[borio1704]

المشاركة الأصلية كتبت بواسطة marwan abbas الله ينور يا باشا على الشرح بس سؤال ينفع الغى الثرموثتات الموجود فى الكوعة

إلغاء الثرموستات ده اختراع من الميكانيكيين المصريين عشان يريحو دماغهم من مشاكل سخونية العربيات، يمكن يبقى له أسبابه لما قطع الغيار ما تبقاش موجودة.

لو عرفت الفايدة من ثرموستات الكوعة هتعرف ينفع نشيله ولا لأ

ثرموستات الكوعة هو الوسيلة الوحيدة للوصول والمحافظة على درجة حرارة الموتور ثابتة أثناء التشغيل من غير ما تتأثر بحرارة الجو الخارجي أو سرعة العربية

طيب ليه درجة حرارة التشغيل لازم تبقى ثابتة؟؟

الموتور عبارة عن أجزاء معدنية، والمعادن بتتمدد بالحرارة... وتنكمش بالبرودة

لما الموتور بيبقى بارد.. الأجزاء الداخلية بتبقى منكمشة بطريقة ممكن ما تبقاش محسوبة .. وده بيعمل تآكل ما بين الشمايز والبساتم وعمود الكرنك ده غير إن الزيت ما بيكونش وصل للزوجة الصحيحة للتزييت.

من الآخر... الموتور البارد موتور بيفوت بسرعة.

ده غير إنك في الشتا لو سقت على طريق سريع ... الموتور هيبرد، وده هيزود استهلاك البنزين لإن كفاءة الحرق ما بتكونش مثالية، وممكن تخلي العربية تهبب من الشكمان.

يعني... لما تشيل الثرموستات.. هتفوت موتورك وتصرف فلوس زيادة على البنزين وكمان مش هـتتمتع بأداء العربية



فكر في الموضوع من ناحية تانية

ينفع جسم الإنسان يشتغل وهو سخن أو بارد؟؟؟؟؟ ربنا خلقنا ودرجة حرارة جسمنا 37 عشان جسمنا يشتغل بأعلى كفاءة... لو درجة حرارة جسمنا نزلت أو طلعت يبقى فيه خلل.



...