والله وانا بكتب المشاركة كنت هكتب ان ثبات الفيلوستر من ثبات ال بي ام
بس لما راجعت نفسي شوية، قلت لأ كتير اوي عليها المقام ده
فكتبت انها بتنافسها (اقل منها يعني)
انا طبعا مقدر يعني ايه بي ام ويعني ايه الفئة السابعة، وطبعا كلمة ثبات خرافي قليلة عليها. بس والله كلامي ده من حكم تجربة شخصية بحتة، للعربيتين، فمشاوير كتيرة، وبسرعات مختلفة.
انا والله مكنتش مصدق اني حسيت بالثبات ده في الفيلوستر، واعدت اقارن كذا مرة بينهم.
طبعا ال بي ام تغلب في الاخر، بس انا لسة برضو شايف ان الفيلوستر كانت منافس قوي.
انا عندي كذا نظرية للموضوع ده:
- الفيلوستر ماتورها صغير، مفيش مجال تجرب الثبات اللي بجد على السرعات العالية (160 وفوق). طبعا في النقطة دي مفيش عربية تغلب الفئة السابعة، بس للأسف عشان كل مقارناتي كانت على 100 - 120 فممكن يكون ده خلي مستوى الفيلوستر قرب لمستوى ال بي ام
- ارتفاع الفيلوستر عن الارض زيها زي البي ام، اذا ماكنتش اوطى كمان + ارتفاع العربية بشكل عام (السقف) اوطى من البي ام + الكرسي بينزل معاك لحد ما تحس نفسك قاعد على الارض. أعتقد ده ليه دور انه بيخلي مركز الثقل اقرب للأرض من البي ام، وبالتالي ثباتها حلو بالطريقة دي
- الفئة السابعة فيها وزن محترم زيادة عن الفيلوستر، غير انها طبعا اطول، ممكن ده بيديني الاحساس انها عاوزة تعمل دريفت في الملفات (مع اني جربت عشان اشوف اخرها، معرفتش اخليها تعمل اي حاجة) بس انا بقول على الاحساس بس. الموضوع ده اقل في الفيلوستر و("يمكن") يكون هوا ده السبب
- النقطة اللي فاتت دي ممكن تكون بسبب تصميم كرسي السواق، في الفيلوستر الكرسي ناشف وعاملينلو اجناب محترمة، بيخليك تغوص جواه. على عكس البي ام اللي هيا معمولة عشان الرفاهية، كرسي ناعم + سهل الدخول والخروج منه. فممكن يكون ده برضو مساعد الفيلوستر شوية انها تديك احساس ثبات قريب (ولكنه أقل) من البي ام
أختلف معاك برضو في ان ثباتها زي اي عربية اسياوي
هيا ثباتها اقل من ال بي ام فعلا، بس انا ركبت عربيات اسياوي كتير مفتكرش حاجة كانت في مستوى ثباتها
وعن تجربة امتلاك شخصية، تغلب الكورولا 2003 والسيفيك 2002 واللكزس GS300 2001
وقبل ما نشتريها كنت بجرب عربيات كتير من نفس فئتها، ما فيش حاجة افتكر انها نافستها في الثبات الا يمكن السيراتو كوبيه، بس الفيلوستر تغلب برضو
وسامحني على الاطالة
