واضح يا اتش باشا إنك حكمت عقلك في الموضوع .. و كويس إنك عملت كده بدري قبل ما كنت تجيب العربيه و بعد اسبوع و لا شهر تبتدي تاخد بالك من الحاجات دي و تقول يا ريت اللي جرا ما كان ...
خصوصا إن شغفك بالعربيه و استعجالك كان مخليك مش قادر تستنى حتى لحد ما تجيب اللون اللي عاجبك و كنت بتقنع نفسك باللون الموجود ...
البرافو فعلا تحفه و جميله جدا ... لكن في حاجه انا شخصيا مقتنع بيها وممكن تفيدك في رحله البحث عن العروسه المناسبه
الطلاينه افضل ناس في تصميم العربيات لأنهم بيصمموا العربيات بالعاطفه Design Trough passion
وده معناه إن الطلاينه بيصمموا العربيه كأنهم بيعملو عمل فني .. لوحه .. تمثال .. وبعد كده يدوله روح ... و المواتير الايطالي مشهوره بأدائها وتجاوبها الممتع ... فتحس إن العربيه بتجري ومع إنها واقفه في مكانها !!
وطبعا لما ييجوا يحولو الكلام ده للواقع بتقابلهم بعض المشاكل فيبتدوا يحلوها دون الاخلال بالشكل النهائي ...
أبسط مثال .. الكاونتاش .. تعتبر ايقونه من لامبورجيني .. و فضلت من 74 ل 90 لحد ما ظهرت الديابلو ..
وبالرغم من الولع الشديد بيها لكن دايما يقولو إنها صعبه جدا في ركوبها و تبقى قاعد معووج لأن مفيش مكان لرجلك الشمال !!!!
ولازم تكون رياضي جدا علشان تعرف تركبها ... والا مش حتعرف تخرج من الباب الا على ايديك !!!!
الكونتاش من جوه ... اوعى رجلك (شوف الدبرياج فين و الكرسي فين !!!)
باب الكونتاش .. ورينا شطارتك .. لو جدع تخرج ... اذا عرفت تدخل أساسا ...
لكن بالرغم من كده ... الكونتاش بهرت العالم بشكلها وادائها اللي عامل زي الفرس الغير مروض
أما الالمان فالتصميم بيتم من خلال الوظيفه Design Trough Function
يعني بيصمموا العربيه من خلال القواعد التصميميه الاول .. الابعاد و النسب الادميه ... حجم الحوض اللي يستوعب الموتور ... اماكن الزراير في التابلوه ...
وبعد كده يصممو الshell او الغلاف الخارجي اللي بتشوفه .. و طبعا بيطلع التصميم تقليدي و نمطي لأنه مقيد مسبقا بمحددات ... وبالتالي التغيير بيكون في اضيق الحدود ..
ابسط مثال .. اتفرج على تابلوهات فولكس .. الجولف زي الجيتا زي الباسات زي البولو زي الشيروكو ...
اختلافات بسيطه لكنها روح واحده ...
شوف الجولف بقالها كام سنه بنفس الشكل ... لكنها سياره العام 2009
البورش 911 بقالها 50 سنه شكلها متغيرش .. لأنهم مقتنعين إن ده الشكل العام المثالي و بيطوروا و يجودو في التفاصيل و التقنيه
من الاخر ...
شرا العربيه هو عقد زواج فعلا ... لكن لو بتشتري عربيه ايطالي فأنت كده زي اللي شاف واحده جميله جدا فاتجوزها من غير ما يعرف طباعها كويس ..
و لو مكنش حبها واكل قلبك و عقلك ... مش حتقدر تعيش معاها كتير !!!
لو حتغلب عقلك ... تبقى الليون ..
ولو حتحسبها بعقلك بس .. تبقى الجولف ..
ولو بعقليه الشارع المصري .. حتبقى الجيتا