[AbOnOrA]

اليومين دول بقيت اسمع كتير اوى كلام غريب اوى اوى عن الجواز فقولت اخد رايكم فيه

مثلا ديه مشاركة لصديقة كتبت فيها الاتى :

موضوع للمناقشة واحدة صاحبتي عندها ظ£ظ§ سنة ماتجوزتش رغم جمالها ورقتها واخلاقها كلمتني في التليفون منهارة من العياط وبتشتكيلي انها اتخانقت في الشغل مع زميلتها وعايرتها انها عانس قالتلها باللفظ يا عانس نفسي اعرف مين الزبالة اللي طلع الكلمة الزبالة دي وليه لازم يطلق لقب على من تاخرت في الجواز ويفرق ايه مع الناس لو ماتجوزتش خالص وليه بيبصولها اما باستنكار واما بشفقة وهل افضل للبنت انها تتجوز اي جوازة والسلام حتى لو حتتطلق ولا تفضل من غير جواز اكرملها البنت صاحبتي اللي بتكلم عليها رفضت كتير لانها ما ارتاحتش نفسيا لحد بس دلوقتي ومع تقدمها في السن قررت انها تقبل واحد مش مناسب ليها لا اجتماعيا ولا ثقافياً عشان تتخلص من نظرة المجتمع ليها كعانس هي حتقرا البوست اكيد ياريت اعرف رايكم

لحد كدة ممكن يكون الموضوع طبيعى شوية .. لكن اللى مش طبيعى خالص الردود اللى جت عليه فناس تقولك الجواز ده موضة قديمة وشوف بره بيعملو ايه ! واللى يقولك اصل مجتمعنا فاشل وجاهل ومش المفروض يبص على الواحد ولا الواحدة اتجوزو ولا لاء! واللى يقولك اصل ديه عادات جت من الفكر الوهابى
واللى يقولك ديه افكار فلاحين
وغيرها كتير من الردود اللى جابتلى اشمئزاز وقلبت بطنى وخليتنى اسيب كل حاجة فى ايدى علشان اكتب ردود عليها
والاغرب ان بعد سيل الردود والمناقشات ديه اول ما كتبت ردودى الناس سكتت فمش عارف انا بقيت غريب ولا فيه ايه بالظبط بصراحة

ديه كانت ردودى

كلام عجيب كله من اوله لاخرة بصراحة .. اولاً فيه فرق كبير بين نظرة المجتمع كله حاجة ونظرة صاحبه بتكرهك حاجة تانية القياس لا يصح بالطريقة ديه حتى لو كانت متجوزة وناجحة وسعيدة وكل حاجة برضو هتلاقى واحد واتنين يتخانقو معاها ويوقلولها كلام يزعلها ومش منطقى ابداً ان علشان كلمة اخد قرار مصيرى زى ده .. ثانياً نظرة المجتمع للراجل الى مش بتجوز متختلفش كتير عن نظرته للبنت الاتنين بالنسبة للمجتمع حالة "شاذة" عن المعتاد اللى هو ان الناس تتجوز واللى يقرر يعيش فى مجتمع بدائى زى بتاعنا ده "خارج نطاق المعتاد والمألوف" لازم ياخد قرار من ياما ميبقاش حساس اوى كدة وميبصش لاراء الناس يا ينعزل ويعيش فى الصحراء يا يسيب ام البلد كلها ويطلع بره

وبعدين فكر وهابى ايه اللى ليه دخل فى المشكلة انا نفسى افهم !! ديه عادتنا وتقاليدنا من ايام الفراعنة لدلوقتى روح شوف الصعيد كله مسيحين قبل مسلمين اهتمامهم بجواز بناتهم بيبقى ازاى .. بلاش دول اسالو اى ام او اب عن انتظارة لفرحة جواز بنته واسالوه عن علاقته بالفكر الوهابى ولا الهبابى !! وبعدين واحد يقولك اصل بره مبتجوزوش مين قالك يا بيه الكلام ده وانهى بره وانى مجتمع فى بره تحديداً العائلات الكبيرة فى اوروبا او امريكا الشمالية الجواز عندهم بنفس اهميته هنا اما الناس الصيع ديه قصة تانية فى اى حته طبعاً .. امريكا اللاتنينة بقى متختلفش عن الصعيد الجوانى حاجة زيهم جنوب ايطاليا مثلا او شرق اوروبا

لو بنتكلم عن الصيع حتى اللى بره فهما اه مبيتجوزوش رسمياً بس " المعتاد والمألوف مجتمعياً " ان كل واحد او واحدة بيبقى له رفيق او رفيقة وبيعيشو مع بعض من غير قانونية الزواج ولو انا عايش بره وسنى عدى التلاتنين ولسه عايش مع امى صحابى هيهرونى تريقة برضو ولو عايش لوحدى هيشكو فيا انى هومو .. طب عمر حد شاف حد ليه مكانة اجتماعية بره وزير ولا سفير ولا برلمانى مش متجوز !

الخلاصة الجواز بره مسائلة قانونية بحته والوضع اللى بعض السفهاء هنا شايفه جنه ده وبال وكارثة اجتماعية على مجتمعاتهم هناك وبيحاولو يصلحو مش مبسوطين بيه وعلشان كدة بنلاقى دلوقتى قوانين فى اوروبا (الغربية) وامريكا تتحايل على مشاكل الجواز القانونى التقليدى هناك بحيث تضمن اطار قانونى للعلاقة الزوجية بدون مساوئ التبعات القانونية التانية وهو ما يعرف بقوانين الشراكة المدنية او الاهلية civil partnership / civil union ده مثلا مثال من انجلترا Citizens Advice - Living together and civil partnership - legal differences

......
انتهى الرد

كلامى ده فيه حاجة غلط !!

انا عن نفسى اتجوزت واللى كان كان خلاص بس بالنسبة لاخواتى الصغيرين اللى بجوزهم ولا اولادى اذا ربنا ادانى العمر اجوزهم هيبقى الجواز بتاعنا ده عادى كدة يعنى ولا ممكن يلغوه راخر باعتبار انه تخلف مجتمعى وفكر وهابى ويمكن يطلع عمل ارهابى كمان