[المناور]

نبدأ بتجربتى مع العربية من موضوع سابق

أنا معايا كيا برايد 96 هاتش باك 1100 سى سى والعربية كويسة معايا والحمد لله حتى انى فكرت فى وقت من الاوقات لما اغير اجيب السيدان منها اللى هيا 1300 سى سى بإذن الله .

بالنسبة للبنزين العربية يادوب بتشم بنزين هى المفروض بتعمل من 5.5 إلى 6 لتر فى ال 100 كيلو لو ماشى طوالى وحوالى 7 لو ماشى فى المدينة ، ممكن تمشى العربية ببنزين 80 عادى خالص بس من حين لاخر ابقى حط 90 علشان تفوق العربية لان كتر ال 80 بيخليها تسقف وسحبها بيبقى زفت ولو مشيتها على 92 زى ما أنا عامل حتلاقى عربيتك جراية بشكل غريب ، قطع الغيار رخيصة جدا يعنى لو اشتريت العربية وغيرت طقم السيرفس حاتصرفلك بتاع من 200 إلى 350 جنيه أول عن اخر ويمكن أقل كمان كمثال سير الكاتينة ب 45 جنيه سير الدينامو ب 15 جنيه فلتر الهواء 20 البوجيهات 35 المساعدين صينى ب 290 والاصلى ب 400 تيل الفرامل القدمانى ب 45 والخلفى ب 60 طقم الدبرياج كله على بعضه يعمله بتاع 350 والطنابير بالبلى بالتيل الخلفى يعملوا بتاع 300 جنيه الفانوس الامامى أو الخلفى ب 70 جنيه وفانوس الاشارات ب 15 جنيه وعامة قطع الغيار متوفرة فى شارع دمشق عند الجندى وده احسنهم وعند حلمى سليمان فى التوفيقية ، العربية سهلة فى الميكيانيكا فمش محتاج حد مخصوص بس ماتعملش زيى وتروح لاى حد لانى اتلسعت فى الأول مع ميكانيكى مابيفهمش بهدلى الدنيا ولعبلى فى التاكيهات والكربراتير وخربلى الدنيا وكرهنى فى العربية حتى انى نزلت اعلانات لبيعها وحتلاقيها هنا بس ربنا كرمنى بواحد تانى رجع ظبطلى الدنيا كلها وساعتها حسيت بقيمة العربية .

العربية واسعة من قدام وورا يعنى أنا طويل شوية 183 وبرجع الكرسى لورا وعلى الرغم من كده اللى بيقعد ورا لو طوله عادى بيبقى مش محشور بل لو الكرسى اللى ورا راجع سنة ممكن واحد طويل يقعد ودى أنا جربتها بنفسى ولقيتنى قاعد مرتاح ورا ، العربية عريضة شوية عن الاونو فده بيديها ثبات احسن بس هى برضو ما تصنفش من الانواع الثابتة على الارض يعنى ماتتهورش وتزيد عن 100 العربية أنا جيبت بيها مرة 140 من قبيل التجربة وماكررتهاش تانى بس كتير كنت بامشى بيها على 120 ده ايام الشقاوة ، العربية عالية عن الارض وعمرى ماحكيت فى اعلاها مطب حتى لما كنت محمل العربية على اخرها وفيه تلاتة على الكنبة ورا برضو ما بحكش لان العربية عالية فعلا ، العفشة ناشفة شوية فأى هبد أو تكسير فى الأرض حاتحس بيه جوا ، ابعاد العربية كويسة جدا سواء من قدام أو ورا فسهل تحفظه بسرعة ، بالنسبة لاعادة البيع العربية بياعة ولو حبيت تبيعها الف من تلاقيه يشتريها على سبيل المثال أنا لسه من قيمة اسبوع لقيت الكهربائى بيسألنى لو عايز ابيع العربية

عيوب العربية أولا مافيهاش باور فبتعذب عذاب السنين فى الركن ثانيا مافيهاش تكييف فبتسلق جوا العربية ودى حاجة مرتبطة بفترة الصيف ثالثا الصاج خفيف شوية والعربية بوجه عام خفيفة يعنى لو ماشى على 80 أو 90 وجت من جنبك عربية ماشية على سرعة كبيرة أو نقل حجم كبير تحس ان الهوا بيهز العربية رابعا الشنطة تعتبر مفيش علشان هاتش باك خامسا المرايات الجانبية ثابتة مابتتقفلش فاللى رايح واللى جاى بيلطش فيها بس هى والحق يقال ناشفة قوى كذا مرا تتخبط المرايات منى خبطات جامدة ولا كأن حاجة حصلت اصلا .

أنا جيبت العربية وهى عاملة 170000 الف كيلو وفيه ناس حذرونى منها لان الموتور كده خلاص فى اواخره وكلام من ده بصراحة العربية كسفتهم كلهم وعمرها ما قلت بأصلها معايا ولا وقفت فى طريق وصوت موتورها لسه كويس على الرغم من عدد الكيلومترات الكتير بل وساعات بتجرى معايا جرى بابقى مستغربه من عربية 1100 وعلشان هيا مراعيانى أنا كمان براعيها وبحس ان كل قرش بصرفه فيها مش خسارة .