رد: مواقف كوميديه مع السيارات
الحمد لله تم افتتاح اول مول في بورسعيد في شارع طرح البحر و طبعا حبيت اروح اشوف ايه النظام هناك فكلمت واحد صاحبي ليله ما عرفت ان المول افتتح و قولتله نتقابل بكره و نروح نشوف المول مع بعض قالي تمام فقام مكلمني تاني يوم الساعه 9 الصبح ( رخامه علي خلق الله ) و مكنتش عامل التليفون سايلنت فصيحت من اعز نومه هو كلمني عشان نروح المول فقعدت اتفاوض معاه نروح بليل اصر اننا نروح بالنهار فاتفقنا اننا نتقابل بعد الضهر و قد كان فقام فايت عليا بالهوندا بتاعته و روحنا المول و حاجه بسم الله ما شاء الله حاجه تشرح القلب ( بس طبعا مش زي مولات القاهره و اسكندريه ) و طبعا مفيش باركينج لضيق المكان فركناها بعيد عن الكافيتريا شويه ( انا اللي كنت سايق ) و قعدنا في الكافيتريا ( المول كان مليان بنات مش عارف ليه ) المهم بعديها بشويه جت عربيه هوندا برضه نفس اللون و الموديل و الجنط كمان ( صدفه عجب ) و ركنت قدام الكافيتريا بالظبط و احنا مروحين بحط المفتاح في كالون باب العربيه مبيدخلش قعدت احاول مفيش فايده طبعا كان منظرنا زباله و احنا بنحاول نفتح الباب و هو مش راضي يتفتح و اللي يضحك و اللي يقول اي خدمه ( غتاته بقه ) المهم اتلاقينا واحد شبه هوجن داخل علينا و بيزعق : انتوا بتعملوا ايه ؟ قولتله بقرف : في حاجه ؟ فقام قايل و هو بيشدني بعيد عن العربيه : انت بتسرق العربيه و لا ايه ؟ طبعا صاحبي اول ما شاف الراجل بالمنظر ده بعد بعيد بدل ما يضرب معايا مع انها عربيته المهم رديت عليه و انا بحاول جاهدا اني ابعد ايده عن القميص المكوي : هو في حد بيسرق عربيته يا بني ادم ؟ فقام قايل : دي عربيتي انا يا حيوان فقولتله بزعيق : ازاي دي عربيه صاحبي و احنا راكنينها هنا فقام قايل بغيظ : انا اللي راكن هنا لسه من شويه فقمت باصص علي رقم العربيه اتاريها مش عربيتا دي العربيه اللي ركنت قدامنا من شويه و طبعا اتمنيت اني اغووووووووور في سابع ارض لان منظري زباله جدا و طلعت حرامي قدام بورسعيد كلها فقومت قايله بمنتي الحرج : اصلها شبه عربيتي جدا و انا عربيتي راكنه هناك اهه انا اسف فقام قايل باستهزاء : ابقي خلي بالك المره الجايه يا حماده ( و الكلمه دي بتغيظني بس لو كنت اتشاكلت معاه كنت اتطحنت ) فقام صاحبي جايلي و بشدني و هو ميت من الضحك عليا
|