رد: النقل التقيل (بلطجه , لا شعور , ثقه , استهتار ولا فهلوه) قول رأيك , وما هو الحل؟
واضح جدا إن كلامي اتفهم بطريقة "لا تقربوا الصلاة"، وده باين من ريبورت المشاركة السيئة اللي اتعملتلي ونصها كالتالي:
"لهجة الحديث متدنية، وشماتته في مصائب سواقين النقل غير مقبولة تماما"
على العموم... أنا قلت رأيي حسب ما كان مطلوب في عنوان الموضوع ... ويمكن الحاجة اللي متهيألي زعلت الناس إني اتكلمت بشكل انفعالي شوية.
أعتقد برضو إن لهجة كلامي ما كانش فيها حاجة زيادة عن عنوان الموضوع نفسه: (بلطجه , لا شعور , ثقه , استهتار ولا فهلوه).
بالنسبة للي اتسمى شماته في الريبورت... فده اللي بقول عليه طريقة "لا تقربوا الصلاة".. لإن مع تكملة باقي الكلام ممكن يبقى فيه تفسير للي قلته... لإني ببقى حزين على الناس التانية اللي بتموت من غير ذنب.. بسبب استهتار بني آدم واحد.
وعشان أءكد كلامي خليني أقولكو "بعض" حاجات من اللي بشوفها كل يوم
أنا عايش في اسكندرية وباشتغل في برج العرب من أكتر من 14 سنة... وباروح في طريق محور التعمير من ساعة ما اتفتح... ده غير سفري للقاهرة على فترات متباعدة
طبعا كمية عربيات النقل اللي بشوفها كل يوم أكتر من أي واحد عايش بره اسكندرية بسبب وجود الميناء ومناطق التخزين حوالين اسكندرية ده غير المناطق الصناعية في برج العرب
أبرز المشاكل اللي بشوفها مع سواقين سيارات نقل الخشب... لما بيحملوا الحمولة وتبقى الحمولة بارزة برة منطقة التحميل بمسافة حوالي 50 سم من جميع الاتجاهات الأفقية... متقوليش بقى منطقة عميا لإن المرايات أصلا ما بقالهاش لازمة.... حتقولي صاحب العمل بيرغمه بحمل زيادة... طيب لما الحمولة بتحل وتقع في الطريق وتنزل على العربيات اللي حواليه (ودي بنشوفها كتير قوي)... دي مسئولية صاحب العربية ؟؟؟؟
لما تلاقي سواقين عربيات نقل بمقطورة طايرين على سرعة عالية... أقل تقدير ليها 120 كم/س.... ومش بس كده... عمالين ياخدو غرز وسط العربيات... تفتكر ده له علاقة بصاحب الشغل؟؟؟؟ ولما تيجي تكلمهم يبقوا عايزين يدوسوا عليك وانت سايق... ودي حصلت معايا شخصيا.
لما تلاقي اسكندرية مليانة ردم مركون في أي مكان في الشوارع... وأبرز مكان موجود فيه الردم ده بكميات كبيرة على بعد حوالي 500 متر من المقلب المخصص والمفتوح "مجانا"... والسواق مكسل يدخل جوه علشان حيضيع 10 دقايق فالأحسن يرميهم في الشارع والناس تلبس فيهم .. مش مهم.. المهم إنه يروح يجري عشان يلحقله نقلة تانية... دي مشكلة صاحب العربية .. مش كده؟؟؟؟
لما تلاقي عربية نقل شايلة كونتينر.. والكونتينر مقلوب عشان البيه السواق مستعجل وأخد الملف بسرعة... لو فيه عربيات تانية موجودة جنبه.. تفتكر إيه اللي ممكن يحصل لها؟؟؟ (تخيل وانت ماشي في أمان الله تلاقي عمارة وقعت عليك)
لما تلاقي عربية نقل ريحة الشياط طالعة منها لإن الفرامل قافشة والسواق مش واخد باله... أو عجلة في العجلات الدوبل نايمة أو متاكلة والعربية محملة.... هو مش كل دي أخطار إن ممكن أي حد ماشي بعربيته قريب من العربية النقل يحصله حاجة لو العربية جنحت عليه؟؟؟
وغيره وغيره وغيره.... دي مجرد عينات
ده غير كمية الحوادث اللي اتنشرت في الأخبار واللي مات فيها عشرات بسبب سيارات النقل.. على سبيل المثال:
حادثة مزلقان راس الحكمة على طريق مرسى مطروح من حوالي 3-4 سنين، واللي راح فيها عشرات من الناس كانوا واقفين في عربياتهم مستنيين المزلقان يفتح، ولقوا العربية النقل شالتهم كلهم ودخلت في القطار اللي كان لسه بيعدي.
حادثة الطريق الدائري عند مدخل مدينة نصر (من سنتين) لما كانت العربيات واقفة بسبب حادثة عربية نقل وبعدين دخلت فيهم عربية نقل بمقطورة برضو .. وكان السواق بيحاول يهرب من كمين
حادثة انقلاب سيارة محملة بالبنزين على طريق محور التعمير من حوالي شهرين اتسببت في احتراق أربع سيارات كانت ماشية وراها بالصدفة
ده كله يخليني أقول رأيي بطريقة تانية (من العنوان): بلطجة... لا شعور... استهتار
ولما الإنسان يبقى عارف إنه بيتحكم في أداه خطيرة يبقى لازم يدرك خطورتها على نفسه وعلى اللي حواليه
ده غير الفتاوى الدينية بإن اللي يتسبب في موت غيره بسبب رعونة أو استهتار في القيادة يعتبر قاتل (قتل خطأ)
الحل إيه؟؟؟
زي ما قال أخونا تامر ديزل في مشاركته... الحل المبدئي في المراقبة الفعلية.. يعني مش كماين الصبح وخلاص.. ومش مراقبة على السرعة وبس
بس الحل الجذري من وجهة نظري هي إعادة تأهيل شاملة لكل السواقين.. وساعتها يتعمل الترخيص بعد ما السواق يعدي اختبارات حقيقية ده زائد توعية ليهم على المستوى الصحي والاجتماعي والديني
مشكلتنا إننا مش بنعترف بأخطاءنا.. ولو عملنا ده يبقى حطينا إيدينا على أول الطريق... ولو عرفنا أسباب المشكلة يبقى ده لوحده نص الحل... والنص التاني في التنفيذ
...
|