[AbOnOrA]

اسرع طريقة لعمل فتة الجمبرى الشيف ابو نورا

بامانة والله قبل ما اعمل الاكلة ديه مكنتش اعرف ان فيه حاجة اسمها فتة جمبرى اصلاً هى جت كدة وطعلت جامدة وتختلف تماماً عن اى طريقة تانية شوفتها بعد كدة فدية طريقة حصرية وقولت تبقى اول مساهمة لى فى القسم

الحكاية وما فيها انى كنت قاعد لوحدى وعايز اعمل اكلة سريعة ومفيش غير شوية رز بايت (وانا مبحبوش بايت) وشوية جمبرى فى التلاجة فعملت الاكلة ديه فى نص ساعة ولا اجدع شيف واحسن من ميت ديلفيرى وباقل نسبة دمار للمطبخ واليكم الطريقة

حلة صغيرة يتحط فيها كوبايتين تلاتة مية
يضاف ليها فصين تلاتة توم
توابل سمك
كمون
شوية ملح
معلقتين زيت
لمونة او اتنين

لو فيه اى حاجة من دول مش موجودة شغال برضو لو فيه شوية فلفل او شطة زى مانت عايز بس المهم قولونك يكون سليم ومعدتك تمام



وتسيب الشوربة ديه على النار
وتجيب الجمبرى تقشرة وتنظفة عقبال ما المية تغلى هتكون خلصت
تقوم حاطط الجمبرى على الشوربة وياخود غلوة فى دقيقتين

كده انت عندك جمبرى مسلوق مع شربة لذيذة ممكن تاكل على كده وتسكت لكن لو عايز تبقى اكله جامدة كمل باقى الوصفة



طلع الجمبرى من الشوربة وجيب طاسة حط فيها
شوية زبدة صفرا لو مفيش ممكن زيت
وطماطمياتين وفلفلتين اخضر او رومى وشوية ملح واى بهارات حسب ذوقك

خمس دقائق بالكتير هيكون كله استوى مع بعضه والجمبرى عمل صوص مع الطماطم والفلفل جاااااااامد



طلع الجمبرى بالصوص على جمب وفى نفس الطاسة حط الرز وحط عليه شوية شوربة من بتاعة الجمبرى اللى فى الحلة وسخنة فى نفس الطاسة علشان ياخد نكهه الجمبرى

بس يا سيدى جيب بقى طبق وحط فيه الرز وفوقيه الجمبرى بالصوص وبالهناء والشفاء وادعيلى