20-09-2011, 04:03 AM
|
|
|
|
تاريخ التسجيل: Aug 2011
الموقع: 6 اكتوبر
المشاركات: 401
|
|
رد: لماذا اشتريتك يا لوجان ؟
يا جماعة بجد الف شكر على اهتمامكم ..
و معلش بتأخر بس ظروف الشغل ..
عموما نكمل ..
احنا كنا و صلنا للرينو الاسكالا ..
خدني صاحبي و قالي طالما هتدفع 70 الف في رينو خليهم 80 الف و هاتلك عربية قيمة
و وراني الاسكالا..
و كنت اول مرة اشوفها ..كبيرة و طويلة و شكلها شيك و فول اوبشن مانيوال و ب 82 الف جنيه
بس اول ما قالي هي هي النيسان الصني نفسي قفلت منها
انا و سامحوني يا جميع النيساوية لا احبذ الصني على الاطلاق 
العربية واسعة و اوسع من النيسان ..بس و دي لكل اللي بيعاني من عقدة الخواجة تقفيلها من جوه اوحش بمراحل من الصني المصري 
عليها فانوس شابورة كبير جدا و انا ضعيف قدام فوانيس الشبورة..
هجين ياباني كوري تركي فرنسي غريب ..
الاخ بتاع المعرض اكد انه مبيعاتها هايلة..امال مبنشوفهاش ليه يا عمنا في الشارع
و بعدين الحلوة في منها اوتوماتيك .. و ما ادراك ما هو الاتوماتيك ..
نيسان و عليها علامة رينو ..فكرة موش بطالة و العربية طبعا هتقف اسد قدام العيادة
و دخلت على مراتي و قولتلها خلاص هي الاسكالا .. و ضحكت نفس الضحكة 
و خد عندك التعليقات ..
عايز تركب نيسان ما تشتري نيسان و خلاص ..
اركب عربية تركبها و يركبها غيرك من بعدك..
متشتريش سمك في ميه ..
ابعد عن الرينو و غنيله ..
و في ملاحظة هامة ..الناس اللي بتشتري عربية بيمشوا في الشارع يركزوا في كل عربية ..يعني تقريبا انا لقطت كل الاسكالات اللي اتباعت في الشارع 
طبعا الكلام في المنتدى هنا عليها قليل .. و ده سبب كافي للقلق ..
و نسيت اقولكم انه طلعت على توكيل النيسان لقيت الصني غليت بقت المانيوال ب 89 الف
ليه موش عارف ؟؟؟؟؟
المهم كنت واخد اتنين صحابي غاويين عربيات في معرض عربيات في المهندسين
نقوم نلاقي ايه .. الريو و اقفة جنب الاسكالا ..
و ندخل نتفرج على الريو ...شيك جدا جدا جدا من جوه .. و تقفيلها انضف مليون مرة من الاسكالا ...
ال 1400 اتوماتيك ب 87 الف بس..
يا بلاش ..
و احنا التلاتة اجمعنا انه الريو افضل بمراحل ...
و كيا معروفة .. و عربية يا اخي بنشوفها - ساعات - يعني بتمشي في الشارع 
بس و ده شيئ غريب متسألش حد عليها الا لما يشكر فيها ..
و برده الكلام هنا عليها قليل
ما عدا تجار العربيات طبعا ..كلهم اجمعوا على فشل العربية الريو
و دخلت على مراتي و قلتلها خلاص هي الريو ..
و فرحت جدا بيها ...
صغيورة و اتوماتيك و اخوها بيشكر فيها جامد 
و قلت خلاص هي الريو و نتوكل على الله بس نسأل حد كانت معاه ...
اني الاقي حد .. طبعا لأ
و موش عايز اقولكم دماغي كانت عاملة ازاي ..
هاتها اتوماتيك و ريح نفسك ..زود سنة في المقدم .. زود سنة في القسط
الاسكالا كبيرة ,, محدش يعرفها,,الريو جميلة (سيراتو صغيرة) بس برده محدش يعرفها ,, مراتك هتقدر تاخدها و تقضي مصالحها بيها,, لوجان و وفر على نفسك ,, لانوساية كسر زيرو و متدخلش في اقساط و شيكات و بنوك و حوارات ,, و دماغي هاتك يا لف 
ثم حدث شيئ مصيري اخر..
واحد صاحب واحد صاحبي جاب الريو الاوتوماتيك ..و وافق اني اجربها
و خدت معايا الاتنين صحابي اللي اعجبوا بيها معايا ..
و جربتها ..
و قفلت منها ..
جراية و مليانة اوبشن.. بس ضيقة فعلا..يعني واحد بس هو اللي هيقعد مرتاح ..اللي قاعد قدام او اللي قاعد ورا
و بعدين عفشتها ..مفيش طوبة و لا زلطة الا و حسينا بيها ..
لا ترقى للتوقعات .. و الصني فعلا احسن منها ..
فرجعنا للسكالا .. او الصني ..
و لعبت الصني في دماغي ..
و دخلت على مراتي و قلتلها هي الصني ..
و اكيد انتوا عارفين رد فعلها كان ايه 
ثم حدث اخر شيئ مصيري ..
خدت اللانسر من الحاج في مشوار .. و افتكرت اد ايه هي حلوة في السواقة
و سافرت لطابا كان عندي شغل هناك..
و هناك و سط الطبيعة الساحرة قعدت مع نفسي و خدت قراري مع نفسي ..
و ده بقى نأجله للمرة الجاية ..
طولت عليكم ..
و تقبلوا سلامي 
__________________
Dr.wael el7yran
|