[شريف رشيد]

ححكيلك على تجربة حصلت معايا بخصوص القرب منى. أنا ساكن فى الهرم و عارف أن اللى بيفهموا فيها فى الحرفيين. بس قلت أروح لحد قريب منى أريح. أنا بتعامل مع ميكانيكى فى فيصل بيشتغل فى توكيل دايو (لأن عربيتى لانوس) وريتله العربية الأول. الراجل كان صريح معايا و قالى أنا ماشتغلتش فيها قبل كده بس بعد ما بص على الموتور قالى ممكن أعملك الشغل ده. بالمناسبة الشغل ده كان تغيير طقم القلاتر(بنزين و زيت و هواء) مع تغيير طقم السيور(كاتينة و دينامو وتكييف) بس. المهم قعد فيها نص يوم تقريبا. و الحق يقال كان حريص قبل ما يفك حاجة و يركبها. المهم أن بعد ما خلص سمعت صوت غريب فى الموتور وقال لى ده الزيت الجديد لأنه خفيف و لما غيرت اليت لنوع تقيل الصوت هو هو و هنا قال لى ده صوت سبايك و الموتور محتاج يتغير. بصراحة إستغربت لأنى كنت كاشف على العربية قبل الشراء و حالة الموتور جيدة (قال لى يمشى بيك من 60 الى 70 الف كيلو) المهم إقتنعت بكلامه و قلت المدام تتعلم على الموتور ده لحد ما تجيب أجله. بعدها بيوم جبتلها جوز كاوتش من المعادى و كان فى ميكانيكى جانبة قلت أسأله على موضوع الموتور ده. الميكانيكى فتح الكبوت و قعد يتفرج عليها لمدة 15 دقيقة و قال لى الموتور ده مش موتورها ده موتور إستيراد لأن فيه الجهاز ده بتاع البيئة و الموتور ده متركب عليها ومش بتاعها. طبعا صدمت و كنت حكلم الدكتور اللى أشتريتها منه لحد ما بصيت فى النت و لقيت موتورها صورة طبق الأصل من مواتير الكانشل. بعدها قلت مابدهاش أروح للحرفيين و رحت لسيد الفراش فى للحرفيين و فى ثوانى فتح العمة و ضبطها و طلع إن صوت الخبط ده من العمة اللى فكها الميكانيكى الاول لما غير فلتر الهوا.
أنا قلت لك القصة دى علشان متفكرش فى موضوع القرب من مكانك المهم توديها للى فاهم فيها. فنصيحة روح الحرفيين هناك حتلاقى ناس كتير شغاليين فيها و حافظينها زى سيد الفراش و عنوانهم و تيليفوناتهم فى القسم. ياريت أكون ماطولتش عليك. بس انا بوفر عليك تعب حصل لغيرك من موضوع القرب ده.