دي شكلها هيخلي الناس يشتغلوني
( لأاااا ده أنا من عابدين يا فضائيين هههه)
المهم الطريق لغاية البيت كان طويل وماشي حاسس إن الناس كلها هتخبطني زي ما اكون أول مرة أسوق عربية مع إني بسوق بقالي 18 سنة وغواي غرز كمان بس الفلوس بتوجع
وأنا ماشي العربية الحمد لله تمام بس طبعا ماشية مش راسيه لإن الكاوتش مظبوط على 45 بحالهم المهم أنا لسة راكنها وما ظبطش الكاوتش يتهيئلي أظبطه على 30 صح
بس في حاجة عايز أسأل عنها أنا شديت شدة بسيطة على دواسة البنزين حسيت العربية إستنت ثانيتين عبقال ما بدأت تقول ده طبيعي في الأوتوماتيك أو في الجديد عموما ولا كده في عيب والفتيس مأخر؟؟؟؟؟؟!!!
حاجة تانية أنا من كلام الناس بقيت خايف من دياموند فإيه الحل؟؟؟؟؟
تنصحوني أعمل إيه؟
وأخيرا بشكر كل اللي هنا في المنتدى لإن كان ليهم فضل كبير بعد ربنا عليا إني أفهم العربية دي وأعمل إيه وأنا رايح أشتريها
|