عرض مشاركة واحدة
  #1  
قديم 16-09-2013, 03:35 PM
الصورة الرمزية sayed2077
sayed2077 sayed2077 غير متواجد حالياً

من انا؟: انا مش فارس ولا فتى احلام انا زحمة وربكه وشغل جنان
التخصص العملى: طالب هندسة قسم اتصالات
هواياتي: الكمبيوتر و السيارات
 
تاريخ التسجيل: Jul 2011
الموقع: القاهرة
المشاركات: 1,405
sayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond reputesayed2077 has a reputation beyond repute
مميز الجزء التانى من تجربتى مع زيوت ومرممات زادو XADO بعد 1500 كيلو متر من العمل الشاق


السلام عليكم ورحمة الله وبركاته

انا كنت عملت موضوع عن تجربتى مع مجموعه زيوت و مرممات زادو XADO

وده الرابط بتاع الموضوع

http://www.masrmotors.com/vb/showthread.php?t=117294


وكنت قولت ان الموضوع هيبقى طويل عن التجربه وانى هقول نتايج التجربه سواء بالايجاب او السلب

فانا قولت استنى شويه عقبال ما اعمل عدد كيلو متر كبير شويه
وفعلا الحمد لله عملت الى الان 1500 كيلو متر من العمل الشاق وهحكيلكم على التفاصيل بكل شىء

نبداء
بسم الله الرحم الرحيم

المنتجات اللى اخدتها واعطاها ليا صديق عزيز جداا انا مش عارف اقول اسمه ولا لا على سبيل التجربه

1:عبوة زيت 4 ليتر XADO HOT RODE وديه مكافئه لزيت شيل هيلكس الاصفر بلاضافه الى وجود مجموعة مرممات الماتور بتكنولوجيا النانو فيها (اللى بيسأل ايه هى المرممات بتكنولوجيا النانو يقراء الموضوع السابق وهيعرف كل حاجه )
2:ثلاث انابيب زادو مرممات للموتور (راجع الموضوع السابق لتعرف وظائفها وفائدتها )
3:انبوبة XADOمرمم للقتيس المانيوال (راجع الموضوع السابق لتعرف فائدتها )

مع العلم انى وقتها كنت لسه عامل نصف عمره للموتور وكنت حاطط زيت التعاون 1000 كلم وكان فى اخر ال 1000 كلم كان صوت الماتور عالى جدااا وخشن

وكنت المفروض بعدها هغير دسك واسطوانه وكنت هغير زيت الفتيس

المهم وقتها اخدت مجموعة الزيوت وتانى يوم على طول روحت غيرت دسك واسطوانه

ورحت حاطط زيت الماتور السابق ذكره و حطيت انبوبة مرمم بتاع الموتور و غيرت زيت الفتيس وحطيت انبوبة مرمم زيت الفتيس (مع العلم ان الفتيس عندى فيه ونه للاسف وصوته عالى جدااا بعد سرعة ال 100 )

المهم ساعتها كان العداد بتاع العربيه 158 الف كلم بالظبط

عدت اول 200 كيلو وكان الملاحظ ان صوت الماتور انخفض جامد عن الاول وحطيت الانبوبه التانيه من مرمم الماتور ولكن لا يزال صوت الفتيس هو اللى وحش (مع العلم ان الزيت القديم اللى نزل من الفتيس كان فيه شحم والظاهر ان اللى باعلى العربيه الفتيس كده كده كان بايظ معاه وقام حطله شحم علشان الصوت بتاعه يبقى طبيعى )

بعدين عدت 200 كيلو كمان يعنى عدت 400 كيلو منذ بدء التجربه مازال الماتور محافظ على هدوءه الشديد وحطيت العبوه الثالثه والاخيرة من مرمم الماتور ومازال صوت الفتيس عالى خصوصا بعد سرعات ال 80 بيبقى فيه ونه بعد كدا تحس ان الفتيس بيتكتك


بعدها عدت 600 كيلو منذ بدء التجربه ومازال الموتور بسم الله ماشاء الله عليه محتفظ بهدوئه مع عدم تغير منسوب الزيت نهائيا ولو ملى واحد من عصاية قياس منسوب الزيت
ولكن لازال صوت الفتيس مرتفع ولم يتغير حالة

ثم تم عمل اول 1000 كلم ومازال الاتى

1:صوت الموتور منخفض ومحافظ جدااا على هدوئه
2:السحب بالسيارة اكثر من رائع مع الاستجابه السريعه لدواسة البنزين
3:منسوب الزيت بعد 1000 كلم لم ينقص ملى واحد مع تغير لونه للاغمق وهذا يدل على نجاح الزيت فى تنظيف المحرك من الداخل على اكمل وجه
4:لزوجة الزيت ثابته بسم الله ماشاء الله عليه
5:الحرارة رغم الحر الشديد جدااااا و وقفة الزحمه الشديده فى كل مكان فى القاهرة دائما فى درجاتها الطبيعية مؤشر الحرارة عمره ما زاد على النصف رغم فعلا انى يمكن عملت اول 1000 كيلو متر ديه على الغيار الاول والتانى بسبب الزحمه والمعروف ان القياده فى الزحمه ترهق زيت الموتور جداااا وتفقده لزوجته الا انه بسم الله ماشاء الله عليه مازال محتفظ بكفائته تماما
6:انا يعتبر عملت اول 1000 كلم دول وانا مشغل التكيف فما بالك بقى انت مشغل تكيف و طول ال 1000 كلم دول انت واقف فى زحمه
اما بالنسبه للفتيس فصوت التكتكه اختفى شوية ولكن مازال صوت الونه موجود والصوت العالى موجود بس كده افضل من الاول قليلا وانا عارف ان الفتيس بايظ بس ربنا يسهل واجيب فتيس استيراد افضل من اللى عندى ده

المهم جيت بقى من حوالى ثلاثة ايام وقولت انا واسرتى اننا نسافر بورسعيد نقضى يوم هناك نغير جو ونرجع تانى ساعتها جم قالولى هتغير زيت قلتلهم لا هنسافر على الزيت اللى فيها يابنى مش المفروض احنا قبل ما بنسافر بتخلينا نغير زيت الماتور قلتلهم لا مش هسافر ولا هعمل حاجه وفعلا مشينا من القاهرة يوم الجمعه الساعه 7.30 صباحا وصلنا بورسعيد الساعه 10.30 موقفناش طوال الطريق نهائيا واخدت المشوار كله مره واحده بدون اى استراحه متوسط سرعتى طوال الطريق 100 كلم فى الساعه مش بيقلل سرعتى غير اى زحمه على الطريق او مطبات صناعية

وكان طول الطريق بالظبط حوالى 220 كلم وكان بداية تحركى زى ما قولت الساعه 7.30 صباحا وكان لغاية قبل ما نوصل بورسعيد بحوالى نصف ساعه كان الجو كويس شوية لغاية ما جينا قبل بورسعيد بحوالى نصف ساعه لقينا الجو بقى حر جداااا روحنا قافلين الشبابيك وشغلنا التكيف لغاية ما وصلنا بورسعيد

وكان بصراحه الحرارة طوال الطريق المؤشر على الربع حتى اخر نصف ساعه لما الجو بقى حر وشغلت التكيف برضوا المؤشر ثابت على الربع زى ما هو بسم الله ماشاء الله

نفس الشى تانى يوم وانا راجع احنا مشينا من بورسعيد الساعه 2 الظهر فى ز الحر والجو فى بورسعيد فعلا سخن جداااا يمكن اكتر من القاهرة وواخدنا برضوا الطريق بدون استراحه من بورسعيد للقاهرة ورغم حرارة الجو الا ان مؤشر الحرارة مازال مثل ما هو على الربع طوال الطريق

وتانى يوم بعد ما جيت اللى هو امبارح 15/9/2013 شوفت الزيت واختبرته ومازال بسم الله ماشاء الله لزوجته ممتازه و المنسوب بتاعه مظبوط تماما زى ما حطيته من العلبه تمام واخدت مشوار تانى بتاع حوالى 100 كلم 50 رايح و50 جاى

فى نهاية الموضوع انا لسه هكمل التجربه لانى قولت انها هتبقى تجربه طويله بس عموما من خلال اللى انا شوفته من الزيت
فانا قررت انى دايما هستخدمه لانه انا شايف انه اول زيت احطه فى عربيتى ويكون حاجه كويسه وتستحمل كده

حتى من خلال تجارب ناس استخدموا الزيت هتلاقوا ناس كتير شهدوا للزيت وعجبهم جدااا وكله كان مبسوط ان فيه لسه زيوت محترمه ومش عبارة عن اشتغاله للناس
وفعلا التوكيل يستحق الاحترام على انه جاب حاجه محترمه مش اشتغاله زى ما شركات كتير كانت بتنزل منتجات طلعت فى الاخر مالهاش اى لازمه

ويشهد الله عز وجل ان تجربتى اللى بقولها لكم هى تجربه بكل صدق وامانه بدون اى مبالغات نهائيا ويشهد الله على ما اقول
والحمد لله انا دائما بقول تجربتى مع اى منتج على اللى بشوفه منه سواء بالسلب او الايجاب

وان شاء الله مازالت التجربه مفتوحه حتى ال 5000 كلم ويمكن يكون بعدها كمان

والسلام عليكم ورحمة الله وبركاته
__________________

جروب رابطه هيونداى اكسيل على
Facebook
اضغط هنا
-------------------------
للبيع قطع غيار السيارة هيونداى اكسيل
وكل السيارات الكورى
اضغط هنا
--------------------------
سبحان الله وبحمده سبحان الله العظيم
اللهم اغفر للمؤمنين والمؤمنات والمسلمين والمسلمات الاحياء منهم والاموات

سيد عصام
رد مع اقتباس